香港政府膠力無極限

政情:辦世界盃港府諗壞腦

特區政府民望低沉,成日想借舉辦國際體育盛事沖喜迎新,申辦二○二三年亞運會,幾乎鐵定失敗告終,但呢盆冷水似乎仲未足以淋熄港府嘅雄心喎,我哋聽聞,面對民意巨大反彈,港府對申亞早已不存寄望,反而有人忽發奇想問:申辦世界盃好唔好呢?

有建制派立法會議員透露,港府申亞嘅拉票攻勢,臨近聖誕前已全面煞停,代表港府不再存有幻想,之不過,申亞大龍鳳照樣會足版上演,明知要求民建聯轉軚無望,無法湊夠支持票都好,依然極有可能喺農曆新年之後,向立法會財務委員會提出申請撥款,由議員否決,讓申亞計劃「自然死亡」,算係正式為事件畫上句號。

「德成局長」曾德成申亞夢碎,不過港府中有人認為,申亞搞唔成無所謂,搞世界盃又得唔得呢?申辦世界盃以國家為單位,如果香港要搞,即以中國名義申辦,實際籌辦嘅主角係香港同珠三角城市。嘩,一場申亞美夢,令香港精英運動員磨拳擦掌,如果舉辦世界盃,全港球迷舉腳贊成,淨係講吓都令人好亢奮喇。

小弟睇完呢篇《東方日報》嘅報導,第一時間諗係,民政事務局高層乜有林忌嘅忠實fans,仲要一開口膠力乘大十倍,真係高人。

話說政府再申亞之後,林忌周圍同人推廣,不如直接申辦2022冬季奧運算喇,既然要mission impossible,不如嚟個勁啲,喺熱帶地方搞冬季奧運,所以搞咗個2022爭取冬季奧運嘅facebook page,當然大家知道,係玩緊膠,真係Final Fantasy。

政府內部嘅玩膠高手,明顯比我地呢啲平民知道高官好大喜功嘅口味,可能有人以為香港足球已經起飛心都雄埋,所以就投其所好直頭申辦世界盃。

講真,如果曾德成有意申辦世界盃,真係唔知支唔支持好,喺香港公然捧英格蘭或者荷蘭係好爽嘅事,只不過曾德成真心膠力十足,稍為支持佢都怕佢會認真執行,一個唔好彩爭到返嚟,真係唔知點算,連卡塔爾都可以辦世界盃,咁只要曾德成俾FIFA嘅膠人夠甜頭,又唔怕被BBC Panorama攝製隊捉到行賄,爭到返嚟真係頭都痕,心情好鬼矛盾。

正如吾友Ryanne喺twitter度講,不如爭一級方程式喺香港舉行實際啲。你曾德成要好大喜功,咁唔該搵啲可能大家有興趣,又搵到食,又唔會太頭痕嘅返嚟玩。

6 則迴響

Filed under 香港政治

6 responses to “香港政府膠力無極限

  1. S

    HK has its own membership in FIFA.

  2. alvin

    如果阿爺要搞世界盃﹐香港要撈翻幾場分組賽又真係唔難喎。搞分組賽﹐大球場都夠用啦﹐連場館都唔使起。

  3. abdieladams

    想睇香港爭F1多啲!

    為咗F3,澳門人睇咗咁多年車影,聽咗咁多年噪音,塞咗咁多年車,封咗咁多年路。最好香港真係搞F1時喺市區搞,就大有風水輪流轉嘅感覺。真係諗起都興奮!但如果港府定埋賽車嗰幾日做假日,仲頭腦發熱到免費請晒香港市民上看台睇,咁就實「熱鬧」過93年元旦嘅老蘭……

  4. barjack

    買斷個世界盃轉播權分俾免費電視實際d囉.

  5. 義不容共

    申辦世界盃甚至奧運 ? 好好好頂頂頂 !

    亞洲盛事豬兜嘛 ! 要掌握得來不易之機遇,花盡血汗經營的公帑 ! 反正永遠不會還富於民 .

    大把自私透頂,不願腳踏實地,無主場就膠硬的所謂運動精英,以至不惜填平維港來創造就業的建築孽界,一定不分是非黑白,死撐到底 !

  6. ky ho

    錯!錯!錯!上面各位提出呢啲咁簡單嘅活動乜水都識啦,要搵啲勁啲嘅先至驚天地泣鬼神,留名立萬!!!!!!!!!就舉辦世界男性生殖器比賽頒獎喇!世界首創,硬膠過硬膠,德成局長威到盡喇!

發表迴響

在下方填入你的資料或按右方圖示以社群網站登入:

WordPress.com Logo

你正使用 WordPress.com 帳號留言。 登出 / 變更 )

Twitter picture

你正使用 Twitter 帳號留言。 登出 / 變更 )

Facebook照片

你正使用 Facebook 帳號留言。 登出 / 變更 )

Google+ photo

你正使用 Google+ 帳號留言。 登出 / 變更 )

連結到 %s