Daily Archives: 5 一月, 2010

奇案兩則

雖然2010年只係過咗四日咁大把,但呢四日啲奇聞怪論頻密到呢,如果2010年成年都係咁,我諗大家係時候考慮走佬,小弟抽兩單講都無人信嘅奇聞嚟討論。

1. 高登人對十八歲女生打野戰事件的討論

小弟對男事主的真實口味不作任何評論,但如果高登仔懷疑男事主係被人強姦嘅話,咁呢單案算男事主好彩,因為佢地「打野戰」,搵到條有礙公德罪嚟告,

黃世澤:硬膠香港法律:女人強姦男人告唔到

根據香港法例,你見到女人強姦男人,召警求助都未必有用,因為最多係告非禮,甚至有可能告唔到,如果大家想做好市民,先叫黃仁龍根據英國Sexual Offences Act 2003改改條法例先,香港男人喺呢方面係唔受法律保障。由於香港無保障男人權利嘅組織,所以我睇有排都唔駛修法直至有下一位受害者,或者膠到英國咁,出現大山婆強姦一名男同性戀者呢類奇案,政府都唔知會唔會修法。

蘋果日報:離奇劫案首宗街頭搶郵袋 六小後棄置荒村 動機耐人尋味

成宗劫案係無乜人有損失,但絕對要查到邊四條友做。

因為越離奇嘅劫案,仲要咁有組織嘅劫案,佢地真實嘅犯罪計劃就越有危險性,呢兩名郵差係咪被人用嚟練習用嘅教材,不得而知,但呢四條賊佬咁劫郵件,唔會志在啲郵包,但依家香港郵政又無乜貴重嘢要運(除咗Apple啲貨,有部分係TNT + Hong Kong Post呢個組合聯合派送),如果唔查出係邊啲匪徒做,真係差佬有排頭痕。

可惜,香港無福爾摩斯呢挺顧問偵探。

3 則迴響

Filed under 香港政治

曾俊華回魂夜

政府拍嘅廣告膠,結果網友同你改到更膠,荒謬特技效果唔駛幾億美金,一蚊都唔駛又得,曾俊華呢鋪都係本月每月之星熱門人選,雖然依家仲係月頭。

原裝廣告

後話:原裝廣告度果條友係咪高登人嚟架,留咁多位整蠱曾司長? XD

Short URL: http://wp.me/p7cGY-1Dj

4 則迴響

Filed under 香港政治

大言不慚,不知所謂

Cituscape:80後,醒醒吧

若論過氣傳媒人,我諗我都係(我確實無跑前線,只保持發表評論),呢啲以前做新聞果陣學壞咗手勢,仲以為自己好清醒嘅所謂過氣傳媒人,仲有面咁大言不慚,我真係對她的面子厚度深表佩服。

作者唔係太笨太蠢果挺,至少她知道《明報》反動保守,因為有啲喺傳媒跟錯師傅,本身墨水少,又唔用邏輯諗嘢,依家位處中層嘅友仔,仲衰多幾錢重。但呢條友漏咗一樣嘢,80後搞到咁大鑊,成班傳媒至如夢初醒,究竟係邊個嘅錯?

唔知呢度有幾多人係氣象迷,但對住80後類近的社會躁動,傳媒係有責任初形成就要報導出嚟,儘早解決問題,一如颱風唔理唔會唔影響到美軍基地,美軍嘅JTWC都會發出一份TCFA(Tropical Cyclone Formation Alert,熱帶氣旋形成警告),之後開始追蹤有關颱風到消失,或者變成溫帶氣旋。問題係,點解差唔多最早對呢個問題發出嘅TCFA,亦即小弟所寫《梁國雄現象》,小弟竟然要在新加坡《聯合早報》發表?係唔係依家班所謂採主老闆,食完中聯辦飯局,去完佢地請果啲trip後,事事河蟹嘅態度有關?獨立媒體算係早喺傳媒之先,呢位博主仲好意思鬧人,真係勁。

好多傳媒前線仲有腦嘅人,都向小弟講,佢地好想做第四代或80後嘅題目,但被上頭嘅採主阻頭阻勢,或者要求記者按住佢地嘅偏見嚟做80後,連死字點寫都唔知,依家呢位博主嘅言論對社會有乜幫助?以小弟所知,真係知道問題所在嘅傳媒老闆甚少,小弟對呢個現象極為擔憂。如果仲有更大鑊嘅事發生,我諗知道點應對嘅人唔多。當然,有更多過氣傳媒人,因為老闆們鍾意請唔頂嘴,無主見嘅妹妹仔而被迫過氣嘅。好似我呢挺日日包拗頸,又唔靚仔嘅人,依家當然要做過氣傳媒人喇。

醒醒吧,過氣傳媒人,世界變咗喇。

Short URL: http://wp.me/p7cGY-1Dh

22 則迴響

Filed under 香港政治, 傳媒