Daily Archives: 五月 13, 2011

港台駛唔駛玩到咁?

明報:梁思浩拒留港台即時炒魷

由於大班個新台(香港數碼廣播有限公司)嘅出現,己經搞到香港廣播界風起雲湧,天下大亂。

據小弟所知,因為同DBC有聯繫而搞到即刻喺港台封咪,己經唔只梁思浩,5月13日講東講西原定係黎則奮同李特講國民教育,結果因為黎則奮己經係香港數碼廣播有限公司嘅員工,一台台長即刻stop咗佢唔俾再講。只不過Q仔係香港電台Cat III外判合約主持人,同港台係無員工關係,咁都stop都有啲奇。因為喺英國,一般只有ITV唔俾員工上BBC,未聽過BBC唔俾上ITV,有時仲出奇到BBC買ITV節目返嚟都得(否則唔會有UK Gold出現,同埋BBC America播唔少ITV嘅節目)。只不過黎則奮己經係DBC全職員工,咁港台唔係完全無道理。

但係梁思浩連入DBC未都唔知就監人續約,咁就超有問題,我唔知梁思浩同港台簽乜嘢合約,係公務員、非公務員、定係Cat II、定係Cat III外判商,全部唔知,只不過香港電台只要係政府部門,咁玩法隨時會招惹司法覆核,因為梁思浩一日未簽約,佢唔係DBC人,就唔可以講違反僱傭合約,如果Cat II,Cat III合約本身更可以俾主持人做埋商營廣播機構,否則都唔會譚志強有時會出現商台光明頂。咁樣玩法,商營廣播機構如果按合約賠足水可能都算,但香港電台係政府部門要守行政機構規矩,佢地無理由唔知咁樣可能玩出事。

如果Cat III約咁監人開工仲衰,因為好多依家電視部或電台部嘅人,揸係Cat II或者Cat III合約,至少小弟唔少朋友都係,咁樣會出現好大法律疑問,如果同時幫其他電台或者電視台做節目,會唔會玩到港台節目都無埋。我揸住果份RTHK 33表格嘅物體,暫時就睇唔到同時做DBC同RTHK,或者同時做CRHK同RTHK,同RTHK嘅合約撞,只不過大家實有疑問。

我諗,港台係唔係有啲人諗多咗?依家大班真係要多謝港台班友,送免費宣傳俾佢,真係益咗佢,唔知好嬲定好笑。

利益申報:小弟做過大班嘅政策顧問,但依家同DBC乜關係都無。而RTHK,小弟係節目顧問團成員,亦因主持講東講西,揸住Radio Division Radio 1嘅Cat III合約。

5 則迴響

Filed under 香港政治, 傳媒

陳鑑林挑戰禮義廉新極限

陳 鑑 林 稱 不 會 主 動 清 拆 村 屋 加 建 物  

2011-05-13 HKT 18:13

民 建 聯 立 法 會 議 員 陳 鑑 林 在 沙 田 坳 道 的 村 屋 , 加 建 了 玻 璃 屋 及 門 前 花 圃 , 他 否 認 知 法 犯 法 , 強 調 政 府 多 年 來 也 對 這 種 情 況 「 有 默 契 」 , 他 不 會 主 動 清 拆 。
陳 鑑 林 又 因 裝 修 , 將 雜 物 存 入 貨 櫃 放 在 村 口 , 涉 霸 佔 官 地 約 半 年 , 地 政 總 署 警 告 信 的 限 期 已 過 , 至 今 仍 未 清 理 。

呢啲唔叫知法犯法係乜,依家陳鑑林點只知法犯法,更加係目無王法,當香港法例係死嘅一樣。

所以話民建聯無恥無極限,陳鑑林示範乜嘢叫禮義廉。不過小弟都要引用車公今年標籤告誡嘅嘢:恃勢凌人,缺德不改,其所擁有,必被取代。

大家今年選舉,識做。

6 則迴響

Filed under 香港政治

首個出現喺集選區嘅政黨輪替

海峽時報:工人黨接管阿裕尼市鎮理事會辦公室

新加坡做國會議員,唔係只喺議會齋talk咁簡單,而係有一定行政權力,當中包括接管成個選區嘅地方行政事務,件事由Town Council,即係市鎮理事會做,而市鎮理事會嘅人,全部都係果區嘅國會議員指派。所以行動黨會唔會阻止工人黨接管阿裕尼市鎮理事會,正係反映新加坡會否達致政黨輪替嘅指標。

而今日新加坡政府嘅態度,可以睇到行動黨己經唔係廿年前果個行動黨,依家係有準備政黨輪替。日後市鎮理事會交接,將唔會引發政治爭拗。

工人黨會以後港市鎮理事會,同埋阿裕尼市鎮理事會作為練兵場,好似林瑞蓮做緊非選區議員果陣,同時係後港市鎮理事會委員,小弟相信工人黨接受兩個非選區議席,並且全部派年青人去接嘅原因,都係要利用嚟練兵,佢地入晒後港或阿裕尼市鎮理事會完全唔出奇。

後話:呢個世界最吊詭係,當年唔俾劉程強用嘅後港市鎮理事會舊址,正係今日阿裕尼市鎮理事會嘅所在,劉程強不單一統後港,而且好似還返啲佢當年應得嘅嘢咁。

發表留言

Filed under 南洋政治

你陳鑑林今鋪就真係「曲機」

你今鋪就唔曲機就奇,你條友身為立法會議員,唔係應該守法嘅咩,僭建加霸用官地,犯呢啲法同言論自由無關,就係知法犯法,而且搏政府官員見你係建制派立法會議員唔敢郁你,咁樣仲成世界,呢度係中國呀?

你曲機,我O嘴,只不過呢,陳鑑林呢啲咁嘅垃圾議員,都應該要用選票踢走。講真,上鋪梁美芬羅便臣道招牌事件,梁美芬態度好你十萬八千倍,至少人地果度唔係自住,你條友自住地方都擺明僭建,惡到你呢。

延伸閱讀:黃世澤:請尊貴的梁議員得閒派人拆咗個招牌佢

8 則迴響

Filed under 香港政治