Daily Archives: 九月 15, 2010

鼠患?特區政府就有鼠患

明報:保釣船臨航 食署突查鼠患

呢個係小弟聽過有史以嚟,最膠嘅理由,意圖阻止人出去保釣。

本來阻人出去保釣,唔好講漢唔漢奸賣國賊,喺言論自由層面已經於法無據,依家作出嚟啲理由,簡直騎呢到爆,相信汪兆銘都自嘆不如。果然特區政府裡面,有人係曲線高手。

講真,有鼠患,特區政府就大把鼠患,咬完一百億,再咬四十億,之後咬成六百六十九億,要滅鼠,滅咗下亞厘畢道班碩鼠先喇。

Short URL: http://wp.me/p7cGY-2DO

4 則迴響

Filed under 香港政治

發財點立品?

蘋果日報:范太要求商界發財立品

呢度講咗香港班有錢佬,甚至查實無乜錢,但成日恥笑無嘅人嘅奴才,係幾咁無品呢樣嘢好耐。依家大家都知商界應該發財立品,但點立品至得?

如果有錢佬以為只係捐吓錢就叫解決問題,Sorry,呢個唔係發財立品嘅方法,連南洋都走緊捐身家呢條路果陣,你班有錢佬嘅二世祖日日喺娛樂版上演鬧劇,呢個叫立品乎?

發財立品,不外乎幾個途徑

1. 捐身家,解決人類社會棘手嘅問題,例如愛滋病,或者好似德國Zeiss同SCOTT集團嘅做法,公司利潤投放返喺基礎科學研究,或者印尼丁香煙家族搞教育基金

2. 推動民主社會下嘅社會改革,例如支持普選

3. 喺自己經營嘅企業支持社會改革

依家香港最迫切,係建立一個真正民選政府,然後由呢個政府去推動社會改革工程,唔好乜叉嘢都側晒落地產財團度,唔好諗住自己鬧吓自己,香港商界嘅大孖沙就可以避咗建立民選政府嘅議題,呢個唔work。喺大馬,有錢人係捐錢支持反對黨,台灣都係有咁嘅經驗,唔知香港嘅商界想點?

Short URL: http://wp.me/p7cGY-2DL

6 則迴響

Filed under 香港政治

民建聯,你煩唔煩啲喇

小弟一向最憎收到垃圾電話,果啲預錄嘅電話更實會舉報。今日我收到一個垃圾電話,我就睇電訊管理局係唔係唔處理。

喺下午,小弟收到一個無來電顯示嘅call,之後就一輪嘴錄音,話呢個係民建聯嘅調查,想知道點用紙幣習慣乜乜物物,聽到民建聯就火都嚟。結果即刻cut線,兼上網向OFTA舉報。

香港無政黨法,民建聯唔係慈善團體,我就睇OFTA有乜理由,俾民建聯有限公司嘅垃圾電話四圍走。唔好話同推銷無關嘅商業機構電話都得,否則間間公司都借問卷名義,用垃圾電話收集個人資料,大家唔煩死就奇。

Short URL: http://wp.me/p7cGY-2DI

發表留言

Filed under 香港政治

搞estatement但無csv export功能用

依家香港啲銀行為咗慳郵費同紙費,好熱衷搞所謂estatement,當然,依家某啲銀行estatement係進步咗,至少有pdf,等我唔駛個個月都嘥時間scan bank statement存檔。

只不過,如果銀行真係咁鼓勵客戶審慎理財,特別信用咭客仔,我唔明白香港啲銀行,到依家都無提供Excel或者CSV檔案輸出服務,次次都係我喺HTML版度copy and paste個table入Numbers嚟入數。

乜唔係客戶越能掌握佢每個月支出收入模式,越能夠做到審慎理財。而Excel同csv檔案輸出,亦方便大家報稅,點解香港銀行咁都唔做。

證明一樣嘢,香港銀行IT部好多友仔,仲未知道乜叫ebanking,呢樣嘢美國、英國有咗好耐,香港都未有,香港啲銀行仲敢話自己係國際金融中心服務嘅銀行嗎?

Short URL: http://wp.me/p7cGY-2DF

10 則迴響

Filed under 香港政治, 財經