又係啲土共放屎尿屁？

UncleRay: 我對菜園村關注組貪婪鐵證的疑問

果篇抹黑菜園村村民文章誹謗程度，比《文匯報》李自明果篇更勝一籌，只不過發現有兩樣嘢。

1. 呢篇文章，我曾經成篇擺喺運輸及房屋局副局長邱誠武面前，佢都未證實裡面啲嘢係真，我亦睇政府根本唔會證實果啲料係堅，因為根本係流。如果政府有咁多「堅料」，仲駛你呢啲無名博主放風，搵星島、東周都得喇。邱誠武話11月19日唔郁菜園村，最後亦真係退咗兵，所以，呢啲料政府都唔敢認頭，走去叫人問政府佢就真係唔負責任到爆。

2. 土共寫誹謗文章，係有被人告上法院紀錄，2004年領匯上市之戰，《大公報》有篇抹黑文章話大班沽咗期指，筆法同果篇抹黑文章類似，結果大班一聲唔該告入法院，《大公報》最後要和解。跟住何秀武喺區議會選舉又係用咁嘅手法抹黑鄭家富，結果何秀武要賠成六十七萬。你認為土共咁鍾意上法庭。

所以，呢啲文章就唔放喺報紙，因為一放報紙，我諗依家嘅人唔會做善男信女，唔告佢入法院。所以，就用中國資金背景嘅新浪網，喺度匿名放料唔負責。

南洋誹謗法律搞到咁辣，好大程度因為中共指揮嘅馬共，當年五、六十年代，專門發表啲無事實根據煽動性文章，至今遺毒仍然由國陣旗下《馬來前鋒報》發揚光大。呢班友如果用埋啲中共文革手法亂嚟，我相信亦無乜人想對佢地客氣。係鐵證嘅，真係咁堅嘅，唔係叫人去問政府，而係自己拎實質證據出嚟。事實上，咁多年嚟，土共呢方面死性不改。只不過，何秀武嘅例子話俾大家聽，寫呢啲打手文章，或者轉發，如果真係要負上法律責任，係無人可憐，果啲友仔落筆前最好諗清楚。

香港證實地震！

「
天 文 台 錄 得 后 海 灣 強 烈 地 震
2010-11-19 HKT 15:18
天 文 台 於 下 午 2 時 42 分 錄 得 一 次 強 烈 地 震 。
經 初 步 分 析 ， 震 中 位 於 后 海 灣 附 近 ， 即 香 港 天 文 台 之 西 北 約 35 公 里 ， 震 級 為 黎 克 特 制 2.8 級 。 」

我諗依家第一件事，係搵人check咗大亞灣有無漏輻射，呢件事極為重要。香港天文台西北35公里，即係深圳出現地震，唔係講笑。

地震唔塌樓都好，影響核安全都夠晒。

菜園村抗爭成田化

一月十三日《信報》余錦賢提出咗一個，我相信反高鐵運動依家走緊嘅方向，就係反高鐵運動成田化。如果真係走向成田機場鬥爭式嘅運動，對政府，將會係惡夢。

成田機場興建相關抗爭，係亞洲地區有晒名。大家見到成田機場，無厘頭喺機場中間，有啲農田或者住屋，呢啲就係成棚抗爭行動中，最有膠力嘅部分，亦即所謂「一坪地主」運動。買一坪地返嚟阻止你班友起機場。如果我係成田機場當局，應該安排遊客參觀吓，因為真係奇景。

當然，唔只一坪地主運動咁簡單，日本有類似香港《收回官地條例》嘅法律，授權政府強制收回用嚟做公共建設嘅土地，但由於成田嘅農民抗爭運動相當多，一係血腥暴力到好似東峰十字路事件，或者成田機場控制塔佔領事件，而由1978年到2004年，大大小小有成五百幾宗玩膠遊擊事件，煩不勝煩，最後日本政府連用強制收地呢招都唔敢，呢個亦係促使日本用填海方式擴建羽田機場，羽田機場重新成為國際機場嘅原因。日日咁同農民以及新左翼分子玩膠，幾時至擴建到機場至得，不如填海算數。

依家政府對菜園村呢班，因為新界原居民阻住地球轉而買唔到嘅村民強硬，一啲好處都無，因為高鐵沿線好多人受影響，例如大角嘴居民，依家西九四小龍嘅住客，見到深旺道樁柱工程，同美荔道隧道開工，至少佢地都係中招人士。一旦抗爭擴大，經常有人玩膠就一啲都唔好玩。演變城市游擊戰可能性係存在，因為菜園村居民，大角嘴居民都一無所有，佢地抗爭嘅機會成本越嚟越低。

陳鑑林直必腸難求

小弟有時要要阻止一啲膠政策，或者追一啲硬膠數上立法會Panel講嘢，例如IT Panel講兩個電台續牌我一定講嘢，特別我2004年仲係商台研究員。

只不過，今天全日嘅笑點，唔喺來賓發言，而係陳鑑林成段直過直必腸嘅言論。

1. 佢大讚新城財經台嘅財經節目，自認自己成日聽啲財經節目，仲話要多啲。（如果佢炒燶股票，貴客自理）

2. 認為十八仝人愛落區係關愛年青人嘅好節目（劉江華面皮再厚，都未厚到咁嘅level，呢條友嘅面皮結構，值得研究）

3. 佢話左派成日喺烽煙無機會發言喎（佢條友都傻，大佬，我有時會客串做PA架，我話當年湛國揚成日投訴，左派唔肯上嚟做節目對黃毓民對辯，即時秒殺咗陳鑑林，亂嗡都要睇對手係乜水至得架，我呢世人都無乜幾可能夠秒殺對手）

假膠好多，真心難求，陳鑑林可堪為一條真心到爆嘅真心硬膠。講真，我聽果陣忍笑忍得好辛苦。

今日仲有一個笑點，唔喺會議裡，而喺商台網站

商台：立法會公聽會有巿民對商台作出批評

「立法會一個委員會就商台及新城電台牌中期檢討，舉行公眾聽證會。大河蟹批發商會錢偉洛指，商台至今未有就04年多個主持人封咪事件作出交代，又批評商台部份節目偏幫某一方，又質疑新城電台不敢批評長實主席李嘉誠。選民力量陳志全不滿，商台十八仝人愛落區節目只是被廣管局罰款三萬元是太少。亦都有個別人士批評，商台一台台長黃永多次嚴重違規，質疑他難以管理下屬。」

郁黃永果條友，唔駛問阿貴，當然係小弟（我直頭喺俾立法會Written submission點名郁佢），只不過連商台新聞部嘅新聞都咁郁黃生，唔知黃生知唔知膠字點寫？