Daily Archives: 4 一月, 2010

除咗咁樣,仲可以咁樣,咁樣,咁樣

八十後嘅香港人,覺得呢個地方,甚至呢個世界n咁多問題好正常,但除咗喺中聯辦抗議,包圍立法會,要解決膠人膠政府搞出嚟嘅膠問題外,仲有乜嘢可以做?

呢個乜都要講做到嘢嘅世代(查實八十後比第二代香港人要求更嚴格,你睇某啲政壇中人,政制毫無寸進都唔另諗辦法就知),小弟誠意邀請各位,出席喺2010年1月10日,下午五點到六點半,喺旺角西洋菜街行人專用區舉辦嘅街頭論壇。

點解會有呢個論壇,當然同MaD 2010有關,但另一方面,大家都欠缺咗個機會,表達一吓究竟大家喺生活,到底遇到乜問題,唔駛吓吓講到政制呢啲咁大嘅問題,係平日生活遇到乜事,解決都解決唔到,好想解決,想搵人幫你解決,搵人一齊解決,定自己解決遇到障礙,都可以大家拎出嚟傾吓。

除咗依家咁樣,仲可以點樣,呢個就係點樣Make a Difference嘅關鍵。

Short URL: http://wp.me/p7cGY-1Df

8 則迴響

Filed under MaD 2010

一膠還有一膠硬

曾德成:年輕人過份依賴互聯網

今日搞乜鬼,個個爭住月頭發功,曾俊華發完,就輪到曾德成,乜每月之星榮銜係成為特首必要條件嚟,咁我都有資格做特首。

互聯網影響年輕人的生活無孔不入,民政事務局局長曾德成批評,年輕人過份倚賴互聯網尋求資訊,會「欠缺親身體驗,沒有感性認識,難以提升到真正覺悟的層次」,他鼓勵年輕人必須增加各種生活體驗,到真實的世界中學習,再跟校園學到的前人的學問相對照。

小弟認為將曾局長句子改寫一下,對特膠政府少發膠,用嚟保護環境幾有幫助,所以我改寫成咁。

官員過份倚賴左報尋求資訊,會欠缺親身體驗,沒有感性認識,難以提升到真正覺悟的層次,鼓勵高官必須增加各種生活體驗,到真實的世界中學習,再跟辦公室看到的馬屁文件相對照。

似乎咁樣啱數啲。

Short URL: http://wp.me/p7cGY-1Da

13 則迴響

Filed under 香港政治

財爺,呢鋪你膠咗喇

小瓶子:這是人話嗎?

連中國來的小瓶子都要這樣鬧爆曾俊華果陣,我會勸財爺,潛水一輪或者公開認自己膠咗,然後搵位好少少嘅社會學家(我知邊位係財爺軍師),教佢依家第四代香港人出咗乜事,重新補習過再講嘢。因為小瓶子都問你係咪講人話果陣,其他人等我估喺度用粗口問候緊你,搞到你娘親好唔得閒,曾財爺同佢嘅軍師,可以睇高登巴打嘅反應,小瓶子己經好溫和。

高登人嘅反應

簡單嚟講,佢好過英年早逝司長,至少曾財爺知道有第四代呢個問題,而英年早逝係花牌送到屋企門口都唔知世界搞乜春。但係佢依家嘅言論,好有晉惠帝嘅味道,無咁膠唔代表佢唔膠,呢鋪佢好彩月頭發功,仲要有位懷疑緊佢性傾向嘅陳進指揮官挑逗示威者,每月之星唔係咁易拎到。但下鋪小心啲,分分鐘香港特首連三位司長都係每月之星得主,到時香港真係要改名做膠港。

Short URL: http://wp.me/p7cGY-1D6

8 則迴響

Filed under 香港政治

余錦賢太老定喇

筆者絕非鼓吹暴力,也不知照片上的幪面人為了什麼原因說正準備「暴動及流血」,筆者只記得,真正能動搖政府管治的暴動在香港只有二次,一次是五十年代石峽尾暴動,有國民黨在背後操盤,另一次是六十年代左派暴動(因天星小輪加價觸發),得到本地親北京陣營撑腰;如果沒有「兩大黨」在幕後當推手,香港群眾運動從未發生過真正的暴動。

故此,對幪面青年舉牌的「警示」,毋須過份緊張,不過,如果特區政府再不認真研究本地的青少年問題,為他們找到一條出路,整個街頭運動趨於激進化是無可避免的現象。

以上係余錦賢(查實即係游清源)喺《信報》香港脈搏講嘅嘢,但小弟認為佢太老定。

余錦賢嘅理論,喺一個搞大鑊嘢一定要組織嘅年代係啱嘅,無國共兩黨是但一方操盤,唔駛旨意搞暴動,但唔係依家互聯網年代,依家係唔駛組織都係搞出壇杰嘢出嚟,而且依家大家手上嘅通訊工具、傳播工具,可以得到知識嘅途徑等等,己經唔再係五六十年代,可以靠根本係MI5、MI6喺香港支部嘅Special Branch(政治部)可以事前知悉。

證明一樣嘢,好多人仲未明,一個新時代己經來臨,遊戲規則己經改咗,唔係以前咁玩法,仲用舊方法嚟推斷新時代嘅人嘅行為,睇嚟都注定膠到無朋友。

20 則迴響

Filed under 香港政治