減慢車速嚟減噪音，咁塞車邊個負責？

香港啲土共議員有個特色係建議唔經大腦，選呢啲人做議員，個城市只會越嚟越硬膠，下一代智商下降。為咗維持呢個城市仲係正常人住，特設土共硬膠系列，專門捕捉土共啲膠嘢嚟恥笑一番。另有土共無恥系列，就專門對付啲無恥建議。

梁美芬當然係第一集嘅主角，西九四小龍其中三個屋苑，亦即泓景臺、昇悅居同宇晴軒，係受到西九龍走廊荔枝角道出口嘅噪音影響，低層居民當然受罪。鋪減音瀝青、加建隔音屏障都係合理建議，只不過，減車速嚟減噪音就O晒嘴。

西九龍走廊同埋介乎西九龍走廊至荔枝角大橋之間嘅荔枝角道，係五號幹線嘅一部分，五號幹線係香港主幹公路之一，減速大減車流量，隨時影響成個九龍嘅交通，如果其他地區居民投訴，都係九龍西選區，我想問梁教授諗住點交代？

唔該，下鋪爭選票前，用吓個腦先。

呢啲就叫報警專家

話說幾年前，小弟同網政廿一交惡果陣，李偉儀公然喺《成報》個專欄屈我打人，當年小弟完全唔明呢條友，點解乜都無做過都可以話我打人。

只不過近日社民連內鬥，真係乜都真相大白。
李偉儀: 警方展開調查黃浩銘和唐婉清事件

1. 雙倍奉還都要搞到報警，唔怪得當年小弟被人屈打人喇，有啲人原來敏感成咁，真係隨時向她呼出二氧化碳都會被人報警，唔知香港警察對呢啲熱愛警察嘅市民係唔係好無奈。

2. 我想問，正當楊匡因為警權泛濫，搞到無辜坐咗十四日，啱啱放出嚟之際，李小姐為咗黨內內鬥竟然搞到報警咁小學雞？大佬，情何以堪呀？