英國反加學費示威搞到保守黨同自民黨一鑊泡

英國廣播公司直播網頁

香港啲八十後叫激？睇吓我國，亦即大英帝國先。

BBC搞到要網絡直播，因為呢鋪英國學潮，實在玩到好大，幾乎全英有主要大學嘅城市，都玩到膠晒，仲有中學生都玩埋一份。

當然，搞到班學生咁嬲，因為有走數人士發膠音。果位走數人士，正係我國副首相，Liberal Democrat嘅黨魁Nick Clegg，選舉果陣就牙斬斬反對加學費，依家走數就叫班學生睇清楚份proposal先。你想像吓高登仔會俾乜反應你，就明白點解英國學生有咁嘅反應。

英國班友，包括嚟自牛劍嘅精英，可能係未來英國政壇主導者，大學時代就係咁。可以肯定，呢鋪食花生食得最過癮係工黨。

給新聞界：唔該睇吓人地英國廣播公司點做呢類新聞，由鏡頭角度到取態。

郝龍斌膠到無朋友

奇摩五都大選答問：為何有路平專案，馬路仍常常開挖且不平？？

郝龍斌點解選情告急，連未來事件交易所都沽盤湧現，因為郝龍斌仲未知膠乜嘢。

去過台北嘅人，都知道台北市掘路掘到亂七八糟，無人反對搞路平專案，但你條友管理一鑊泡，你坐綿羊仔出街，唔同你爆粗就怪。仲要郝龍斌嘅解釋手法，同鄭汝樺個賠咗菜園村村民共同幾多錢嘅思維方式一樣，你當台北市民係傻架。

呢次提問，一嘢KO郝龍斌，如果我係台北人，絕對唔會投呢個低能管理嘅膠人一票。郝龍斌最唔記得一樣嘢係，蘇貞昌做台北縣長果陣，台北縣嘅縣政係最好，周錫瑋做咗四年就搞到衰晒，否則都唔駛出動朱立倫出嚟選喇。

搞民主唔駛搞到犧牲屋企人

近排有個講法，話黃毓民個仔，可能因為被中國政府扣押，所以好多嘢要妥協咁話。

小弟對社民連內鬥無興趣，只不過，小弟由喺商台做識黃毓民到依家，雖然當中經過唔少恩怨，但封咪期間，佢究竟受緊點嘅壓力，我係睇到，果種壓力絕對唔係細，由果度你睇到老共為求目的，可以幾不擇手段。呢度，我可以講番句公道說話。

共產黨無嘢叻，最叻係挾持人質，由於黃特漢之前有涉及毒品嘅紀錄，咁樣黃特漢人入到深圳，老共屈條同毒品有關嘅罪有乜出奇，法院係共產黨開嘅。就算黃特漢無做，明明無都可以講成有，呢啲招數共產黨用開。

喺中國，涉及毒品嘅罪行可以去到打靶，可大可小。如果老共咁樣要脅黃毓民，黃毓民唔受壓力就假，共產黨人諗嘢仲毒過啲毒品，呢啲己經去到恐怖分子挾持人質嘅級數。如果黃特漢真係被老共扣留，黃毓民大可以向泛民嘅人講清楚，泛民嘅人搞民主都係明白事理，為咗個仔安危而退落嚟，大家可以理解。大家都睇過《三國演義》，知道徐庶嘅古仔，共產黨班友個個都讀《三國演義》。劉千石為咗見佢阿媽，被迫退出民主運動大家都無怪佢，因為搞民主都未去到要犧牲親情嘅地步。搞政治要搞到犧牲親情，呢個叫文革。搞民主無話無咗邊個唔得，更加唔要求要犧牲自己嘅家人。

但最緊要一樣嘢就係，黃特漢有無被老共扣留，一定要同泛民嘅盟友講清楚，唔好等大家有猜測，呢個亦係為咗成個反對力量團結著想。社民連嘅人可以懷疑民主黨同中聯辦有檯底交易，人地民主黨人一樣可以拎呢個傳聞嚟質疑黃毓民，道理一樣，呢個只會益咗共產黨。如果搞民主一定要有某個人至得，呢個就唔係民主運動，而係老毛式個人崇拜。

關愛基金有必要成立嗎？

「(4) 財政司司長在充分預留根據第(2)及(3)款應付而未付的款項後,可由獎券基金撥出款項,以 補助、貸款或墊款方式,對行政長官在徵詢社會福利諮詢委員會的意見後所批准的社會福利服務, 給予財政資助,使該等服務獲得支持及發展。 (由1973年第66號第3條修訂;由1997年第362號法律公 告修訂;由1999年第68號第3條修訂)」

以上條文係《政府獎券條例》第6條嘅第(4)款條文，亦即今天大家買六合彩嘅法源。好明顯，六合彩做緊關愛基金嘅嘢，由罕有病症病人買新藥，到長者鑲假牙，全部可以由獎券基金撥錢，只不過獎券基金喺社會福利署啲公務員手咁解，好少亂嚟，因為獎券基金要被審計署長睇住盤數。

依家關愛基金，由法源到管理都唔知乜嚟，所以至有譚耀宗爭取關愛基金資助長者鑲假牙，呢啲聽落嚟都膠嘅事。由納稅人無啦啦割啲錢出嚟己經好離譜，而且好大機會落入民建聯呢啲土共組織，用嚟「成功爭取」，點得？

關愛基金根本無必要成立，獎券基金做番好就達到目的，除非關愛基金根本係唐英年及土共助選基金。