唔派錢俾新移民係合理

呢次財爺派錢，當然背後有唔少膠事等住嚟。但財爺有一點我係同意，就係只有香港永久居民，至可以收到果六千蚊。

新移民己經好多福利，但泛民班左膠有樣嘢嚴重唔知係，政府派錢俾永久居民，係同時俾番福利「香港公民」，即係有投票權，並選擇以香港為家嘅人。新移民並非一個「公民」，點解要派錢俾佢地？

查實真係合理嘅做法，係永久居民唔夠，仲要係近果三年通常居於香港嘅永久居民，至可以獲呢筆錢，一如英國嘅學費，你係英國公民都好，如果最近三年無住喺英國本土，除非出示繳稅證明，否則都要俾海外生學費。呢個限制，今天香港大專學費資助都跟呢個邏輯。只不過近年唔少永久居民回流香港，總之因乜原因都好，佢地返嚟就俾錢佢地喇，費時煩。而「香港公民」在其他地方出世女子女，既然係香港公民，只要成年都幫佢地。（我對新移民，同永久居民在內地所生子女有兩種不同態度，後者都係香港人）

泛民因為佢地嘅大中國情結，己經喺四川地震撥款無做好把關工作，高鐵唔係我地班友迫，我諗民主派隨時放咗水。香港講到尾，少咗個類似英國保守黨嘅政黨，一本堅守香港本位嘅右派政黨。可惜香港無右派，唔係左派論述嘅泛民，就係做咗共產黨走狗嘅資本家政黨，認真無眼睇。

後話：仲有一個概念，連林忌頭先都搞錯三粒星=永久居民，事實唔係咁。

永久居民都可以無三粒星，如果你喺香港仲喺英國管治期間，有權申領回港證，就可以有三粒星，回港證係港英俾華裔人士，以及無法拎到BDTC以外其他國家護照嘅國際人球進出中港，港澳嘅文件。所以有三粒星九成都係華裔，如果你見一個印度人，或者印尼人揸三粒星都正常，因為佢地除咗CI或者BN(O)，乜證件都無。