Daily Archives: 九月 1, 2010

真係隨時膠過寺田屋事件

近日睇NHK大河劇《龍馬傳》,就嚟講到寺田屋事件,大家都想睇福山雅治點演寺田屋事件好膠嘅一幕(九月五日日本NHK播出),坂本龍馬沖緊涼果陣,啱啱好江戶幕府派嚟嘅新選組班友殺到上嚟,衫都唔著急急著草。如果佢走慢啲,都唔駛講乜叉船中八策,一早死響新選組班殺人唔眨眼友仔嘅刀下。坂本龍馬,仲要升級武器嘅速度,同大家換iPhone差唔多,人地用太刀,佢用小太刀,人地用小太刀傍身,佢就用西洋手槍,但仍然阻止唔到佢喺大政奉還成功不久,就慘死喺政治謀殺中。

由黑船事件,到大日本帝國憲法頒佈,由於代表一個時代嘅終結,政治權力嘅大洗牌,固然當時名臣英雄輩出,但當時一啲聞所未聞嘅膠人膠事亦層出不窮,你根本估佢唔到,例如江戶幕府選咗十幾位內鬥外鬥一樣咁在行嘅新選組,搞出一堆膠事出嚟。而當時政治暗殺無日無之,好似坂本龍馬死響邊條友手上,個個都有爭議(呢個係《龍馬傳》好睇之處,當中成堆借刀行為,嘆為觀止)。維新三傑之一大保久利通,一樣死喺政治謀殺。如果當時唔係勝海舟(一位老吹專家,但呢條友又好掂)講數成功,江戶幕府無血開城成為先例,亦為日後追封西鄉隆盛為功臣、任用榎本武揚做外交,以至成堆江戶幕府舊臣喺橫濱同靜岡搵到大銀等鋪路(點安排舊勢力有安樂茶飯絕對係一大問題,勝海舟幫江戶幕府解決呢個戰略問題,夠佢做偉人),真係更膠都有,唔只近江寺事件呢啲咁簡單。(所以我成日懷疑,《銀英傳》地球教刺殺楊威利嘅一幕,係日本明治年代歷史嘅影射)

睇番香港同中國,由民主黨同胡溫竟然講到數令政改方案通過開始,政治形勢大變,依家我地睇住一場大洗牌發生,你諗唔到膠人膠事,無厘頭嘅派系互片,乜都可以發生,借刀行為乜都可以發生果陣,刀光劍影唔駛講,果啲對付人嘅手法將會令大家O晒嘴,抽水行為更加唔駛講。

我地進入一個敵我難分嘅巨變年代,我依家明點解李登輝,成日都會喺佢睇嘅日文書中尋求智慧。中國人喺方面,一直只係識得殺殺殺殺殺,從來未處理得好過。

Short URL: http://wp.me/p7cGY-2Bs

發表留言

Filed under 香港政治

「成功爭取」BNO同獲網上入台證免費待遇

台灣政府:99年9月1日零時起實施港澳居民網路申請入臺許可,一天已高達4,210人次網路申請核准,實施成效良好

移民署進一步表示,為吸引更多港澳居民來臺觀光參加十月慶典臺北國際花卉博覽會及建國一百年慶祝等活動,99年9月1日起實施新的簡化便民措施,港澳居民於網路申請入臺許可後,即自行列印許可同意書,併同香港或澳門護照查驗入境,不需再至香港中華旅行社、香港機場辦事處或澳門辦事處另繳費換領入臺證,且該許可書效期為3個月,可入出境1次,每次停留期限為30日。移民署歡迎港澳居民多利用新措施來臺,除參加慶典展覽活動外,更可以體驗臺灣的風土人情、美食及好山好水。」

即係唔只特區護照,BN(O)都可以了,British Hong Kong Forum嘅網民Lord Denning,亦出示咗有關查詢,亦指英國國民(海外)適用網上免費入台證,只要香港或澳門出世(中國出世點處理唔知,但如果印尼、印度出世,咁唔該去英國使館搞本BC實際啲)。

講真,唔想用「成功爭取」呢個四隻大字,小弟希望馬英九政府,日後喺呢啲事情上小心啲,更希望,日後BN(O)唔駛喺網上印份嘢咁膠,直頭同英國公民同等待遇。

Short URL: http://wp.me/p7cGY-2Bo

4 則迴響

Filed under 香港政治

花生黨召喚,葉劉上Tanya Facebook Album挑機

陳淑莊個facebook,有關鋼線灣卸泥口單張嘅album

葉劉果然非常鍾意打泥漿摔角,佢係第一個保皇黨立法會議員,上另一位議員個facebook度挑戰,果然《基本法》23條果陣個葉劉,依然死性不改。

更加唐突係,上人地陣營個facebook度然後鬧人講大話,台灣政客都無咁勇,簡直係發律師信俾選民係另一先河,各位花生友,係時候上去個album度食花生,甚至加把口(當然要幫Tanya)。2011同2012年選舉,一定膠力深厚,2010年薄扶林補選都可以打到咁膠,我以為南洋至興補選當大選打(南洋成日製造補選,呢個係陳太葉太港島會戰背後理據),原來依家香港都興。

Short URL: http://wp.me/p7cGY-2Bk

8 則迴響

Filed under 香港政治