馮煒光，你有無無恥啲？

馮煒光﹕活用創意 600萬夠使

「【明報專訊】600萬的競選經費上限是多是少，確是言人人殊。曾表示考慮出選「超級區議員」的民主黨 馮煒光認為，只要候選人「有諗頭」，富創意，600萬元已經夠用。」

小弟一向唔贊成狙擊民主黨，但有兩件事係例外，一件係要求劉慧卿辭職，但都仲要睇最終通過嘅政改方案，如果最後超級區議員提名門檻高過十人，她真係變咗走數人士，再慢慢追斬佢九條街都未遲。正如我依家都未要求馮檢基請小弟食飯，但如果最後通過本地立法無包區議員委任制廢除，我至要求馮議員請小弟食飯。

但係狙擊馮煒光，依家就做得。

本來佢喺經濟日報好多偉論都過晒火位，但呢句係膠中之膠。大佬，600萬可以買層樓，民主黨其他比佢有能力議員，好似胡志偉咁，都惆悵緊呢筆費用果陣，馮煒光講啲咁嘅嘢？佢條友唔係為黨同埋民主派大局著想，一日到黑只係諗住佢有無機會做立法會議員。當其他民主黨議員都無辦法籌到錢果陣，係咪最後剩番佢可以被提名？

作為泛民中人，不以蒼生福祉為重，只計自己小算盤，呢種人俾佢上台，會有乜後果，大家諗諗。