Daily Archives: 九月 21, 2010

請邱毅批評別人救災前要作比較

喺台灣呢幾日,最火滾嘅一件事,唔係返香港飛機延誤,亦唔係信義路膠到唔知點形容嘅交通安排(容後有機會講),而係出身高雄嘅邱毅,喺《2100全民開講》(叫全民亂講就差唔多)亂咁放砲。

邱毅作為立委,佢批評對家不當,例如因愛河願景橋未開閘前,比較一下之前馬英九處理台北水災嘅硬膠表現。

喺馬英九做緊台北市長果陣,因納莉颱風襲擊台北,造成台北大水浸,三分二個台北因抽水機故障,1000mm大雨下變成澤國,結果台北市捷運停足三個月(大家諗吓台北無三個月捷運會膠到乜地步),台鐵入唔到市區,台北部分地區抽水抽足一個禮拜都未搞掂。

呢次高雄,高雄成個城市唯一喺颱風下維持正常運作嘅交通工具,就係捷運,左營係重災區,但高鐵喺颱風走後回復正常(我就係坐高鐵去機場嘅,目的地講明係左營),陳菊徵召全市任何可以用嚟抽水嘅抽水機抽水,再加上民進黨執政嘅宜蘭派人派機器幫拖後,高雄大部分地區回復正常,大家己經講緊善後賠償幾多錢。只要大家識歷史,就唔會聽邱毅呢啲憎民進黨憎到連理智都無埋嘅友仔老點。講真,講硬膠,幾時夠台北多,我呢個月有五日時間喺台北,差唔多日日都遇到膠事,馬英九時代都無咁離譜(講開又講,馬英九本身執行力唔強,但佢對有啲嘢係有要求,有執著,至少唔會俾台北主要鬧市因交通線路嘅硬膠設計,搞到險象橫生,佢亦會合理保留街上嘅垃圾桶)。

一場水災震盪選情?睇統派媒體太多會壞腦,中南部民眾心裡有數,台北民眾亦心裡有數。

Short URL: http://wp.me/p7cGY-2EL

後話:如果郝龍斌真係輸咗,花博只係佢嘅最後一根稻草,真正原因係交通,連佢個票倉信義路、大安、文山一帶都夠膽搞到交通膠到核爆嘅地步,你好難怪佢會開始輸。

6 則迴響

Filed under 台灣政治

搞清個敵人係邊個先喇

喺評論「選民力量」事件前,我想講日本幕末嘅古仔。

由黑船事件到西南戰爭結束呢段時間,日本係一個乜膠都有嘅年代,一個藩裡面互劈有之,藩與藩之間可以無厘頭打一餐,而激進派搞出嚟各類暗殺同陰謀無日無之,當然有啲係殺錯良民。

明治維新係薩摩藩同長州藩聯手倒幕,但喺薩摩藩同長州藩締結聯盟之前,有時薩摩藩會幫幕府打長州藩,長州藩裡面唔少人,都對薩摩藩嘅舉動心存怨恨。

但後嚟,海援隊嘅老闆坂本龍馬,喺兩者之間調停,當時幕府唔俾長州藩買軍火,坂本龍馬就借薩摩藩個朵買軍火(海援隊係一個好過癮嘅商業機構嚟,同時兼具軍事、政治、商業同教育多種功能,喺一個變動嘅大時代,係要呢類「奇公司」),然後轉賣「二手」軍火俾長州藩,但更重要,坂本龍馬問咗西鄉隆盛同桂小五郎,究竟係佢地兩個面子重要,定係日本前途重要?有幾多為咗尊王攘夷犧牲咗。呢個問題,令兩大藩決定要撇棄過往恩怨,攜手倒幕。

最後,薩摩藩同長州藩破天荒締結聯盟,清理你打我,我打你都唔知為乜嘅局面,不久,德川幕府亦主動交還政權,江戶(今東京)無血開城。

我諗泛民各方,都應該要有當年薩摩藩同長州藩嘅視野,依家嘅共同敵人係邊個,搞清楚先喇。

Short URL: http://wp.me/p7cGY-2ED

33 則迴響

Filed under 香港政治

曾蔭權入咗民進黨?


曾 蔭 權 : 一 國 兩 制 可 為 妥 善 解 決 台 灣 問 題 作 借 鑒
2010-09-21 HKT 15:17
行 政 長 官 曾 蔭 權 表 示 , 香 港 回 歸 13 年 , 證 明 一 國 兩 制 可 行 , 亦 是 解 決 歷 史 遺 留 問 題 的 良 方 妙 策 , 相 信 可 以 為 妥 善 解 決 台 灣 問 題 作 為 借 鑒 。
曾 蔭 權 出 席 一 項 活 動 時 致 辭 說 , 特 區 政 府 過 去 積 極 配 合 中 央 對 台 政 策 , 日 後 會 進 一 步 提 升 港 台 交 流 。

出 席 同 一 活 動 的 中 共 中 央 統 戰 部 部 長 杜 青 林 說 , 台 獨 勢 力 從 未 停 止 , 海 內 外 的 華 人 都 要 肩 負 起 兩 岸 關 係 和 平 發 展 的 責 任 , 又 指 和 平 發 展 走 向 和 平 統 一 , 是 兩 岸 關 係 發 展 的 必 然 趨 勢 。

條友講嘅嘢,有極濃烈嘅曲線味道,句句都可以反轉嚟解讀,一國兩制正係嚇到台灣人抗拒統一,你依家話係良方妙策,講膠都唔係咁講架。

唯一解釋係,條友入咗民進黨。

Short URL: http://wp.me/p7cGY-2EA

11 則迴響

Filed under 香港政治, 台灣政治

香港政府傻的嗎?


申 辦 亞 運 另 涉 300 億 元 非 直 接 開 支 建 體 育 設 施
2010-09-21 HKT 13:30
申 辦 亞 運 專 責 小 組 組 長 陳 育 德 表 示 , 舉 辦 亞 運 的 直 接 開 支 約 為 137 億 至 145 億 元 , 至 於 諮 詢 文 件 中 提 及 的 另 外 300 億 元 , 則 為 非 直 接 開 支 。 當 中 200 億 為 興 建 啟 德 綜 合 體 育 設 施 , 這 項 設 施 早 於 06 年 已 計 劃 興 建 , 餘 下 的 100 億 元 , 用 作 在 現 有 已 規 劃 的 土 地 , 興 建 室 內 體 育 館 。
陳 育 德 說 , 這 些 設 施 不 管 是 否 申 辦 亞 運 , 都 會 按 計 劃 興 建 , 如 果 沒 有 申 辦 , 可 能 會 攤 長 興 建 , 但 如 果 申 辦 亞 運 , 就 需 要 在 13 年 內 完 成 , 以 作 配 合 。

港府呢頭話小班教育加重財政負擔,呢種掟五百幾億落鹹水海搞亞運,原來香港人啲錢俾你啲膠人滿足虛榮心架?

呢次一定要反對到底,無可能再俾另一次高鐵事件重演。呢排咁多膠嘢,點清得晒。

Short URL: http://wp.me/p7cGY-2Ew

10 則迴響

Filed under 香港政治