抵抗白痴老闆嘅干預

繆美詩：會死人的新聞

雖然小弟相信亞視呢鋪玩到咁大鑊，好大程度係老闆王征放料有關，係無關新聞一件事。但當時亞視新聞部，應該有人察覺段料係有問題，而蔡衍明果邊收過新聞部告密信件，指王征條友係咁干預新聞部，所以相信亞視新聞部無理由無人知段料可能係政治操作（雖然我都相信江澤民係死咗）。

但新聞部中人如果遇到不合理干擾應該點做？喺林和立事件後，小弟選擇係劈炮，甚至轉行亦在所不惜，呢個亦係我喺商台封咪事件中，選擇辭去研究員（實際係獨立監察員）一職嘅原因。

呢個世界唔係老闆order大晒，正如廟佳桑拿案，兩條差佬收到上頭order夾口供，都唔可以做免責辯護一樣（呢個亦係警察通例強調係一切合法命令，唔係一切命令）。作為專業人士，如果按自己專業判斷或者常理，知道個order唔妥，就應該考慮抗命。

當然抗命方法好多種，例如德國審東德柏林圍牆守軍果陣，法官質個士兵點解唔射歪啲hea咗佢算數，有無玩膠都係決定可唔可免於罪責嘅標準。但新聞工作好難咁玩，特別電視台隨時老闆做咗總編輯果份，咁可以點，所以可以選擇就係辭職，將件事揚開佢，件膠就由得個老闆慢慢派。

所以商台封咪事件後，小弟再無做全職新聞工作，因為我作為兼職人員，可以隨便抗旨。我知呢家呢個時勢，呢個要求好高，但如果香港新聞專業內形成抗旨係天公地道，啲白痴老闆嘅自我審查同干預無咁猖狂，而相對報館，電視台比較有條件抗旨，因為電視台人才畢竟係唔夠，唔係阿貓阿狗都可以做主播或者電視新聞主管。

廣告

江澤民之死無關新聞

小弟對部分新聞人，我指未做過亞記果啲，話亞記未經查證就將江澤民死訊出街乜乜物物，我感到好感冒。

呢單嘢，簡單嚟講，無關新聞。

除咗亞記，日本《產經新聞》出號外報江澤民死訊，但無論新華社出果段用垃圾英文寫出嚟電訊稿，定係中聯辦狂炳亞記，《產經新聞》就係唔撤回報導。日本仔做新聞，特別呢類新聞嘅查證功夫嚴謹過香港n倍，大家都知日本仔喺情報力上嘅有名程度。

正如我昨天所講，江澤民嘅死報唔報，對王征嘅考慮根本唔係新聞專業，有記者講新聞專業，堅持要查一輪嘅話，我可以講，王征會即刻炒呢啲記者，因為王征擺明攞個台嚟做政治鬥爭工具，江澤民嘅死係堅料咁又點？撒唔撤回報導，完全視乎王征同佢幕後老闆嘅政治需要。

所以如果我係亞記新聞部嘅人，會轉工甚至轉行，因為喺香港做新聞實在太危險，今次要食咁大隻死貓，唔會死人嘅，王征亦唔會炒人，但係如果權鬥白熱化，下鋪隨時可能以性命相搏，但係你樓上嘅老闆根本攞你條命嚟做賭注，己經變成一個黐線行業。而好多香港人，連部分新聞人都無呢個政治覺悟，好得人驚。

但呢件事上，我企喺亞記新聞部呢邊，亞記新聞部無需要，亦無理由認錯或撤回報導。記協應該協助亞記記者取回公道，梁家榮、譚衛兒果啲無所謂啫，下面中下層果啲記者、主播仲要出嚟行。

港台駛唔駛玩到咁？

明報：梁思浩拒留港台即時炒魷

由於大班個新台（香港數碼廣播有限公司）嘅出現，己經搞到香港廣播界風起雲湧，天下大亂。

據小弟所知，因為同DBC有聯繫而搞到即刻喺港台封咪，己經唔只梁思浩，5月13日講東講西原定係黎則奮同李特講國民教育，結果因為黎則奮己經係香港數碼廣播有限公司嘅員工，一台台長即刻stop咗佢唔俾再講。只不過Q仔係香港電台Cat III外判合約主持人，同港台係無員工關係，咁都stop都有啲奇。因為喺英國，一般只有ITV唔俾員工上BBC，未聽過BBC唔俾上ITV，有時仲出奇到BBC買ITV節目返嚟都得（否則唔會有UK Gold出現，同埋BBC America播唔少ITV嘅節目）。只不過黎則奮己經係DBC全職員工，咁港台唔係完全無道理。

但係梁思浩連入DBC未都唔知就監人續約，咁就超有問題，我唔知梁思浩同港台簽乜嘢合約，係公務員、非公務員、定係Cat II、定係Cat III外判商，全部唔知，只不過香港電台只要係政府部門，咁玩法隨時會招惹司法覆核，因為梁思浩一日未簽約，佢唔係DBC人，就唔可以講違反僱傭合約，如果Cat II，Cat III合約本身更可以俾主持人做埋商營廣播機構，否則都唔會譚志強有時會出現商台光明頂。咁樣玩法，商營廣播機構如果按合約賠足水可能都算，但香港電台係政府部門要守行政機構規矩，佢地無理由唔知咁樣可能玩出事。

如果Cat III約咁監人開工仲衰，因為好多依家電視部或電台部嘅人，揸係Cat II或者Cat III合約，至少小弟唔少朋友都係，咁樣會出現好大法律疑問，如果同時幫其他電台或者電視台做節目，會唔會玩到港台節目都無埋。我揸住果份RTHK 33表格嘅物體，暫時就睇唔到同時做DBC同RTHK，或者同時做CRHK同RTHK，同RTHK嘅合約撞，只不過大家實有疑問。

我諗，港台係唔係有啲人諗多咗？依家大班真係要多謝港台班友，送免費宣傳俾佢，真係益咗佢，唔知好嬲定好笑。

利益申報：小弟做過大班嘅政策顧問，但依家同DBC乜關係都無。而RTHK，小弟係節目顧問團成員，亦因主持講東講西，揸住Radio Division Radio 1嘅Cat III合約。

山寨公共廣播

BBC海外電視英語廣播用嘅Countdown

中國中央電視台新聞頻道嘅Countdown

亞視點解揀BBC嚟抄，因為中央電視台自己就係抄BBC Countdown，連埋最後幾秒嘅報時聲都抄埋。

BBC係一個比較過癮嘅電視台，一啲電台殘留嘅習慣留咗喺電視，當中包括經典嘅報時訊號，電視理論上係唔需要報時訊號。中央電視台無BBC本身由電台變成電台兼電視台嘅歷史，所以留埋報時訊號，仲唔抄襲抄到阿水都知。所以BBC World News Countdown最後一幕出現，係北京天安門廣場，明寸中國。

我想問，中央電視台班友知唔知醜字點寫？

後話：喺咁多新聞台中，用theme music做得好，除咗BBC，就係半島電視台英文，當然亦都同半島電視台英文好多人都本來嚟自BBC有關，所以半島電視台英文用嘅口音，都係英國口音。

亞視，你好膠

亞視新聞部呢鑊，真係膠到一個我唔識形容嘅地步。

BBC News 同BBC World嘅Countdown, Opening全部都做得好靚，好出名，差不多係大英子民其中一樣感到最威水嘅嘢。而網民好多亦有一啲，自已認為做得正過BBC本身嘅仿製版本，Youtube好多，多到嘔。

但係BBC或者BBC仿製產品果種英國味好容易睇到，而依家更大問題係，香港好多人，包括唔少高登人，唔係住喺英國本土，就係依家喺世界各地日日睇緊BBC，結果一眼就認到出嚟，仲要通知埋原作者，結果真係膠到我都唔識形容。

網友整嘅仿製品都抄，唔該俾番錢人，依家亞視用番舊版算數，真係除咗膠我唔識點講。

由東日本毀滅論看香港傳媒

吳偉明：東日本毀滅論？!

俾我係吳教授都火滾，將明明政府內部嘅預計，當成真嘅新聞嚟報。

1. 作為一個負責任政府，東日本全毀可能性就算得1%，政府都要做沙盤推演，以防萬一。係得中國人嘅政府，甚至部分膠到無朋友嘅中國人，以至香港中年硬膠，對呢啲1%或然率情況，認為唔需要有任何防範，否則都唔會香港十年都無一次大亞灣意外演習。應付一啲uncertain嘅問題，要有相對方案，呢個係菅直人嘅工作。

2. 香港傳媒嘅標題，亦明顯將東日本全毀，同日本遷都，包括重心西移可能性搞混。呢次事故可能唔會搞到關東各地唔住人，問題係好似今日嘅報導，福島縣嘅牛奶、茨城縣嘅蔬菜受輻射污染唔賣得，東京個糧倉出事至係問題。東京人口咁密集，唔通乜嘢物資都由關西、九州完全支援？呢個問題，係日本人需要思考嘅問題，但唔係誇張到東日本全毀。東日本依然存在，但有無能力負擔以往咁大的角色係另一個問題。日本可能遷都唔會係呢一兩個月嘅事，但等到福島事態解決之後，最後查過搞出幾大嘅大頭佛，呢個問題實被人拎出嚟討論。

傳媒報導加鹽加醋嘅問題，同盲搶鹽嘅問題基本上來源一樣。呢個OS問題，認真頭赤。

河蟹入侵香港

呢個簡直係警號，河蟹入侵香港電視呀﹖亞視玩河蟹玩成咁，去廣管局投訴佢算喇。