英國人就係咁示威

匯賢智庫搞乜嘢英美留學甜酸苦辣講座,小弟笑咗。唔知呢班友,有幾投入佢地喺英美嘅留學生活?係唔係只係群埋班華裔學生就算,知唔知乜叫真正英美大學生?


英國廣播公司圖片

點解搞到英國示威示到成個保守黨總部,幾乎被示威學生拆鬼咗。我可以講,英國大學生,不嬲都係咁。當英國BBC Parliament拍成棚人衝入House of Commons阻人開會表達訴求,係正常表達意見,阻止法案通過手法都夠膽死果陣,保守黨總部玩成咁有乜好出奇。如果香港有啲喺英美讀過書嘅人,仲話香港示威者好激,呢啲友仔除咗白讀書,我無其他評論。我身邊識第一個話長毛唔激果位女士,正係德國讀大學返嚟香港。長毛喺德國,只不過典型溫和過溫和嘅人。

當然,大家都好奇,點解Metropolitan Police咁失策,派廿幾丁友守保守黨總部算數。以我分析,根本警察立心玩膠。因為薪酬同cut budget問題,Tube罷工罷到全倫敦被玩殘,消防員都罷工過,BBC都會罷工,警察如果受cut budget影響,但佢地又唔可以抗議,你估吓可以點做整蠱保守黨政府,睇過Yes, Minister都估到佢地會做乜,你估英國呢班Civil Servants唔識玩膠咩。Metropolitan Police,應該知道Direct Action嘅友仔,實會乘機玩屎玩尿。

有新聞報導,Cambridge裡面學生醉酒鬧事,裸跑,破壞公物呢啲膠事層出不窮,小事喇,牛津有個飲飲食食組織,叫Bullingdon Club,只限獲邀人士參加,連首相David Cameron同倫敦市長Boris Johnson都做過會員,呢個會令牛津附近餐廳老闆頭痛,因為佢地出名其中一樣嘢就係醉酒鬧事後搞到餐廳亂七八糟,打爛碗碟嘅行為。而佢地係有筆經費,預咗用嚟「找數」。所以中大學生報情色版,我話中大班校友好多大驚小怪,外國出名大學直頭有出情色雜誌添,都未計精英學生飲大咗然後周圍鬧事呢啲行為。

所以我成日質疑,好多人去外國,究竟讀乜書,由台灣到香港,點解放洋留學後,一啲西方文化都學唔到,認識唔到,甚至做咗獨裁政權嘅應聲蟲。如果滿口流利英文,但對西方文化一無所知,佢地究竟留洋做乜,有無人話到俾我聽。

後話:小弟依家至知獅子山學會同匯賢智庫搞乜嘢競爭法關注組,小弟作為自由經濟支持者個人唔會贊成同匯賢智庫有任何合作。自由經濟支持者,一定同葉劉淑儀呢類人有所切割,呢個係我嘅立場,唔係乜人都可以拉作盟友,至少匯賢智庫唔係。

我知香港好唔公平,無乜機會俾中下階層嘅人放洋留學,獎學金俾中國學生搶走晒。如果果啲持BN(O),我鼓勵學好德文,西班牙文,歐陸留學唔係要錢,當然生活費可能都要頭一兩年半工讀,但長遠隨時好過你喺香港還Grant and Loan,而且歐洲會俾到另一種視野。

24 則迴響

Filed under 英國與歐洲, 香港政治

24 responses to “英國人就係咁示威

  1. Joel

    小弟係過來人,(在紐西蘭,移民子女和留學生通常都係同埋一堆)。可以話,真係去到當地又唔係只群埋班華裔(或者最低限度起碼係亞裔)的華裔學生,係鳳毛麟角。唔好話香港台灣中國學生,連南洋華校系統畢業嘅學生都係咁,用英語嘅嗰班呢,就會多啲群西方本地學生嘅。

  2. v

    there are various intercollegiate organisations running annual conferences on direct actions.
    all most uk students join the nus.

  3. V: 當年晌英國留學,我都係NUS會員。

  4. Bankers' Arms

    最慘係你去Alliance Francaise/Goethe Institut 學法德文, 要學到入大學的最低要求, 之前已經需要付大量學費, 呢個數唔係個個基層學生可以負擔得起

  5. nightingalelin

    振興中國文化,係要同佢地西方文化人合作。點樣係衝突同矛盾發展出和諧,依一個就係中國文化應有的方向。

    最弊係有班話自己係中國文化的人,唔俾人有矛盾,將積怨講成係和諧,將應有的做人態度拋棄,有如流氓。雖然西方文化係支持戰爭,但係戰爭係要解決左先至有和平,而中共就講成唔戰爭就會有和平,連充分必要條件都混淆,又點會有正確的人生觀及價值觀。

  6. Bankers' Arms

    匯賢智庫果班友, 要佢地講下留學辛酸, 最多最多咪講下成班香港仔落Tiger-Tiger諗住溝鬼妹, 點之帶住幾包煙去派都冇人睬! 哈哈哈, D父母聽到真係心酸, 幾兩萬駛得咁無聊… 好彩係炒樓炒番黎!

  7. 香港賓拉登

    如果果啲持BN(O),我鼓勵學好德文,西班牙文,歐陸留學唔係要錢,當然生活費可能都要頭一兩年半工讀,但長遠隨時好過你喺香港還Grant and Loan,而且歐洲會俾到另一種視野。

    根本這兩樣就係我依加做緊的事 @@

  8. Felix C

    愚見依家出國留學生多了很多,到英國歐洲要學"好"英文、歐洲語言,及真真正正地學習當地文化,非得從初中入學才成,要等到了上大學時才留學,是很難打入本土同學圈的(冷門科目、冷門國家除外)。所以很多時都見到除了本土學生圈、就是中國人很多圈、日本人一大圈、韓國人一圈……這是我-6地留英的經歷

  9. martinoei 黃世澤

    或者我個朋友,因為係全波恩唯一一位香港學生,所以可以融入德國社會。

  10. v

    @felix c :"非得從初中入學才成"

    a simple answer: no.
    there are many boarders who groupie with other chinese;
    and there are many college students who do not groupie

  11. 新仔

    其實睇新聞, 呢單嘢都唔係好暴力啫. 仆爛咗啲玻璃同一兩道門, 幾個市民同差佬超輕傷, 都無搞到燒車燒乜燒物, 小事啫. 啲二世祖酒後駕駛或者非法賽吓車啲傷亡都唔止呢個級數.

    不過中國人咁鐘意用權力去迫人和諧, 實接受唔到呢啲.

  12. michigan_8_mile_road

    容許我係度問一句:

    我而家係美國讀書, 全間U 得2-3 個香港學生, 另外200 多個內地學生, 所以我既生活圈子大多係美國人, 其實咁樣係好事定壞事?

    我見身邊好多同學都揀左加州, 西雅圖呢D 地方, 貪果度D 名校, 所以, 我第2 個問題係: 究竟果D 所謂名校係點決定的? 我知道果D 大學排名一向都有爭議

  13. 雖然你跟獅子山班人理念較近,但我仍要提醒一句﹕對這幫膠人,根本不值得有任何期望。

  14. v

    @MICHIGAN
    1. 唔群中國人都係好事
    2. 美國正規大學間間都臥虎藏龍, 如果你要讀研究所, 大學名氣真係不如個別教授實力; 你要成績好,畢業要揾LOCAL工亦唔係大問題.

  15. v

    “究竟果D 所謂名校係點決定的"
    你喺美國一排 … 自己識查啦

  16. Bankers' Arms

    d ibank/hf 咁歧視 local 學生, 長年都冇人出聲, 俾著英國學生見到咁情況, 一定嘈到拆天燒車軚放火砸爛成個中環! 個campus稍為成多左大陸學生, 已經有人嘈!

    所以香港, 唉, 有時係自己造成!

    1984年, 如果全香港5百萬罷工罷市罷課, 掀起國際輿論, 睇下英國敢唔敢讓俾中共?! 牙力都大D la!

  17. michigan_8_mile_road

    To v:

    你覺唔覺得以下2 樣野好難兩全其美
    1. 入名校 (90% 中國學生都係貪佢出名先入)
    2. 多D 同外國學生一齊 (一間學校40% 係中國學生, 你覺唔覺要避開中國學生好難)

    舉個例, UCLA 係名校, 但係你一入去, 點都遇到香港學生 (我唔係歧視佢地, 而係佢地D 行為我接受唔到, 小圈子行動)

    另外, 我而家讀緊既唔係名校, 將來我讀上 master 要入名校未好難 !? 我想到既係GPA, 研究經驗, 教授既信…….仲有D 咩

  18. 點子

    To michigan_8_mile_road:

    冇計,一係就捨英美而選法德,問題係你有冇膽:盲毛僱主們識得歐洲本土大學咩。識者泰半都唔係香港僱主矣。但做歐陸派是一條苦路,十多二十歲就要作此決定,公平嗎。所以大多退而求其次,選入英美名大學,勝在睇得又食得。歐陸派的功夫,唯有靠日後修為了。

  19. michigan_8_mile_road

    To: 點子

    我唔打算番香港找野做, 我將會係01 年1 月拿美國綠卡, 似乎香港冇望啦……我同美國學生唔同既地方係, 我可以保留中國文化的優勢, 再學埋西方文化既長處

    另外, 看來英國呢班學生既行為, 遲早會係美國重演, 美國政府冇可能永遠靠印銀紙來解決問題, 當美國人知道佢地手上既美金咩都買唔到, 就會學英國人出來示威

  20. v

    “另外, 我而家讀緊既唔係名校, 將來我讀上 master 要入名校未好難 !?"

    i think you should check your facts before confusing yourself with unsubstantiated assumptions. what is important is what work you have actually done (research) and which professor can write a reference for you.
    if you look at, for example, the enrollment of university of chicago, you will find students with a very diverse background.

  21. v

    “但係你一入去, 點都遇到香港學生"

    if you don’t even have the initiative to pick your own friends, don’t dream of any success whatsoever.

  22. 不留名

    現實就係亞洲人同西方文化根本好唔同, 唔係話想融入就融入, 你完全對歐美學生的興趣冇共鳴, 點融入當地圈子。歐美和亞洲對於音樂, 落pub, party狂歡, 飲酒, 以致性開放程度差天共地。點解歐洲同美英的人咁容易熟係因為佢吔本身文化相近,唔好淨係話香港或大陸。亞洲人對於融入西方社會困難係大好多。

    要學歐陸語言入大學好唔實際, 香港中學啲功課考試都唔知幾多, 有時間讀英文以外的外語又唔要成績插水就即係冇得同FD玩, 日日自閉, 咁對好多人來講同攞佢吔命冇分別。

  23. v

    @不留名

    1. did you try?
    2. did you try?

  24. KMB59

    「要學歐陸語言入大學好唔實際……」
    先到當地讀一年先修班又如何?

發表迴響

在下方填入你的資料或按右方圖示以社群網站登入:

WordPress.com Logo

你正使用 WordPress.com 帳號留言。 登出 / 變更 )

Twitter picture

你正使用 Twitter 帳號留言。 登出 / 變更 )

Facebook照片

你正使用 Facebook 帳號留言。 登出 / 變更 )

Google+ photo

你正使用 Google+ 帳號留言。 登出 / 變更 )

連結到 %s