Daily Archives: 九月 21, 2009

邱騰華應該日日無車日

雖然小弟在學駕駛,不過就算考了牌,小弟都應大部分時間仍是依賴步行和公共交通工具,一方面香港的交通真係膠到無朋友,揸車只會激死自己搵山拜,在羅便臣道一帶居民應身同感受,在放工時間,由蘭桂坊去到羅便臣道最快的方法係你對腳,另一方面,小弟習慣在車上思考問題,揸車恐怕少了思考問題時間。

不過,有一位局長,絕對應該日日無車日,呢位係環境局局長邱騰華。

身為環境政策主管,日日坐住3200cc的德國燒油車周圍去,呢啲係乜示範嚟,成何體統,為咗節省公帑,以及顯示政府減排嘅決心,大部分政府官員都可以坐私人座駕,就係佢唔得,特別佢係問責局長。

仲有一位老哥,平日返工唔應該坐車,呢位係曾蔭權,大佬,督憲府後面就係政府總部,果度又無人伏你嘅,坐車嚟把叉呀。

當然,我絕對支持倫敦市長Boris Johnson嘅建議,取消晒高官嘅座駕,慳錢又環保。

====
後話,邱騰華一面話要減排,一面又話起垃圾焚化爐無問題,咁雙重標準,食屎啦。

11 則迴響

Filed under 香港政治

會唔會跑跑下會打八號風球

繆美詩:跑馬仔

香港人就算唔賭馬,評述特首角逐戰,都難免會用賽馬術語或方法,Rachel如是,《東宮西宮》也如是,雖然中央經常屈機造馬(囧)。

不過,這次「賽事」與以往看來有點不同,小弟是有另一類看法。

大家看幾天中國新聞,都知道不單香港在跑馬仔,中央也在跑馬仔,不過看來跑跑下,隨時跑出八號風球出來,如果中國政治有重大變局,那這場「特首盃」賽事會跑出乜出來,真不知。一如Rachel所講,論公關,做過立法會議員的唐英年(或唐膠年,小弟曾經在《蘋果日報》這樣稱呼他,因為他真係好膠)肯定勝連自己係共產黨都唔認的梁振英,而如果上海幫復辟,唐英年的上海出身背景是更具優勢。

問題在於,如果胡、習、江三大派系惡鬥難分難解,中央很可能在人選上傾唔掂數,始終香港仍然具有相當戰略價值,到時梁生又係中央的馬,唐生又係中央的馬,一如Rachel所講,之後又唔知中央某派系殺出唔知乜人馬,如果中途中共政權搞到自顧不暇就仲膠,到時乜世界,我都想知。隨時殺出隻九十九倍大冷都唔奇。

還有一點,現時檯面上「特首候選人」,講句難聽,全部都係做完就會被人粗口問候的級數,中央馬房成堆人都係跛嘅(董驃的金句),咁香港政治持續動盪咁又點算。所以,一些妥協人選,小弟亦不會排除。

小弟近五年已經無賭過馬,因為太傷神,但如果當特首係一場賽馬,依家係三號風球大爛地跑六班馬,呢啲賽事你賭埋我果份。

2 則迴響

Filed under 香港政治