將立憲派也趕到同盟會那邊去

在評蔡子強今天在《明報》篇文前,小弟先講一講古,又講番辛亥革命。

在1901年,八國聯軍之役清政府輸到裙拉褲甩後,慈禧太后同佢班守舊派大臣,諗住延長大清帝國壽命,於是亦抄1898年光緒皇的改革方案搞政治改革,雖然談不上誠心誠意,但當時仍然有一班立憲派人士支持改革,並且擋住咗同盟會果邊嘅壓力。

但局勢由1909年開始惡化,好多立憲派中人促請清政府快啲手成立議會,但清政府採取一個睬你都傻嘅態度,大家好唔耐煩,有啲立憲派中人仲被皇室拉咗去新疆(東土)充軍,果陣時己經有立憲派中人覺得時態勁唔妥,改為同革命派合作,推翻清政府算數,但呢班人仍然係少數,未到成個政府搞到倒台嘅程度。

1911年,搞咗內閣,不過大部分人都係皇室貴族,被當時寸為皇族內閣,果陣好多立憲派覺得清政府搞A貨改革,根本係昆佢地,結果呢班立憲派中人喺四川保路風潮果陣打響第一槍,佢地做埋同盟會果份,甚至激過同盟會,所以10月10日嘅無預警革命得到迅速成功,連湖北調去四川鎮壓保路風潮嘅新軍亦變埋革命軍嘅一員。

呢個故事教訓乜嘢,當連溫和派改革派都覺得好唔耐煩果陣,如果當權嘅唔切實改革結果就係死路一條。蔡子強今日篇文最令我失望係,佢睇唔到依家第四代果種心情,己經係當年晚清立憲派果種心情,連醫生、律師呢啲人都出聲果陣,就係全面革命嘅形勢,只係差條友做導火線引發事變。蔡子強連咁牙煙形勢都唔知,咁唔怪得曾爵士完全不知自已身陷險境。

如果曾爵士又推出A貨政改,就係香港政權走向終結嘅開始。

延伸閱讀:

林忌:四代香港人的回答

15 則迴響

Filed under 香港政治, 中國政治

15 responses to “將立憲派也趕到同盟會那邊去

  1. “蔡子強連咁牙煙形勢都唔知,咁唔怪得曾爵士完全不知自已身陷險境。"

    我不明為何這些學者的洞察力會這樣弱? 不單是蔡子強, 連馬嶽, 陳健民等不看不出危機.

  2. BARJACK

    亦有可能睇得出.不過等睇戲,睇下幾時有人點火引爆

  3. 鐵甲人

    睇咗蔡子強篇文,最令我O嘴嘅,唔係佢講嘅野冇道理,而係佢講嘅野根本係風涼話(如果佢篇文目標讀者係第四代人嘅話)。

    成篇文嘅概要,用地道一點的日常用語講會係:
    “Sorry,今時唔同往日,舊日遊戲規則已改,你地班第四代人,係時候好好摸索吓自己前路啦!"

    當社會分配持續不公,而第二代亦在阻塞社會流動/世代更替的可能性時 – 第四代可以做的是,一係繼續被勞役,一係就係變「柴九」。

  4. martinoei 黃世澤

    我覺得好多人會迫到變柴九

    講世代論爭,我呢度講咗一年,我依家驚比我預計仲要早惡夢成真。

  5. Perennial_Loser

    咁講啦,打算盤,我都唔會拎幾百萬出嚟買樓 – 一上身就二三十年;住遠住平慳住使,打9-0-1 守勢波捱完呢世,亦無問題。

    只不過咁做就當然係世道改變 – 某啲人畀唔畀你咁做?噚日睇信報,雖賢者如林行止,亦不免陷於窠臼,暗批所謂「草食男」。又有幾多人會諗,呢班人就係「適應」緊 – 但到頭來又係要蒙上污名畀人排擠。

    「適應」又好,點都好,不過係希望社會賢達留條路行下啫。投訴又嫌,「走位」又嫌,點做都唔係,如何了得?

  6. martinoei 黃世澤

    To Perennial_Loser:

    我可以咁講,如果我唔打算娶老婆,在幾年前無賣樓,照依家嘅供法,我應該明年就可以唔駛點努力做嘢果種人。

    依家太多第二代人講緊風涼話。

  7. 義不容共

    也來亂拋書包講點歷史— 滿清光緒皇帝在變法維新前,曾經大膽向慈禧太后攤牌:「朕不能為亡國之君,若不予我權,寧遜位而已!」

    今時今日曾蔭權頭上都有個黨主太皇太后,然而曾爵士何嘗拿出過光緒皇的勇氣,據理力爭,寧可唔撈都要有真普選?

  8. gaubinfor

    有無睇今晚0既 “新聞透視" ?

    當所有服務行業以假自僱、外判或長期培訓合約請人,重要全民貼錢打工時,大家想唔搞革命都唔得。

  9. gaubinfor

    Perennial_Loser :

    而家呢一代比上一代難儲錢好多。唔好話買樓,搬出黎租個偏遠小蝸也不易。

    並非單是滯脹 – 基本生活所需的價格漲幅遠高政府公佈的 CPI 數字,人工就 … 睇番今晚 “新聞透視" 即明白。社會對下一代的 “持續增值" 要求越來越高,但當齋比各種專業考試費也講緊萬萬聲時,復加還 grant loan 的負擔,要年青人在三十歲前剩到個錢,我作為家長也覺已是對兒女相當苛求。

  10. echykr

    Mr Choi is out of his mind.

    Has he not considered that just simply crossing the harbour (even from TST to Admiralty) once costs you $9-$10? Add another $5-$6 for those commuting from New Territories to HK Island (mostly Central).

    So if you work 5 days a week, live in Kowloon, then commuting to HK Island (mostly Central) will be $90-$100. While those living in New Territories will find themselves spending up to $140-$160 a week. (Not taking into account any transport season tickets or any gov’t subsidies)

    I guess I’m very lucky that I live in North Point, so I only spend like $50-$55 commuting to work a week. Nowadays, unless I have some major appointment, I try not to cross the harbour into Kowloon, and do my basic shopping this side of the harbour, since it’s just too expensive crossing it unless I take the ferry.

  11. Eric

    I am thinking about 1789 French Revolution.

  12. Perennial_Loser

    黃兄:

    我就係唔諗住結婚生仔嗰類;拖都唔諗住拍。都係打個和過埋呢世就算。

    始終人各有志,好似蔡子或林生嘅講法唔係唔可取,但阻力其實好大。真係個個都咁做,已經等同革命 – 試諗個個都唔買樓唔消費,行簡約主義吖;唔係唔好,但睇下班財主會唔會喊打喊殺?

    宜家咁睇玩日本化機會幾大;姑且當某啲人唔係風涼係善意,但至緊要大家食得起個後果先好 – 我無所謂,橫掂做人不外片瓦遮頭半碗粥,係怕某啲人自己做唔到,又唔抵得其他人做(到)。

    科姐:
    響 168 嗰片見識過你嘅教子心得喇;玩到今時今日啲 niche 要算到咁盡,實在難以為繼。養個細路到大又係活受罪,官門未見就先打八十,真係唔生好過。

    《新聞透視》我都有睇…家下係用盡任何一個雞碎咁大嘅法律罅榨壓大圍。縮就一定係對策,但學某啲「成功」人士吹噓自己點努力點捱點叻,實在惡頂 – 收入支出條數有得計,單靠儲邊儲得咁多?聲大大嗰啲,衰啲講句,不外炒嘢有得或者家庭負擔唔重。自己唔知係咪有運行,少少嘢就自鳴得意,其他人做唔到就當人廢柴,講得呢類人多自己都嫌煩…

    家陣租樓唔平…其實樓嘅售價最終多少都會扯到落租價度,無得完全脫鉤。只租不買抵制天價,唔係完全無用,不過幾有用就好難講 – 當然,玩到學國內啲「蟻族」同胞咁 de facto 住籠屋,就自然無話可說,係驚某啲人又走出嚟恥笑,話「你班 xx 咁無出息呀哈哈哈」咁囉。嘿嘿…

  13. Magath

    “少少嘢就自鳴得意,其他人做唔到就當人廢柴,講得呢類人多自己都嫌煩…"

    呢類人真係好乞人憎

  14. KMB59

    「我不明為何這些學者的洞察力會這樣弱?不單是蔡子強,連馬嶽、陳健民等不看不出危機。」
    他們是真的看不出,抑或是看得出但不敢說出來?

  15. 捕首

    》「朕不能為亡國之君,若不予我權,寧遜位而已!」

    若改為“吾不能為黨國之奴,”下半句該怎樣寫?
    各位不妨試下,或有所得也不定。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s