小弟有啲議題係無論如何都要追斬，其中一個係強積金。小弟寧可抽時間上去立法會panel講嘢都要反對到底。
依家強積金係不知所謂嘅制度，因為強積金可以侷我地俾百分之十入息，但係金融界可以唔駛講績效，蝕錢照收比Private Bank仲要貴嘅management fee，簡直係幫金融界搶我地啲錢，真係好似王弼講，正宗係金融霸權。
正如王弼講，俾錢果班金融界廢柴，不如俾大家供款買盈富基金或者iBond算喇，又無乜管理費，盈富基金嘅績效跟大市浮動。依家政府仲敢提要提高強積金供款最高入息，以後啲搵兩萬蚊左右嘅朋友要供多啲，乜世界？
提示：請將書籤以及友好連結更新到blog.martinoei.com。
我估好多香港人，或者意識到件事唔妥，但未知唔妥程度，可能比呢度預測嘅大劑n倍。
1. 大家應該發現香港突然樓市無咗動力，因為嚟自中國嘅南流資金流得七七八八，因為依家中國好水緊，而外流資金目的地亦唔會係香港。
2. 中國南來資金放緩，但另一個問題更大鑊喺後頭，就係美債default嘅問題，如果奧巴馬無辦法同班打仗打到成身債，自己唔想交稅又走數嘅共和黨人傾掂數，提高美國發債上限，美債就會有違約問題，一有違約問題係好麻煩，特別美債評級下降，呢個係會影響全世界差唔多所有銀行嘅資產質素，屆時真係頭都甩。
3. 但更大鑊問題去番中國，對中國嚟講，依家唔好出現乜大事迫佢硬著陸，但美債違約結果係人民幣先暴升，後暴跌，暴升原因係市場恐慌性拋售美元流入嘅盲毛資金，但暴跌係因為大家發現美元同人民幣掛鈎，中國外匯儲備主要成分係美債。而人民幣暴升會令中國無晒出口競爭力，就係唔硬著陸都唔得。
4. 中國唔係民主國家，硬著陸一係革命，一係又嚟一次八國聯軍被人打扁。所以，小弟近日又睇王力雄嘅《黃禍》就係咁解。
希拉里唔訪華但要見曾蔭權，因為對保障美國利益嚟講重，關於香港內部問題，佢同曾蔭權傾重要過同北京傾。
幾日前，小弟出席獅子山學會一個聚會，果陣時有個問題，好值得大家分享，查實香港打工仔日日喺度返工等放工，日子刻板一如官僚，查實佢地過緊社會主義嘅生活，點解佢地會憎恨佢地根本唔生活緊嘅資本主義。
我今日同時諗到呢一個問題，兩個問題串埋一齊，就大家搵到問題嘅答案。
喺馬來西亞，參與淨選盟示威，好多係小弟呢挺老闆，或者唔少係中產嚟，老闆甚至鼓勵下屬食催淚彈同水炮。點解馬來西亞老闆會支持淨選盟，因為馬來西亞好多人做生意，真係要拼，唔駛拼而做到生意果班係乜人，就係土權政策保護嘅巫統權貴，呢班友係靠官商勾結食飯。所以，越係要自己拼行業嘅老闆同員工，越支持淨選盟嘅主張，因為可以睇到一個真正「公平競爭」嘅大馬。
香港點解咁多好似香港中大校友評議會班腦殘主管，老闆，大家諗吓幾多香港老闆無咗拼搏精神，一味等中國餵生意俾自己，事事好似太監咁奉迎共產黨，你話間公司點可能有拼搏精神，個個口中所講獅子山精神根本唔存在，因為中國一早搞緊「配給資本主義」。
所以喺我眼中，爭取香港自治、爭取香港民主同埋企業精神同一條線，所以打破官商勾結，就係要結束呢種「配給資本主義」，由政治到經濟都係有能者居之。而中國呢個超巨型統戰機器喺度，中國為咗俾香港人食精神鴉片，係唔會俾真正自由經濟存在，相反，只會引導你相信一啲自殺得更快嘅假左翼思想。香港人越自相殘殺，佢地越開心。
所以要解決「地產霸權」呢個由配給資本主義衍生嘅議題，就要重建創業精神。而創業精神，唔係要政府立法保護小店（當然要發番適當小販牌」，而係小店要用一套合符現代規格嘅管理方式，去提升自己嘅生產力，唔好搞到仲係用原始方式管理，唔知自己每日賣咗幾多貨至得。
我諗以下BBC本土嘅節目，對各位有啟發意義
當香港人醒覺到自己生活喺一個「社會主義」環境果陣，就係民主醒覺之時，一如馬來西亞。
「證 監 會 罰 款 新 鴻 基 投 資 450 萬 元
2011-06-21 HKT 12:47
證 監 會 譴 責 新 鴻 基 投 資 服 務 公 司 ， 並 且 罰 款 450 萬 元 ， 原 因 是 在 08 年 5 月 至 8 月 期 間 ， 向 客 戶 銷 售 雷 曼 兄 弟 相 關 股 票 掛 勾 票 據 ( 雷 曼 ELN) 時 有 缺 失 。
證 監 會 早 前 進 行 調 查 ， 發 現 新 鴻 基 投 資 向 客 戶 銷 售 雷 曼 ELN 前 未 有 對 產 品 進 行 足 夠 的 盡 職 審 查 ， 亦 無 向 銷 售 人 員 提 供 足 夠 的 培 訓 及 指 引 ， 令 他 們 充 分 了 解 產 品 的 性 質 、 所 涉 風 險 及 須 確 保 產 品 適 合 客 戶 投 資 的 準 則 ， 以 及 無 向 客 戶 披 露 產 品 條 款 及 所 涉 風 險 等 重 要 資 料 。
證 監 會 提 到 ， 釐 定 罰 則 時 有 考 慮 到 新 鴻 基 投 資 向 客 戶 分 銷 投 資 產 品 的 制 度 有 嚴 重 缺 失 ， 有 必 要 向 市 場 發 出 強 烈 的 阻 嚇 訊 息 。 」
點解只受SFC監管嘅新鴻基投資，喺賣雷曼ELN出術，就要賠償兼罰足四百五十萬，而金管局管啲銀行，就個個唔駛罰，唔怪得班雷曼苦主日日玩轉中環各大銀行分行喇，你陳德霖條友都廢拉柴嚟。
比起啲銀行，新鴻基投資只係中小企嚟，又一次反映香港政府咁幾欺善怕惡。
睇嚟，廣州騷亂唔會咁易收科。雖然話解放軍入城清場，但如果班民工個個玩hit and run，今日A地方搞暴亂，明日B地方搞，結果就係疲於奔命。
由短期角度嚟睇，廣東當地人會支持當局平亂，因為呢啲無差別燒車太得人驚。但長遠嚟講，今次一炮顯出當地公安、武警嘅無能，根本無法捍衛家園。最後結果有兩個，首先，村鎮武裝隊伍會重新出現，命仔攸關，無辦法。另一方面，廣東人會諗呢個政府仲做唔做到嘢，最終可能發展成另一股政治力量。
而樓市短期內，升勢不會停止，因為今次廣州騷亂，一度迫近有錢人住嘅地方，廣東嘅有錢人一定諗如果再爆大鑊去邊度避，香港毫無疑問係佢地嘅選擇。但長遠會唔會保住，如果中國騷亂蔓延香港，香港樓股會齊齊玩完，更加唔好講住人。依家大家明陳雲提嘅香港自治運動，係有考慮到大家嘅資產前途。香港未來資產價格，好視乎香港能否置身事外。
機管局準備籌千二億港紙興建第三條機場跑道，一如高鐵之役，支持政府話第三條跑道對香港經濟有幾重要，有啲反對第三條跑道，就只集中講填海對中華白海豚嘅危害。
當權者虛，你反對班友又同佢玩虛，結果只會係政府贏。而小弟喺博客申明自己對件事嘅立場前，小弟先用呢次離港公幹嘅航拍照片，解釋一下，除咗財務安排，究竟喺呢件事上，仲有乜問題我地係需要面對。或者有乜問題應該討論。呢堆照片，應該可以暫時做住Flight Simulator先。
呢堆照片喺港龍航空KA482往台北班次上拍攝
1.
機場中央係有大空地，供機管局發展，如果香港機場擴展吞吐量，點樣用中央嘅空地，個航站設計應該點。
2. 呢架機係向東北起飛，小弟想像一下第三條跑道可能位置以及相關噪音問題
依家飛法，基本上低空在屯門、深井飛過，但新第三跑道會更加近南屯門同埋深井，咁相關嘅噪音問題應該點處理？好明顯無人討論，亦唔好旨意劉皇叔同僭建聯會關注呢個議題。我諗大家都唔想因為飛機噪音，影響睡眠同晚上煲劇架。
3. 呢架機係飛越港島上空，大家見到飛越葵涌貨櫃碼頭同小西灣嘅景況，而點解會有一條九曲十三彎嘅起飛航道，除咗因香港地型，另一方面，呢個奇怪起飛法同解放軍對香港附近空域採取唔合理限制有關，呢個限制令香港有第三條跑道都得物無所用。
呢啲實際問題，以及一啲產業問題，將會喺呢個博客稍後討論。小弟唔想好似高鐵咁，立法會已經撥咗錢，至知道問題嘅重要性。
剛果政府走數最後走到人大釋法，一單美國公司同剛果政府之間商業糾紛，終院三比二決定提請人大常委釋法。
人大常委係一個無法律概念，只係以中共利益立場做事嘅機構，所以美國基金公司嘅債務，十之八九凶多吉少。但香港想成為乜嘢債券中心，更加唔可能。
大家諗吓，任何非洲呢啲走數成精嘅國家，喺香港定立乜商業合約、財團債務，點知因為同中國政府friend，就可以走數，邊個同你締立合約。結果大家日後同非洲任何有政府背景嘅公司做生意，唔會喺香港發債等等，大家會寧願去美國做，或者其他容許向窮國追數嘅國家。
中國為咗自已可以殖民非洲，咁就犧牲香港，大家明白點解要香港自治嘅原因未？因為係不折不扣嘅做生意原則問題，呢啲屈機政府，你要。
村屋都玩到咁，我更加估唔到西九四小龍面對係點嘅情況。
依家西九四小龍仲未感覺到幾大鑊，因為西九四小龍受惠於南昌站物業地基改動工程，南昌站工程一日未搞掂，都應該未開始又鑽又爆，而元朗果段因為菜園村未搬村，所以依家只能喺荃灣一帶動工先，但結果荃灣五條原居民村有得震無得瞓。
而西九四小龍一帶嘅地質，根據港鐵資料，唔會好似荃灣、葵涌段咁激鋪鋪玩爆破，而係用鑽機鑽地，然後隨即用預製組件建立永久隧道壁，話沉降唔勁咁話。但係條隧道喺西九四小龍下面深盛道三十米挖，會唔會影響大廈地基，小弟木宰羊，而附近地質搞出乜膠出，我都木宰羊。高鐵隧道唔係地鐵隧道，地鐵最好時速一百八十公里飛馳，有幾多鋪搞到又震又爆咁大劑（大家見東涌線、西鐵線南昌一段係露天隧道，大家應該估到果頭啲土質應該極為騎呢）。
所以，趁黃金週水魚多，有水魚願意用好價買，著草走人走為上著，反正大部分人唔知個死字點寫。俾我買樓其中一個原則係，高鐵隧道經過附近範圍嘅樓，諗清楚先買。
「上 海 迪 士 尼 由 中 美 合 組 公 司 負 責 管 理
2011-04-08 HKT 15:52
上 海 迪 士 尼 的 管 理 權 由 中 方 的 申 迪 集 團 和 迪 士 尼 合 組 的 管 理 公 司 負 責 ， 雙 方 分 別 持 有 3 成 和 7 成 股 權 ， 與 香 港 迪 士 尼 由 迪 士 尼 公 司 獨 自 管 理 的 模 式 不 同 。
香 港 迪 士 尼 樂 園 度 假 區 行 政 總 裁 金 民 豪 表 示 ， 兩 地 的 合 作 模 式 不 同 ， 主 要 基 於 兩 地 政 府 不 同 考 慮 ， 由 於 中 方 希 望 學 習 美 方 的 管 理 模 式 ， 所 以 上 海 迪 士 尼 採 用 合 作 管 理 ， 以 加 強 中 美 合 作 。
至 於 香 港 迪 士 尼 第 二 期 擴 建 問 題 ， 金 民 豪 表 示 ， 擴 建 是 必 然 的 事 ， 但 目 前 仍 未 與 政 府 進 行 討 論 ， 現 階 段 他 們 會 先 集 中 處 理 好 第 一 期 擴 建 。」
睇完呢段新聞，小弟不單不驚香港迪士尼無得做，相反，前景大好。
首先，上海迪士尼中美共管嘅結果，就係上海市政府班蠢才官員，一定將上海迪士尼搞成一陀大便一樣，所以上海迪士尼地大都無用，最後一定膠到無朋友。
另一方面，好多中國遊客一定玩番上海果個，而東京迪士尼俾福島果個靠害核電廠咁玩法，有排都好難再有遊客去玩（幾好玩都無用，因為無家長敢帶細路仔去東京一段時間），結果就係未來幾年香港迪士尼應該係亞洲地區獨市生意，只要香港迪士尼把心一橫管住果班中國無禮遊客（我建議趕行為不檢嘅出樂園，反正佢地要玩返上海玩飽佢），小弟相信美國人管理嘅香港迪士尼有機會跑出，所以不如港府快啲將迪士尼好似領匯咁上市套現，如果唔係大亞灣因素，小弟會考慮投資。
又或者用個好價錢，賣俾東京迪士尼嘅經營者都唔錯，甚至由東京迪士尼班人嚟管香港迪士尼，小弟相信會掂。
上海迪士尼，真係一出世就聽執笠，多謝上海市政府班蠢才。
我諗除咗中國呢挺國家，對於要用正常手段集資嘅私營機構，福島事件後要借錢建核電廠，將唔會咁容易。
喺福島意外後，東電嘅中短期CDS就狂升，一度升到成四百幾點子。但長期CDS大致上同日本主權CDS差唔多，因為大家賭東電同日本航空一樣too big to fail，有可能因為賠得太勁，搞到要被日本政府國有化。既然國有化，又點會default（東電股價當然食瀉藥，國有化隨時係黐牆紙收場）。
但係日後有核電嘅公司發債會好頭痕，因為核電係一係無事，一有事就賠到甩褲都唔掂，結果核電安全紀錄，透明度會同債券評級，發債成本掛鈎。好似法國EDF，日本東北電力呢啲用核電無事嘅公司就會影響唔大，但好似中國果堆核電廠，透明度差成咁，你叫投資者點避風險？
咁睇法，電能實業會比中華電力穩陣，因為電能實業寧願承受油同煤波動風險，都唔投資核電（當然亦因為佢持有赫斯基石油，事實上對沖咗風險）。有時大家好憎李氏力場都好，李嘉誠喺風險管控方面有佢一手。
