陳克勤32歲，係真唔係呀？

由於我地要推薦驗尿勤做立法會主席，所以我好認真咁研究陳克勤嘅年紀，不過，左算右算，千算萬算，都覺得個陳克勤年紀唔係好妥。

我依家30歲，1978年出生，無留過班，適齡入學（1984年六歲讀小學），1997年入中大讀政政系，2000年畢業。如果係咁，陳克勤至少比我大三歲，邊有可能係1976年出世，至低限度係1975年出世就差唔多。

根據《大學線》訪問資料，陳克勤1994年入中大，1997年畢業，唔係讀四年，即係佢唔係最後一屆暫取生制入學（如果暫取生制入學，應該1993年入讀中文大學），而係中七畢業。《大學線》話佢在漢華中學讀咗十四年，由幼稚園計，咁香港七年中學，六年小學，已經成十三年，就算只讀一年幼稚園，佢都1980年入去讀幼稚園，咁仲唔係至少1975年出世？

大學線：陳克勤，忽然上位

但又出現邏輯不通地方，根據陳克勤父親在2006年接受《壹週刊》訪問，係咁講：

「來在鄉下耕田的陳仲賡，又豈會想到獨子會有一天，在禮賓府返工當煲呔助理呢？陳仲賡攜着妻兒從福建廈門來港時，陳克勤才兩歲。

「七八年來港，第一份工就係做啤膠工人，由朝早五點做到夜晚七點。」陳父陳仲賡娓娓道來。由於太太要到電子廠工作，故陳克勤自三歲起，便送到漢華學校讀書兼託管，直至放工才接回家。克勤自小便在左派搖籃中長大，度過了十六年」

如果陳克勤三歲開始就交到漢華中學，點只在果度讀左十四年呀，唔好同我講，陳克勤勁到四歲讀小學。即係陳克勤在1978年至少已經三歲。

但以我讀金文泰中學的經驗，好多福建出生的學生，唔係持出世紙入學，而係持宣誓紙入學，而且好多時會蓄意報細歲，方便入學，通常報細兩三歲。陳克勤隨時唔係1975年出世，係1972、1973年出世都唔奇。因為入到左校新移民，好少游水落嚟香港，反而好多時係持單程證南來，文革果陣得兩類人持單程證南來，一類係被驅逐出境的印尼華人，佢地持的單程證講明取道香港返印尼。一類係香港有關係的人，陳克勤當屬後者。而1972年開始，係中國發單程證一個小高峰期。

究竟陳克勤幾歲，我估真係隨時做得立法會主席。陳生，你應該當仁不讓公開真實年齡，等你可以名正言順做立法會主席，係咪？