Daily Archives: 五月 8, 2011

蘇格蘭獨立與英籍平權

由於蘇格蘭國民黨嘅歷史性勝利,2014至2015年應該會有蘇獨公投,然後2016年獨立。咁唔少人會問,BN(O)對英籍平權有無影響。

小弟或者咁講,蘇格蘭獨立將會令BN(O)平權出現曙光。

SNP同保守黨喺移民問題上,係南轅北轍嘅主張,正當英格蘭各黨要限制移民果陣,蘇格蘭就話你有蘇格蘭住過或打算住蘇格蘭就同你加分。因為蘇格蘭根本唔夠人口,對蘇格蘭嚟講,如果要獨立,就唔可以好多服務同人才依賴英格蘭班友,自給自足係必須充實人口。

而香港同蘇格蘭嘅淵源,包括經濟、文化、社會政策等等嘅淵源,有可能談判蘇格蘭獨立時,會一併讓BN(O)作出選擇,至少現居蘇格蘭嘅BN(O)可能會就地獲得新國家公民權。而唔喺蘇格蘭嘅,亦可能會容許作出登記。因為有歐洲幫手吸收部分BN(O),加上唔少bN(O)有加籍或者澳籍後,有關人士及子弟可能唔係真係咁大數目。而蘇格蘭作為一個獨立國家嘅胃口,同作為聯合王國一部分嘅胃口,係唔同嘅考慮。而蘇格蘭人口老化,香港年青BN(O)相對有吸引力,而且又講到英文。

但對英格蘭嚟講,亦可能會提供平權選擇,因為英格蘭無咗蘇格蘭後,無咗蘇格蘭天然資源提供的經濟動力,無咗蘇格蘭咁大批可以抽稅嘅人口同埋資源唔係講笑。當然提供平權機會無蘇格蘭咁大,但如果要求海外BN(O)交稅,咁可以又作別論。但蘇格蘭本身提供bN(O)登記入籍誘因唔細,特別咁樣會令蘇格蘭有一個海外據點。

所以我話我心中嘅平權時間表喺幾時發生,有兩個時間點,一係蘇格蘭公投前後,一係中國爆大鑊,計時炸彈條款有可能啟動。但蘇格蘭公投後新國家前途問題,相信好快會進入討論。

12 則迴響

Filed under 英國與歐洲

新加坡選舉一啲後話

講啲令人擔心嘅嘢前,講啲膠嘢先

昨晚,所有新加坡人喺電視都睇住呢條友公布結果,呢條友造型極富懷舊味道,加上啲英文會令人諗起驅風油廣告,結果搞到新加坡人同佢設Facebook專頁,Remix成Rap歌。相信呢條友,好快成為cult片文化嘅一部分。大家依家明,點解鄭赤琰講南洋政治搞到好似講搞笑騷咁,南洋真係有啲你估唔到嘅膠嘢。

跟手,講啲令人擔心嘅嘢。

年青詹時中支持者,喺波東巴西街頭抗議

大批波東巴西居民聯署要求重選

其中一個危機爆發,將會係波東巴西。因為計埋海外選票後,詹時中老婆輸司徒宇斌唔夠一百票,但有成二百幾票受爭議廢票,依家搞到波東巴西分成兩個敵對陣營,挺詹派同PAP支持者,處理不當兩邊都唔服氣係會出事。

所以可能最好嘅解決方法,就係波東巴西重選,再決高下睇吓點。

另一個問題出咗喺陳佩玲,依家連部分PAP人都支持取消陳佩玲資格,因為喺集選區體制下,楊榮文輸咗,但陳佩玲入國會,好明顯超越好多人嘅忍受範圍。

我諗陳佩玲問題,係另一個行動黨要解決嘅問題,南洋人唔係大家想像中咁馴,喺大馬新加坡反風互相影響下,會出一啲事。

4 則迴響

Filed under 南洋政治

中國用戶在維基英文搞破壞

http://en.wikipedia.org/wiki/Special:Contributions/SchmuckyTheCat

在維基中文,書生一幫人不斷消滅同香港文化有關嘅條目後,中國派嚟嘅友仔越嚟越狼,玩到去英文維基。任何涉及Hong Konger或者香港自身身份嘅提述,一律唔係俾佢刪,就係改成Hong Kong Chinese,用嚟彰顯中國對香港嘅佔領。

呢啲友仔唔可以縱容,大家就衝入去英文維基,同佢啲Vandalism編輯全部撥亂反正。咁落去,邊個想同你中國統一。

6 則迴響

Filed under 香港政治

對新加坡大選的最仔細分析

新加坡hardware zone網民對新加坡大選嘅數據分析

喺互聯網世代,一個類似邊荒傳說裡面嘅邊荒集嘅地方,往往有最斤兩十足嘅政治評論,香港有高登,新加坡有Hardware Zone。

呢位擺明車馬係周秀娜粉絲嘅巴打,作出咗非常學院派嘅統計同數據分析,小弟懷疑此君係讀政治科班出身,但他嘅文章充分解釋咗點解劉程強領導嘅工人黨可以打破集選區嘅詛咒,包括將宏茂橋集選區當成練兵場嘅策略運用,劉程強嘅打法可以咁講,已經係英式政黨嘅打法,並睇到劉程強係用番集選區制度轉頭嚟壯大工人黨,呢個就係佢同詹時中嘅分別。

呢篇值得反保皇黨嘅有心人參考,呢啲就叫分析。

後話:Hardware Zone同高登唔同之處,高登係一個叫Dr. Jim嘅偉人唔知點解搞得出嚟嘅奇異地方,但Hardware Zone係新加坡報業控股旗下。而選舉刊登得最多挺劉程強言論亦係新加坡報業控股旗下聯合早報,新加坡報業控股喺新加坡民主化上扮演嘅角色,將係好有趣嘅課題。

2 則迴響

Filed under 南洋政治

蘇獨公投,如箭在弦

喺大家密切留意緊新加坡大選果陣,有件影響我國政治嘅事件正悄悄發展,就係蘇格蘭國民黨喺蘇格蘭國會選舉取得過半數議席,可以獨自執政,換言之即將會出現蘇獨公投,而我國中央政府嘅蘇格蘭事務大臣亦表明,佢地唔會阻止公投,只會喺公投發生果陣爭取反對票。

呢次蘇格蘭國民黨可以過半數,因自由民主黨失血太多有關,喺蘇格蘭政治嚟講,蘇格蘭國民黨一向將精銳擺晒喺蘇格蘭國會,而保守黨自戴卓爾夫人之後已經無影響力,自由民由黨同埋工黨共同守住代表統一嘅勢力。

但係聯合政府為救銀行狂削福利開支後,好多蘇格蘭人失望,認為倫敦班友個個都唔可靠,所以啲票唔係流咗入工黨,而係流咗入蘇格蘭國民黨。所以工黨一樣輸議席輸到甩褲,儘管佢地輸票上唔係咁多。

當主流三黨都唔夠蘇格蘭國民黨砌,而保守黨唔想再玩出hung parliament,亦唔會太全力阻止蘇獨發生時,小弟相信蘇獨係阻止唔到。

6 則迴響

Filed under 英國與歐洲