Daily Archives: 九月 19, 2010

中學根本要小班教學

繆美詩:不患寡而患不均?

由於香港人口變化,有啲中學收唔夠人,孫明揚呢條只識耍太極,唔識做實務嘅廢人(日日𢭃人工耍太極唔係廢人又係乜?),果然係太極王,佢只係識殺校,小班教學呢個建議死都唔理。

本來香港教育投資唔夠,所以政府仲要拎六百六十九億嚟起高鐵,鋪鋪諗起都火滾,用嚟起學校唔好,請多啲教師好過今日用六百幾億起廢鐵,明天就捐一百億益四川,啲錢就被啲高官二奶買LV,搞到LV都cheap晒,而依家孫明揚,只係想乘機削弱傳統名校,好似皇仁、庇理羅士呢啲反共基地嘅力量,至提間間都要收少啲,如果要殺校,點解唔殺咗香島中學、培僑中學、福建中學新起嘅學校,點解我地要用公帑資助中國共產黨建學校?

況且依家新學制,學嘅嘢越嚟越無定向風,以前搞Mad 2010聽Sir Ken Robinson都講,依家教育模式係工業革命果陣留出嚟,唔啱迎接未來挑戰,如果香港真係要搞高增值,係要成個資源配套投放更多人去做教育,一班三十幾條友,點解通識科,你教我教喇?孫九招公咁叻,不如你嚟教通識科,我睇你會教出乜膠出嚟?

中學要小班教學,我係支持,因為世界越嚟越複雜,而香港啲家長一個個都唔識教仔,或者自己其身不正都搞唔掂,加上課程大變,點可能一個班主任頂四十條友,你講玩咩。

所以以前大班喺電台用「孫九招公」嚟形容孫明揚,我隻眼開隻眼閉,因為講真,話佢係狗係侮辱狗,我幾驚愛護動物人士鬧我,香港警方養嘅警犬(真正嘅警犬)對社會嘅貢獻都大過呢啲太極高手,孫明揚送佢北韓做金正日嘅財長就差唔多。

Short URL: http://wp.me/p7cGY-2Em

7 則迴響

Filed under 香港政治

對網絡流氓唔駛太客氣

小弟呢度一向對網絡流氓實施極其強硬政策,想喺度留言係連門都無,點解會咁樣,大家了解一條叫DAI ADORU嘅流氓就知。如果我認真真係同啲膠人逐條數計,我諗係幾浪費地球資源嘅一回事。

DAI ADORU嘅真實資料,我諗唔少人用Google搵到公開資料,仲要係佢自己嘅廣告嚟,大家知佢乜水。DAI ADORU睇中獨媒對一啲五毛嘅軟皮蛇政策,既然容忍得翁文鏗呢類人,佢就更加得,經常喺獨立媒體作出五毛黨式嘅言論,只不過甚少燒到我頭上,所以我無點打佢。

但喺Paypal戶口被封事件裡面,DAI ADORU無喇喇發言打我,我覺得真係唔駛同佢客氣。對呢條友好簡單,佢個facebook、雅虎blog,通通拎晒去舉報,同佢辯論都費時,如果佢有乜違法言論,直頭報警得喇,當正佢係「實名五毛黨」處理,我睇佢以後點樣出嚟網界行。連網典都永久封禁佢,呢條友都應該係一等一嘅煩膠。

呢排現實世界到虛擬世界好多呢類煩膠,等陣再寫一件,喺港灣豪庭呢類樓盤嘅極級煩膠。DAI ADORU同果條友比有一段距離,但作為打呢類硬膠前嘅熱身都應該okay。

Short URL: http://wp.me/p7cGY-2Ej

2 則迴響

Filed under 香港政治

飛越颱風

識我嘅都知,小弟一向都對氣象有興趣,當然講唔上專家,更唔會追風呢類危險動作。

但由於呢次公幹遇上颱風,結果小弟第一次要坐飛機越過颱風,真係認為刺激嘅體驗。

小弟呢次係坐KA480,喺香港/台北標準時間1205起飛,由香港前往桃園機場,當時香港往來台中同高雄嘅航班,華航同華信好多都取消,但係港龍都照飛。

而機長喺起飛前,己經警告在先,好可能遇上好勁嘅氣流,叫大家要時時縛好安全帶。果然,喺飛機飛到台中附近上空,當時大概1320左右,亦即颱風撞緊中央山脈果陣,就嚟料。

先睇數據先

我係拍唔到最高風速讀數,飛機曾經Head Wind 109km/h,喺成程機裡面,過咗高雄之後,就算採取一條離岸航線,都食緊80km/h或以上嘅風,你話高雄同台中線點可能安全降落?

之後睇吓,喺台中市對出海面,喺離地約5000米情況下,海面嘅情況

大家見到,海面狂湧白頭浪,好彩當時台灣西北岸一帶唔大雨,否則下面有船嘅話,查實好危險。

所以全日空來往東京成田同桃園之間嘅航班,唔同你搏,寧願delay,因為真係刺激咗少少。小弟喺台北無遇到雨水,有時仲有啲陽光,只不過,啲風大到,香港嘅八號風球,喺屏風樓效應下,真係濕濕碎。證明香港屏風樓現象,離譜到可以擋颱風,原來李氏力場係咁解。

Short URL: http://wp.me/p7cGY-2E8

後話:根據美軍聯合颱風預報中心(JTWC)嘅最新預測,如果個風無撞正中央山脈,轉向西南經高雄縣市地區出海,換言之個風仍然好強,依家睇幾時轉正西,但天文台出一號戒備信號係正路,如果個風走南少少至轉西,香港食到正都咪話唔係嘢。

10 則迴響

Filed under 氣象