Daily Archives: 六月 17, 2011

你膠我都膠

6月18日政制事務委員會議程

自從大家知道立法會Panel係硬膠遊樂場後,泛民唔駛動員都會有班友衝出嚟講嘢,結果搞到咁嘅局面。

當然,以下組織擺明係要大家食花生,例如:

(15) 蛇齋餅社團聯會

(31) 十九行動

(36) 林D9寶貝搜尋小組 (擺明話某人係太監)

(85) 高官心肺功能絕頂關注組

(118) 香港絕望 (上次港鐵加價一役寸到政府一棟都無)

明日立法會花生無限,睇嚟可以推車花生過去賣。

5 則迴響

Filed under 香港政治

做右派就不要藝術與保育?

小弟不單只國籍身份曾經四不像,論好多事情嘅立場,喺香港嚟講,都可能係四不像,我係右派自由經濟支持者,但注重歷史保育,反對拆天星皇后,亦會關心樹木保育呢啲問題。而喺香港呢個地方,小弟知音唔多。我成日都認為,係唔係我有矛盾?

但我睇完許文龍回憶錄後,我覺得,香港無論左派定右派,都有佢地嘅誤區,許文龍嘅經驗,或者對香港人有所啟發。

首先,右派絕對唔係反對環保、藝術呢啲理念,許文龍佢搞樹木保育,佢收藏小提琴借俾人,佢為台南做嘅事情極多,包括將差唔多執笠省立逢甲醫院接手經營,變成一個有錢賺,但可以兼顧貧弱嘅醫學中心。佢支持年青人衝出去搞學運,幫佢寫回憶錄就係林佳龍,民進黨人嚟。點樣同大自然共處,點樣追求美和善,仍然係右派嘅課題,如果只係睇錢,我只可能講佢真係窮得只剩低錢,許文龍大部分時間係去搞呢啲文化保育。

但係,右派同左派唔同地方在於,我地注重環保、弱勢社群,文化等等,但政府唔好立亂叉隻腳埋嚟,唔該。我地民間自己做,係絕對比政府東管西管有效率一百倍,呢個至係右派其中一個真義。教育唔該你俾番我地選擇權,按收入不同派出學券,俾窮人可以讀最好嘅私立學校,但富人讀政府學校都唔該用者自付。醫療唔該自由化,政府唔好搞咁多。而賭博、色情事業合法化,呢啲係人性嚟,政府全力打擊非法槍械同毒品。

今日右派好多時被人鬧,因為好多時右派以為追求GDP,可以唔理環保、文化、弱勢社群,我地有無顯出我地嘅關心?而左派之所以硬膠,因為佢地啲方法個個都係玩人,最低工資係最好例子。而香港啲有錢人無內涵無思想嘅程度,唉,我都唔想睇。

如果香港啲有錢佬肯學許文龍,邊度嚟仇富情緒。

後話:許文龍無乜點讀過書,但點解香港啲有錢佬搞成咁,許文龍唔係,許文龍係日治時期成長,而香港啲有錢佬係五六十年代由中國走出嚟,分別可能喺呢度。所以佢親日,我理解,正如我親英一樣。

3 則迴響

Filed under 香港政治

Openrice變咗做Redrice?

Openrice請人睇建黨偉業

好多中國人睇《建黨偉業》當曲線片嚟睇,例如觀眾集體跟住片中人狂嗌民主口號,或者玩到個斧頭黨海報謝(大家睇過周星馳《功夫》就知件事幾膠,周星馳好嘢)。

但鍾偉民,一定唔係想大家搞革命囉。

iProA 2010-2012年執委名單

Digital Content & New Media
Chairman Mr. Edmund Lee
Vice-Chairman Mr. Rickie Wong
Mr. Patrick Ko
Members Mr. Ray Chung
Mr. Roger Yu
Mr. Joseph Lam

Ray Chung就係Openrice老闆

所以我唔用Openrice,做過iProA執委,當然知道某啲人嘅為人。我諗,呢鋪真係做得太核突。

3 則迴響

Filed under 香港政治

社會有病

呢兩日睇facebook,睇到好不安,果種不安係因為,成個社會嘅是非判斷標準出現好大問題,甚至中國人果種欺善怕惡出晒嚟,非常之頂唔順,唔寫唔得。

1. 喺中環警長墮橋案裡面,我唔會認為雞苗男一啲責任都無。但facebook裡面,唔少傳媒人,以至高登有啲人,一路咬住雞苗男唔放,我覺得好火滾。警長墮橋係不幸,但馬頭圍道四屍五命呢,點解無人講嘅?果單似係明顯縱火案,但警察竟然唔開file查,五條沉冤待雪嘅命,就咁算?

2. 中環墮橋案,相信單案比大家想像中複雜好多,真係用嚟拍Law & Order仲得,因為涉及呢幾樣嘢
a. 墮橋警長是否做緊程序要求緊佢做嘅嘢
b. 警察電台有無落錯order,或落亂order
c. 當時談判專家,消防以及其他警員之間嘅協調
d. 上橋請願人士嘅精神狀態,包括係咪有精神科疾病,呢個要感化官同精神報告
e. 警方有無遵照應有職業安全標準

咁多技術性問題,成班友咁快做判斷,曾偉雄仲要敢抽水,你班友又聽姓曾嘅點?乜事呀?

6 則迴響

Filed under 香港政治