Daily Archives: 九月 2, 2010

小弟對信報改版嘅不明白

喺小弟準備去台灣,準備膽固醇之旅(無錯,每次去台灣,如果唔係公事,一定去增月巴)果陣,小弟最唔明白係《信報》改版,將陳雲踢走。

唔好講小弟呢啲寫得唔好嘅人,如果俾你有得揀,你會睇王永平、陳雲、練乙錚嘅評論,定係王岸然、魯姜、劉迺強呢啲硬膠嘅評論,我諗答案估都估到,我唔明點解,王岸然、劉迺強呢啲友仔老神在在,王永平、陳雲、練乙錚就要走?

陳老總同埋評論版主管,可唔可以向我呢個《信報》老讀者(我十歲開始睇),兼老作者(我寫咗十四年),但又算八十後嘅解答一下咁(鄧小樺都自認八十後,打住八十後旗號參選藝發局,我無乜理由唔係八十後,大家記住支持八十後文藝青年)?我諗爆頭,都諗唔明發生緊乜事。

Short URL: http://wp.me/p7cGY-2BH

6 則迴響

Filed under 香港政治, 傳媒

成街都係新選組嘅友仔

昨晚無啦啦我講到《龍馬傳》,當然同呢幾日離奇古怪嘅政治形勢有關,有兩件事,都己經去到怪異嘅地步。

一件係沈旭暉提出次主權,嚟支持曾蔭權打電話俾菲律賓總統嘅行動後,劉迺強、王岸然、一國兩制研究中心一堆人馬連番出手,成班老人,仲要係香港人湧晒出嚟打沈旭暉。王岸然尤其露底,當年無厘頭打我又係佢,打陳方安生十成按揭走去暗助葉劉又係佢,走去打黃毓民又係佢,以前又好鍾意打民主黨,打民主派勁過打土共,呢條友係乜人馬大家心照喇。

另一單嘢令人不解,係《信報》同《蘋果日報》同時停咗陳雲個專欄,陳雲個專欄可謂《信報》皇牌,要鞏固《信報》評論界嘅地位,乜唔係應該留番陳雲個欄至啱嘅咩?陳雲丙地產商多,固然係一個原因,但我睇呢單嘢,可能有其他政治洗牌事件喺背後,可能更加複雜。

所以呢排,唔好話膠到乜嘢寺田屋、池田屋(新選組因池田屋一役而紅)、近江屋事件,更多你諗唔到怪事喺後頭。依家唔只成街都係菜刀,仲係成街都係武士刀,好得人驚。

Short URL: http://wp.me/p7cGY-2BE

6 則迴響

Filed under 香港政治

陳岳鵬當CSR係流架

呢張由Carson Poon拍得嘅圖片,令人O嘴

咁都得呀,陳岳鵬當CSR 520-525條係死架,佢個特首辦Office Boy嘅位,應該屬於AO類別,亦即CSR嚴禁參與政治活動五大類別,依家佢第一個犯禁,咁仲駛要CSR?

特首係咪應該要處理吓咁呢?

Short URL: http://wp.me/p7cGY-2BA

5 則迴響

Filed under 香港政治