Daily Archives: 五月 5, 2011

決戰新加坡東岸

2011年新加坡國會大選,唔係平日嘅沉悶,不單除咗丹絨巴葛集選區,其餘各區都全面開戰外。而新加坡東岸六個選區的大混戰,亦可能改變新加坡政治格局。

大混戰六個區由兩個單議席選區(後港、波東巴西),以及四個集選區(阿裕尼、馬林百列、碧山大巴窰、東海岸)組成。

本來大家焦點在阿裕尼-後港之戰,因為劉程強決定領軍攻打阿裕尼,決定賭一鋪,成為成場戰事重心,如果後港同埋鄰近的阿裕尼都一併勝出,工人黨差不多在東海岸地盤穩固。而原本行動黨嘅算盤,就係全軍集中火力捍衛阿裕尼。

只不過,詹時中同埋Nicole Seah,將行動黨的美妙算盤完全打破。如果全部有人選,但全部弱軍就小事。但馬林百列集選區嚴重出狀況,我喺新加坡嘅狗衝政治都講過,PAP出件敗家女嚟選,而國民團結黨本來有謝鏡豐,依家又出一件Nicole Seah,Nicole Seah又有政治天分,結果馬林百列完全陷入苦戰。如果話楊榮文唔輸得,好明顯吳作棟資政輸咗仲大鑊,行動黨無辦法完全將兵力集中在阿裕尼作戰。

而另一出狀況係詹時中孤注一擲攻碧山大巴窰,因為詹時中好大機會最後一戰,他決定走出波東巴西,帶領人民黨子弟兵向鄰近碧山大巴窰進發,畢竟劉程強敢打集選區詹時中唔肯,人民黨就乜地位都無。本來馬林百列無出狀況無所謂,但馬林百列打出意外,碧山大巴窰根本無人防守。而同樣,東海岸集選區,本身鄰近後港同埋阿裕尼,好易受影響。結果行動黨光應付新加坡東岸一堆選區己經好唔得閒。

所以呢次新加坡大選賽果難料,因為行動黨要照顧太多戰區,而太耐無打硬仗,個個都打到生銹,而新加坡人民嘅怨氣又一次過因樓價、水浸等問題湧出來,今日係冷靜期,但冷靜期內反對黨支持者一般比執政黨活躍,隨時陰溝裡翻船。行動黨可以繼續執政,但如果當反對黨係流嘅,似乎亦無乜可能。

7 則迴響

Filed under 南洋政治

二話不說,反對國民教育科

黃世澤:中國洗香港腦(台灣自由時報)

小弟對教育局推出德育及國民教育科嘅回應好簡單,就係響台灣自由時報發炮,你咁鍾意玩膠,我就同你境外作戰。

依家香港好明顯擺明被中國生吞,台灣無理由重演香港嘅歷史,所以我作為香港人嘅責任好簡單,你喺香港玩乜膠,我就如實話俾台灣人聽。教育局當香港人係傻架,近年果啲新津貼學校,有幾多係果啲紅色親共左校呀?臻美學校俾福建中學都唔俾基督教團體,擴張地盤個企圖都好清楚喇。

而所謂國民教育,根本就係洗腦課程,否則點會強調要唱國歌,認識國情物物乜乜。明目張瞻到咁果陣,唯有出手。

10 則迴響

Filed under 香港政治, 中國政治