黃雅麗:筍盤
黃明樂:也談港男
小弟故意將這兩名不是港女,年代相若的博客放在一起,當然有小弟的原因。
小弟的總結是,查實男女雙方如果願意放開雙方的視野,是有可能走出港男/港女爭論的困局的。
查實對有內涵的女仔,他們要是什麼,首先不是一隻唯唯諾諾的「狗公」,依家好多貓狗都比隻「狗公」可愛(你見過男人老狗扮cute可愛未?試吓有男仔扮cute自貼,你睇在高登會發生乜事。),要對自己千依百順,屋企隻狗或者貓勝任愉快,不需要男朋友。女仔要男朋友係認同自己,明白自己,但有時候,又真係會諗到計解決問題。所以黃明樂講,男仔過份遷就女仔係送都無人要,就係咁解。要明白對方諗乜,無番咁上下文化修為,係唔會勝任愉快。特別依家嘅女仔讀書多咗,見多識廣係事實,有時候港女誤中二世祖陷阱唔怪得人,因為唔係二世祖在外國浸過洋水,講得下英文,就以為佢地真係掂,但講深入少少就會發現查實佢地在外國讀書果陣,群埋都係唐人,只不過唔係咁多人有能力篤爆佢地。
香港有些「毒男」,完全都唔係做listener,有乜事就只係關房門打機,連對方「主動爆料送上門」都機會放過,這些人一早無得救。黃明樂講果些「過份上進男」,又係一大危險動物,果些唔會追唔到女仔,佢地有不少係被誤以為「筍盤」,只不過,呢種人遇到有大鑊嘢果陣,脫逃走數嘅機會大到飛起。港男成日被人丙,因為連男人都覺得唔似男人嘅脫逃男實在係多。
「再說,你有問過自己,這真是你喜歡的類型嗎?抑或只是隨波逐流?
專業人士的眼光也許很狹隘;他很有錢但他對生活沒熱情。
你選的不應僅是外在條件,而應是那個人本身。」
以上Leona問的問題,查實係唔少港男要拯救自己的答案,當然現今社會好多環境問題,搞到好多男人好乏味(係連我作為男人,都不願與之交往),但查實在有限空間下,仍然可以重燃生活的熱情和情趣,特別係好多二世祖的品味和內涵修養都差到,連小弟都不敢恭維的時候,這就是在執好自己樣貌以外,能夠成功的一條間接路線。港女當然要擺脫港媽教落嘅賣自己思維,去諗清楚,究竟自己要搵個點嘅男人過下半世。正如我都會諗得好清楚,我自己想搵個點嘅人過下半世一樣。連自己想點都未搞清楚,咁你仲話要追人就請你收工吧。
在香港時間3月23日晚上11點,香港電台《講東講西》就係講港男港女,當然由香港電台來操刀,係唔會有TVB新聞部的膠問題,各位可以參詳一下。(今晚不是小弟主持)
http://www.rthk.org.hk/rthk/radio1/Free_as_the_wind/20090323.html