君主立憲、親英與香港

今日我國大婚,喺香港引出好多人都估唔到嘅親英浪潮,由facebook到討論區,本土出生嘅親英言論,到成堆五毛慘要浮上水。

小弟毫不諱言,小弟唔單只親英,仲支持英國君主立憲制度(我個人簡介畫公仔畫出腸),小弟贊成保留皇室。對親英嘅理由,對支持皇室嘅理由,小弟一一講述吓。

1. 先講君主立憲,好多人以為我國皇室係好浪費公帑。至少比起其他歐洲皇室,我國皇室睇嚟比較鋪張(緊隨其後係漢字系國家日本,但日本天皇制度廢咗仲大鑊,亦唔會有人贊成廢咗佢)。但講真,你就算廢咗皇室,白金漢宮嘅維護、保育,亦即係皇室開支嘅最大部分,你共和制都要俾,但俾咗保育開支,除咗白金漢宮可以好似奧地利維也納個舊皇宮 ,可以用嚟俾平民舉行婚禮,以及有歷史保育作用外,仲有乜作用。但你俾多少少娛樂等駛費(英女皇自己另有財產,同公家條數分開),就有埋憲制、外交、文化產業等功能。而且成筆費用,其他共同擁戴我國國君做君主嘅國家,一蚊都無俾。四千萬英鎊皇室駛費,平均每人一英鎊都唔夠。咁今次婚禮就算加埋警力等駛費,可能多咗一筆,但係喺我國經濟起嘅刺激作用,己經值回票價,你諗吓BBC收幾多轉播費?呢筆費用唔係皇室,係BBC Worldwide袋。

2. 喺君主立憲制國家嘅議會,首相係可以隨便鬧,日本枝野幸男以往搶預算委員會主席張紙嘅膠嘢,大家都有眼見。其中一個原因,因為首相係國王嘅僕人,咁你班平民點郁佢都唔會有辱國體。香港以往係總督等同女皇,所以大家唔適合喺議會郁總督,但如果行政長官繼承唔係總督權力,而係總督權力喺香港轉到政務司司長(布政司),然後大家喺議會郁佢就隨便好多。君主立憲,就好好咁解決國家主權象徵嘅尊嚴,同人民對政府不滿兩者平衡嘅問題。日本嘅首相,成日都「用完即棄」,就係天皇永遠都係佢,但征夷大將軍唔掂就可以炒。

3. 仲有,人類始終需要童話,我國本土對大婚都未必美國重視,好多追捧我國皇室熱潮,一方面同其他共同擁戴我國國王嘅國家,例如加拿大、澳洲有關,另一方面,君主立憲保留童話果種夢,呢個亦係唔少歐洲國家由共和走向君主立憲嘅原因。尼德蘭(荷蘭)係由民國變王國,同樣嘅,西班牙亦係共和體制走回君主體制,但得以實現民主。

4. 國王存在,亦令流血革命或政變難以發生,因為軍人效忠係國王,如果國王決意捍衛民主,政變就消弭於無形。西班牙就係,西班牙嘅民主英雄係國王卡洛斯,呢位王子由佛朗哥手上取回權力登位後,就實行君主立憲,左派得以透過選舉上台。之後長槍黨人一度兵變,但國王出來勸說後,長槍黨人根本無法叛君,民主得以不用流血保持。歐洲好多「社會主義」國家嘅理念,甚至同皇室息息相關,最典型係瑞典。瑞典式社會主義,同皇室係互為表裡,所以歐陸好少左派膠到公然反對君主立憲。呢樣嘢,好多時我國同澳洲共和派,甚至香港一啲社運分子都諗到唔湯唔水。

5. 小弟親英,當然同香港有關,但亦同家庭背景有關。小弟祖母一系屬海峽殖民地檳城人,檳城、馬六甲、新加坡華人不少被稱為皇家華人,因為他們一般效忠英國。而他們效忠英廷嘅原因,因為南洋華人,清政府視為叛逆,亦不予保護或承認。不少人因英國人提攜受良好教育,受到尊重,最典型例子,就係精通西學嘅一代怪人辜鴻銘,辜鴻銘以中華文化傳播者自居,但佢一直備受西方尊重,因為西方人當佢同路人看待,所以唔少南洋華人係親英。

6. 對華裔印尼人嚟講,當你嘅家鄉印尼當年排擠你,中國為咗政治理由,用完你,之後想鑿你嘅錢,然後又唔認你果陣,咁我國管治下嘅香港,收留咗我,仲俾我讀書,成長,咁你會親邊個國家。對於出賣過我嘅中國,我無效忠嘅理由。印尼撥亂反正都好,但我生喺英屬香港,所以我認印尼為鄉,但英國為自己國家。神舟五號事件裡面,《大公報》丙我相對輕力,除咗因為我係small potato,另一方面,佢地自己清楚,中共欠華裔印尼人果筆債,還足九世都還唔完。南洋華人身份問題被中共搞到一鑊粥咁,甚至不少人因你中共搞屎搞尿家破人亡,你老共有面目面對我地南洋華人咩?

7. 對唔少因逃避共黨暴政而嚟到香港嘅華裔及後代,佢地忠於英國(我國)絕對有理由,邊個俾佢自由土地,可以發揮所長。如果唔係當年老共阻止,楊慕琦計劃搞唔成,香港己經同直布羅陀咁喇,有殖民地之名,但行自治領之實。仲會有乜嘢BNO、英籍平權等膠事乎?所以小弟對中國果種反感,係有歷史因由。

對於果啲五毛黨,我只會覺得為咗五毫子出賣靈魂,真係只能用個賤字嚟形容。

12 則迴響

Filed under 英國與歐洲

12 responses to “君主立憲、親英與香港

  1. S

    Was it appropriate for HM Government not to invite (or by whatever means) the HK Government to take part in the celebrations or to submit any gift?

  2. martinoei 黃世澤

    現時這個香港政府不代表我們,不請好過請,請了英籍港人更反感。

  3. TC

    你第四點,正係我支持保留英國王室,況且英國王室表演都OK。

    如果英國王室都叫表現差,中共班幹部真係要被拎去堆填區。

  4. michigan_8_mile_road

    可能係香港 (或者 martin 心目中) 呢次婚事非常重要, 但係, 作為一個攞左既華人, 見到美國人願意成晚唔訓走去睇直播, 我覺得太誇張

    當幾乎所有美國主流新聞頻道都講緊威廉王子既婚事, 點解冇咩人講下美國呢幾日既風災呢? Martin 你試下上美國 yahoo (www.yahoo.com), 一共有32 項新聞放左係 slideshow, 頭 8 張入面有5 張都係講英國呢次婚禮, 有D 過份卦?

    我覺得傳媒今次既篇幅好有問題……龍捲風災同英國皇室成員結婚, 邊一樣重要D??

  5. michigan_8_mile_road

    *作為一個攞左既華人 <—- 作為一個綠卡身分既華人

  6. 義不容共

    也難怪米田共奴隸發癲 , 因為歷史早有明證 , 真正開明君主制 , 真正與民同樂 , 公信崇高的貴族 , 只可以在歐洲找到 .

    橘越准而枳 , 言論表達辱及泰國王室 , 大可惹來牢獄之災 , 在英國出言冒犯女王 , 頂多是無份做皇室大婚衛兵而已 , 孰為優劣真假 , 根本毋須再辯 .

  7. KLUST

    挪威在一九零五年再度獨立,邀請丹麥王室成員擔任國王。

  8. martinoei 黃世澤

    To michigan_8_mile_road:

    美國有咁怪嘅現象,同迪士尼文化有啲關係

    美國人多少由細到大睇迪士尼嘅嘢大,問題係迪士尼動畫裡面果啲王子、公主,全部都唔會響美國現實發生,結果英國呢個前宗主國仲保留皇室,喺現實發生啲咁嘅事,彌補咗佢地一啲喺迪士尼樂園睇都嫌假嘅嘢。

    雖然對我地呢啲受英國文化影響嘅人,覺得係匪夷所思。美國人嘅表現,亦證明君主立憲嘅合理性。

    To KLUST:

    講真,如果中國要恢復君主立憲,可援挪威借人地個國王嚟用嘅例子,雖然英國根本都係。

  9. Jacky Lim

    就話說回頭, 昨天香港人對婚禮直播看得如斯入神
    除了不排除因為香港的成就源於英國百多年的管治外, 還得看看主權移交後這十三年多以來, 香港社會有幾不堪
    唔講遠, 單純麥理浩在任的十一年, 對香港的就業、勞工、住屋、教育問題做咗幾多功夫

  10. KLUST

    「如果中國要恢復君主立憲,可援挪威借人地個國王嚟用嘅例子……」
    抑或請清室或明室後人復辟呢?

  11. CL

    回 Klust:
    挪威在中世紀後期就開始隷屬於丹麥皇室之下,有時是鬆散的聯邦,有時則是直轄的省份。1814 年拿破崙戰爭後才給了瑞典。加上 Scandinavian 國家的語言和文化都接近,是有歷史原因才可以奉丹麥國王為主,正如 Common Wealth 理論上仍奉英女皇為主一樣。
    但假如日本成功統一了中國,我相信日本人燒殺搶掠夠了,就會開始復建文明社會,說不定發展還好。我們可能會臣服於日本天皇之下。現在嘛,倒不如奉毛新宇做皇帝吧!

  12. Godiva St Quin

    我們支持明室復辟,由朱鎔基登基,皆因他是朱元璋十九代世孫,而且他曾統領全國政務,他絕對是君主立憲的君王最佳人選。

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s