廣州事變

番禺居民對垃圾焚化爐嘅抗議，今日演變成全面抗爭。先有請願群眾演變成在市政府門前示威，根據twitter上的最新報導，雖然有相當部分群眾和平散去，但亦有群眾轉移陣地繼續抗議，有可能成為前日昆明市中心大規模反拆遷事件後，另一宗急劇惡化的群眾事件。

而這次事件，可以說是中國政治另一個里程碑：

1. 這次是有效使用Twitter傳播的中國大規模民眾事件，基本上，你鎖定#pylj就己經肯定知道最新動態，我睇中國政府必定絞盡腦汁封鎖twitter，但中國民眾會發現微博客嘅強大威力。

2. 由於這件事喺twitter傳播得太快，去到連官方傳媒也開始突破當局限制報導事件，以下係《南方日報》即時報導，如果香港傳媒仲係自我河蟹嘅話，真係連南方報業集團都不如。可以肯定係，南方報業集團喺編採自主問題上立場越嚟越強硬，有可能成為中國真正嘅新聞領導者（鳳凰衛視去死吧）。

View this document on Scribd

3. 廣州市民承傳廣州佬一貫作風，就係己經費鬼時理政府嘅謊言，又懶得理公安會唔會拉人，總之出咗嚟先講，之後小弟見到唔少訪民亦加入埋抗議隊伍，喺人多勢眾下睇嚟唔係咁快可以收科。五年前番禺太石村事件，揭開中國維權抗爭嘅序幕，五年後又喺番禺，垃圾焚化場抗爭再度為中國民眾運動嘅模式升級。呢次事件嘅發展，將會決定2010年嘅中國局勢會係點。

所以，香港人咁怕死做乜，公投就公投，幾大就幾大。

解放軍咁走毅行者就食屎吧

中國人民解放軍駐港部隊，今年首屆參加毅行者，查實本來係好事，因為呢個代表佢地願意同香港社區共同合作，不過，佢地贏咗毅行者冠亞軍後，果啲核突表現就搞到解放軍出醜，睇嚟遲早會修例修到唔駛解放軍出嚟玩。

毅行者嘅路線，查實係駐港英軍，特別啹喀兵嘅訓練路線，真正嘅軍事訓練精神係，以盡量少的支援，以最快速度完成整個路段，軍人打仗係預咗隨時無補給或缺乏補給都要打落去，呢個係軍事常識，訓練果陣預備大量補給支援果啲係白痴訓練。所以啹喀兵一向都係以基本的支援隊伍嚟行畢全程，兩三條友做支援，然後自己孭相當重裝備，軍事訓練就係咁樣。

而毅行者亦唔係鬥快做目標，睇過蔡東豪寫毅行者本書，都大概知道毅行者係挑戰自己同養成團隊精神更重要，名次真係比較次要。由於大家都唔係當毅行者係乜體育比賽，所以樂施會亦無明文限定，每隊支援隊伍可以有幾多人，可唔可以中途換跑鞋，支援隊伍可唔可以阻人前進之類嘅問題。

但係解放軍呢鋪真係勁難睇，史上最豪華嘅支援隊伍唔駛講，仲要支援隊伍阻人前進，中途換嘅跑鞋通山掉，搞到成個路段不知所謂。咁唔怪得人地投訴爆你，由體育精神嚟講，俾你拎到第一又點，一睇就知解放軍唔知毅行者玩乜。而軍人最講武德，呢個仲睇到解放軍武德，連國際標準都未達到，威武文明之師就只係中國方面自吹自擂，呢類無武德軍人，就連二次大戰德國國防軍都不如（黨衛軍SS係勁，不過濫殺猶太人嘅人渣垃圾）。

由軍事角度嚟睇，解放軍有無作戰能力仲係疑問，成棚友有大量支援下輕裝上陣，時間仍然比啹喀嘅紀錄慢廿五分鐘，呢幾年參加毅行者嘅啹喀，查實都唔係現役軍人，G4S果班係退役軍人，如果退役軍人無屈機仍然快過你嘅話，咁你呢班現役軍人喺作戰體能上，根本係遠不及啹喀，以往駐港英軍，甚至隨時只係皇家香港軍團（義勇軍）嘅級數，駐港解放軍己經係精英軍團，咁大家諗吓中國最頂級嘅陸軍，打唔打得過英軍先？連英軍都打唔過，咁美軍一打到嚟，你敢肯定解放軍有近年四圍打仗嘅美軍咁fit？

呢啲死面子嘅行徑係自暴其短，如果我係北約成員國駐港武官，或者日本自衛省嘅武官，睇完今年毅行者只會笑咗，中國係軍事強國，連軍人基本質素都未搞掂，俄國賣幾多過期軍備都係得啖笑。

悲情城市廿週年

2009年11月22日，是《悲情城市》上映廿週年，候孝賢的《悲情城市》揭開了台灣平反二二八大屠殺亡魂的序幕，一九四七年那些被中國出賣而失望透頂的台灣人，由這套片開始得到平反，李敖那些對二二八的不公評論，小弟簡直想用否認大屠殺者來形容這類人渣（Holocaust deniers）。《悲情城市》以及《海角七號》，都是了解當代台灣人那種台獨情緒的入門電影。

而小弟相信，近日香港人，開始越來越明白，台灣人，華裔印尼人，馬共成員等被中國憤怒從何而來。

在二次大戰後，中國三次出賣曾經對中國充滿期盼的海外華人。

1947年-1989年 台灣本省人
1956年至今 華裔印尼人、印共成員（包括印尼裔人）
1960年至今 馬共成員（包括馬來裔、印度裔人）

這些人原本熱愛中國，但後來他們遭到什麼對待？先講台灣人，由1947年到1987年開放黨禁為止，四十年的白色恐怖不用說，就算投共都不見得有好下場，二二八的領袖謝雪紅，也是綠營少數承認身為台共成員的台灣英雄，1957年反右被批鬥一次，1967年文革更屢遭批鬥，1970年是病逝醫院走廊，獲中共重用都是林毅夫這類吃裡扒外的「醒目仔」，你作為台灣人，你怎會不走上辜寬敏、彭明敏那條不歸路？

華裔印尼人被出賣的故事，這裡講過不少，不如講一下馬共，馬共成員，包括馬共前總書記陳平，迄今仍未能回到馬來西亞，雖然陳平查實可以用其英治年代出生身份，以英國公民身份終老（無國籍英國海外公民，NIAA 2002下可成英國公民，馬來西亞和中國都不會承認陳平的國籍），但作為反英運動的大元老，他以英國公民身份終老是不是太荒謬？他也可算是馬來西亞開國元勳之一。而中共現時與國陣關係極好，但在陳平返國問題上，就是沒為陳平講過一句公道話，這種走數行徑，不令人心寒乎？都還未計，有多少華裔精英枉死在馬共的森林戰爭中。

有不少台灣人對我說，小弟的主張比民進黨一些黨員更綠，小弟的回覆是，當你徹底了解中共的歷史，你便知道，相信中共是笨得無可再笨的一件事，小弟可不會再上當了。

推薦文章：困局之內爭民主

陳雲：困局之內爭民主

在政改報告公開前後，香港幾位歐陸派，包括吾友林忌（法德並之），吾師關信基教授（德系），甚至小弟（嚴格而言，小弟偏重德系），都公開發表過立場，以及對公投論的說帖，而陳雲博士（德系）在今日《星期日明報》的說帖，份量更是重中之重，不容錯過。

「由於中共處於強勢，香港的義人要在安全的範圍內，明確表示爭取民主的態度，無論民主黨派如何不濟，都要投民主黨派內的先進分子一票，不能以犬儒的態度回避投票，或者出於戲謔或意氣，而投票給親共、親商的候選人。每張正義的投票，每次民主示威得到正義市民的默默贊許，都顯示香港爭取民主的決心。好好地讀書、看報，以完整的句子傳情達意，蔑視親政府的宣傳，幽默地嘲笑民主的敵人，做一個快樂的抗爭者。不論爭到政治民主與否，都要盡量在日常生活實踐民主和寬容。」

陳雲上述這一段，很清楚指出現時民主派的戰略方向，這本質就是間接路線（indirect approach），不要因意氣而支持老共，要在理論上作出思想武裝，以「玩膠」手段玩到政府無地自容，這也是林忌這幾年戰略精神的精髓。這是有清晰戰略目標的理性行動，不是為膠而膠。

「當中共的人民幣被迫成為自由的國際貨幣，人民幣不再依附美元，美國逼迫中共當大哥、不能再認弟弟，中共以金融勢力形成亞洲權力圈而美國完成經濟整固的時候，中美就會有大衝突。以中共的知識能力和處理危機的能力，到時便會焦頭爛額。香港要自保，香港的民主進程、國際化進程、（反共的）中華化進程，其實就是要維持香港的政治特區地位，在國際衝突之中令大家對此地留有一手，令香港倖免於難。以此觀之，香港親共，是自尋死路。中共不許香港先行一步，不許香港做民主實驗，是全國一盤棋、攬住一齊死的心態。然則，香港人不會那麼蠢，坐待滅亡吧？」

陳雲上述這段，就是香港爭取民主的戰略合理性依據，不論你的國家認同如何，不論為了中國，還是為了香港，維持香港自主性是最大公約數，香港人不是任由中國中南海那幫蠢才宰割，香港應該走自己的路，這為香港而走，但亦為中國而走，因為連香港這最後血脈也沒有，中共一旦令中國崩潰就是永不翻身！這也是五席公投戰必須孤注一擲的最重要原因，這是最後的機會，我們沒有戰略上放棄的餘地。

陳雲這篇文，是一篇邏輯清晰，以戰略思想寫成的重要文章，也是五區公投的說帖。這也是歐陸派幾路人馬，不論一向思想激進如小弟者（事實仍屬保守），溫和如關信基者，甚至陳雲也有一致看法的原因。民主黨中人，在戰略上，這是必須要打的一仗，司徒華在打什麼算盤，小弟清楚，所以不會批司徒華，但實際執行決策的民主黨員，應該支持五區公投戰打到底。

延伸閱讀：

林忌：致泛民所有年輕一代的公開信

走數叩頭學者張炳良

當張炳良同埋新力量網絡膠到一個忍無可忍的地步，一向以學者自居多於商人的小弟，也忍不住以走數叩頭學者來鬧爆張炳良。

「張 炳 良 ： 「 五 區 總 辭 」 無 法 改 變 人 大 常 委 會 的 決 定
2009-11-22 HKT 12:26
黃凱宜報道
行 政 會 議 成 員 張 炳 良 表 示 ， 尊 重 泛 民 遊 行 表 達 意 見 ， 但 他 質 疑 「 五 區 總 辭 」 是 誇 大 了 可 以 改 變 選 舉 辦 法 的 作 用 ， 實 際 無 法 改 變 人 大 常 委 會 的 決 定 。」

實際由張炳良領導的新力量網絡，先有一群學者，包括師弟方志恆在內，連公投都叫激進的膠論都講得出，氹香港人相信中共呢個政治寶藥黨，然後他就發表五區公投人大常委都唔睬你的怪論。呢條友喺一九九五年六十席直選之役，己經走咗一次數，你認為呢條友仲信得過嗎？喺人格上，我己經唔信呢條友。

公投可以無法定效力，一如五區公投喺無公投法保障下，係無法定效力，但係全世界公認一點係，公投結果就係全民意志，無人夠膽挑戰全民意志。加拿大魁北克獨立公投，講法語嘅魁人黨（法語系人加華裔台灣移民）確係輸咗，但由於正反雙方差距只係幾個百分點，最後至有哈珀首相上台後，宣稱魁北克係國中國嘅折衷解決方案。

所謂理性，唔係向一啲流氓投降，任由宰割叫理性，正係呢種錯誤理解至導致南京大屠殺中，中國人竟然無有效反抗日本班人渣，對住全無談判誠意的對手，正確做法係以戰迫和，學術上的理性係局限條件嘅利益最大化。小弟以前的老師關信基，經常用鄒讜的《二十世紀中國政治》教政治搏弈，但他這次支持五區公投，並且辭埋高等教育界選委職位，因為依家己經去到只有公投至能有機會打破僵局嘅地步，唔通張炳良期望更激呀。

小弟唔會立亂支持無戰略合理性嘅打法，但呢次五區公投係無可奈何嘅一著，對住立心走數嘅老共，你只能迫佢公投決勝負。

腦場市道不大好

小弟因為本身都算係做電腦IT貿易，有時會同啲批發商Sales食飯，近排Sales嘅話題，莫過於又有腦場連鎖大鋪執笠。灣仔電腦城有間連鎖大鋪執笠早唔係新聞，仲搞到好多店鋪嘅Credit Terms收緊晒。

一般人行腦場，當然唔知依家腦場發生乜毛病。但用一個老闆立場去睇，就估到發生乜事。

1. 由於電腦節做壞晒個市，令到好多product嘅毛利低到淒慘嘅地步，就算唔加租都好難賺到夠皮，如果要租鋪，要養員工，要俾燈油火蠟，每日要有兩千蚊利潤至叫收番本，但你依家一日要賣幾多DVD Writer，砌幾多機都維番個本？更何況近排成班地產商見個市好，勁加租，基本上唔執笠就怪。

2. 電腦節另一個問題係，因為經濟唔好，好多人觀望至買hardware，依家阿水都等電腦節至買嘢，咁平日大部分鋪頭靠乜維持生計？西北風呀。所以我話，依家做腦場零售生意係搵自己笨。

3. 近排RAM價上升，搞到好多鋪頭被人殺個措手不及，而香港應該無乜人會沾手RAM期貨對冲風險，結果壯烈犧牲就唔駛講。

加上，依家腦場班友好唔專業，專業玩家一係有錢半年去一次東京、台北或者首爾掃貨，一係自己用淘寶網嚟入貨（當然同果班中國人傾絕對會激到爆血管），根本唔會考慮去腦場砌機，結果係點大家心照。所以各大腦場只會個景越來越差，唔會越來越好。如果香港電腦商會肯自我毀滅，咁或者會好少少。

小弟對X建聯陳鑑林和黃定光不會這樣算數

獨立媒體：立會論公共廣播 民間團體一致反對 難敵護主心切民建聯

多謝獨媒的報導，小弟當然不會在此算數。

小弟會去信曾鈺成，要求立法會對陳鑑林和黃定光無理舉動作出跟進，小弟好歹是事務委員會的嘉賓，如此受辱成何體統。如果立法會不作處理，下次有惹火議題，小弟一定會去出席Panel會議，但肯定不會如此溫文爾雅。

小弟本來不贊成將香港議會台灣化，但如果X建聯不知自重，小弟認為全民玩膠甚有必要，這幫人根本是侮辱他們自已的身份。

炒咗班食塞米咪有錢搞補選

「林 瑞 麟 ： 政 府 不 會 乘 人 之 危 於 補 選 前 通 過 政 改

2009-11-21 HKT 10:41

政 制 及 內 地 事 務 局 局 長 林 瑞 麟 強 調 ， 政 府 理 解 部 份 泛 民 主 派 議 員 ， 計 劃 透 過 辭 職 後 再 補 選 ， 政 府 不 會 乘 人 之 危 和 偷 步 ， 搶 先 在 補 選 完 成 前 通 過 政 改 方 案 。
林 瑞 麟 出 席 完 一 個 電 台 節 目 後 指 ， 政 府 完 成 三 個 月 政 改 諮 詢 後 ， 會 總 結 意 見 ， 盡 快 在 明 年 內 提 出 修 訂 行 政 長 官 及 立 法 會 產 生 辦 法 ； 而 如 果 有 議 員 辭 職 ， 政 府 亦 會 盡 快 安 排 補 選 。

他 又 說 ， 議 員 有 憲 制 責 任 代 表 市 民 處 理 2012 年 的 選 舉 安 排 ， 如 果 議 員 辭 職 ， 政 府 會 尊 重 ， 但 五 區 補 選 ， 估 計 需 耗 費 1 億 5 千 萬 元 公 帑 。 」

香港政府每年養咁多好似林瑞麟，同埋局長助理果啲廢柴，都用咗成億港紙，你話香港人想要場公投，定係繼續養埋呢班廢柴？林瑞麟如果為咗民主，不如佢辭職，順便率領成棚副局長、局長助理班廢物辭職，咁一定有一億五千萬搞公投，咁大家心情一定好鬼舒暢。

走數司長搵鬼信？

喺商鞅響秦國開始變法之前，商鞅喺咸陽市中心擺咗條木柱，話如果邊條友成功搬走木條，就可以得到豐厚獎金，條木柱唔難移走，不過當時的人都唔信有咁著數的事，後來有條友姑且一試，商鞅又真係磅咗水，之後商鞅推出變法措施果陣，就人人都信政府真係打算咁做而唔會走數。

比較吓唐膠年，大家都知佢依家有幾大鑊。

當司長走數走到咁果陣，如果唔搞五區公投，咁唔通我地都痴心妄想信你啲空頭支票，《警訊》都成日警告大家唔好立亂信騙徒，咁唐膠年係咪正係《警訊》所講果啲騙徒咁？

古人都知搞政治唔好走數的道理，日後係唔係政府同土共亂開支票前，都要佢地同時參與高登式賭博咁？雖然暫時為止，巴貝利先生都好似未找過數，仲要係輪迴幾百年都未找得掂的數。

中國救護車來港執勤屬違法

香港文匯報：內地私營白車在港「執勤」違法
余若薇的提問
港府的回覆
黃世澤：吓，中國救護車跨境執勤？

在兩個月前，小弟喺條街度見到都O晒嘴嘅中國救護車來港執勤問題，喺周三立法會口頭質詢環節終於有明確答覆，周一鑊講明，除咗香港政府，任何人唔可以提供緊急救護服務，喺條街度亮閃頭同埋響警號都係犯法，全部可以拎去罰嘅，政府承諾日後嚴格執法。

《文匯報》當然無良，明明係余若薇提問都唔提，但左報都要報，證明呢件事，連中聯辦班友都認為件事太膠，無辦法當件事隱形，我想問當初話呢架救護車合法嘅五毛黨，係唔係欠緊小弟數咁？佢地係唔係應該俾番個交代，或者向大家認衰咁？我知道discuss成棚膠人覺得無問題，係咪佢地要認吓衰仔咁，唔好搞到小弟好似玩元祐黨人碑咁，將呢啲友仔逐一喺呢度公布嚟恥笑佢地。

小弟要多謝余大狀，認真跟進呢單個案，為市民去除呢個交通心腹大患。但鄭汝樺嘅回覆小弟仍然唔收貨，點解果啲黑玻璃車可以喺香港打橫行，原來國際條約下就可以任由啲車亂嚟，咁仲成世界？睇嚟都要持續跟進。

小弟只係羅便臣道住嘅一介草民，但過去半年，羅便臣道兩件膠事，一件中國救護車入羅便臣道執勤，一件梁美芬個鋪嘅危險招牌，最後都係由小弟出手向傳媒披露，至可以清理問題，我想問半山東個區議員張翼雄律師有無做過嘢。小弟唔係主持《風波裡的茶杯》，更唔係議員政策顧問，呢啲嘢張翼雄應該要做但一啲都唔做，咁呢啲區議員係咪響度浪費公帑，下年選舉半山東選民係咪應該趕佢出去。由佢地互選多五位立法會議員，又會唔會只係選多幾個呢類土共食塞米議員入立法會？要由小弟呢位居民義務清膠，咁我選區議員嚟做乜？