Daily Archives: 12 三月, 2009

U盤之亂總結

依家未知證監幾時開會批准港交所修改《交易所規則》,停止膠到無朋友的勁假時段。不過,亦都係時候,對U盤之亂作出一個總結。

雖然HSBC 3月9日大屠殺令公眾察覺U盤之亂不解決不可,但整個U盤之亂,由去年五月至今,實際損手爛腳嘅股民人數都唔知點數,而小弟初步總結各方喺呢次亂事中嘅責任:

1. 港交所:由2007年搞諮詢到依家,成個U盤設計都不知所謂,雷曼迷債未必可以先做一次數學模擬,但U盤可唔可以玩嘢,小弟睇吓啲盤,自己用我個豬腦都諗到,人地國家防止有人玩嘢嘅配套,香港就乜都唔整,係咁亂嚟,仲要搞成班大行唱好的所謂諮詢,衰過廿三條果陣嘅假諮詢,港交所由董事到行政人員都係飯桶嚟。

2. 證監會:班友批港交所《交易所規則》申請果陣,完全發緊夢,之後日日都有膠trade發生,都係發緊夢,定係有人立心唔做嘢就不得而知,一定要查。

3. 投資者:呢次U盤之亂對好多小投資者教訓係,好多涉及交易規則嘅諮詢文件,一定要主動參與同發言,甚至要求衝上去立法會的Panel講,一如IT界人士嘅習慣,因為呢啲交易規則隨時定閣下身家性命財產嘅生死,點解學投資往往要學埋統計同概率,除咗用嚟推算個市嘅走向,不同嘅combination以至規則,都會有唔同可能結果,果啲大戶好多時係喺數學或統計上搵到loophole去屈機。呢鋪U盤少咗個隨機收市,結果就被人裝彈弓。

4. 政府:乜都無做,我想問大家交股票印花稅嚟做乜。

唔想變大戶點心,除咗唔好信果班除咗識冚把就乜都唔識嘅財經演員,了解遊戲規則,同埋參與遊戲規則嘅諮詢係極為重要。香港投資者學會得閒同X建聯搞埋晒不知所謂民調,問有幾多人會供匯控,係有心嘅,唔該睇吓個市幾離譜好唔好?

4 則迴響

Filed under 財經

勁假時段終於玩完

港交所23日起取消收市競價制度以免損投資者信心
12.03.2009 19:20

港交所決定由今個月二十三日起,取消收市競價交易時段,回復去年五月二十六號前的做法,在下午四時收市,現貨及衍生市場一樣。

港交所行政總裁周文耀說 ,近日股市波動大,擔心損害投資者信心,決定取消收市競價機制,他強調,政府未有表達立場,但投資者有擔心,認為最佳做法是停止收市競價制度。

在四方圍剿情況下,勁假時段終於宣布收檔,雖然已經搞到一眾HSBC股民血流成河。

但勁假時段結束後,立法會係時候做佢應該做嘅嘢,就係展開調查,否則唔敢擔保港交所班膠人又會玩出膠來。

5 則迴響

Filed under 財經

這是時候引用特權法查證監

黃世澤:競價變勁假,防造市證監有責

比起雷曼迷債,我認為勁假時段事件,更值得立法會引用特權法查清楚證監、政府同港交所嘅硬膠三合一組合,點解可以膠到咁。

由港交所2007年嘅假諮詢,到2008年成堆膠trade、到萬聖節事件、到2009年另一次假諮詢,日日都有人警告有人利用勁假時段造市,日日都有人中伏,相信涉及的損失仲大過雷曼迷債,幾乎人人中招嘅地步。而成件事,政府一早應該做咗嘢,特別政府在港交所十三個董事席位,佔有六個席位,仲未計行政總裁一定會聽政府講,無理由曾俊華完全可以任由港交所亂嚟。成件事背後,邊個要孭鑊,一定要搞清楚,為改革硬膠三合一鋪路。

依家各位股民,應該明白一個向人民問責政制嘅重要性,無民選政制,無一個妥善監督制度,由政府控制嘅港交所一所獨大,球證又係佢,球員又係佢,結果咪人人破財永不落空。大家要記住,今日民主政制嘅設計,目的係要保護資本主義制度。炒股唔理政治,由得保皇黨亂嚟,荷包受損又邊個負責?

但依家一句到底,勁假時段邊個要負責,一定要查個水落石出。

1 則迴響

Filed under 香港政治, 財經

廿一世紀浸豬籠世界

繆美詩:14歲媽媽

在TVB果啲清末民初電視劇,成日都有將「狗男女」浸豬籠的情節,浸豬籠嘅情況你完全感受到偽道德暴民原始暴力有幾得人驚。

如果你以為依家廿一世紀,香港人係有所進步,咁你錯勒,由14歲媽媽整博客最後因為班網絡塔利班圍攻,搞到被迫關閉,大家就明點解X光社呢類組織咁鬼有市場。

無錯,14歲同人搞大咗個肚係「膠咗」(果位經手人仲係犯刑事罪添),但依家果位媽咪需要係社會嘅支持同諒解,始終佢肚裡面果個係無辜,但依家好多網民暴民,思想仲喺清朝,邏輯不清,只係要女果個去浸豬籠(果班人一定無諗過一屍兩命、人權果啲問題,因為係清朝思維),但男果個,點解無人鬧,十四歲母親嘅家長,又去咗邊,教仔教唔掂永遠無人怪個父母唔負責任,點樣幫個十四歲母親,又點解無人講。

何以X光社或者原教旨主義教會竟然有市場,因為呢班友信唔係基督,而係中國明清兩代的偽道學,只不過換咗個西洋包裝,大家以為呢樣嘢係現代,事實上,有唔少人嘅思想,係拒絕現代化,否則點會有果班支持《淫審條例》收緊,自己唔識教仔又要政府代佢教仔的不負責任家長。香港社會文化同思想上的改革,仲有大把嘢要做。

11 則迴響

Filed under 社會批判, 回到清朝系列

唔好俾證監潛水黨脫逃

曾 俊 華 : 港 交 所 正 討 論 取 消 收 市 競 價 時 段
2009-03-12 HKT 07:45
財 政 司 司 長 曾 俊 華 表 示 , 港 交 所 正 就 取 消 競 價 時 段 進 行 討 論 , 在 適 當 時 間 會 有 公 布 。
他 又 說 , 證 監 會 正 調 查 匯 控 股 價 波 幅 一 事 進 行 調 查 。 至 於 政 府 會 否 就 手 上 持 有 的 匯 控 股 份 進 行 供 股 , 曾 俊 華 說 , 政 府 有 適 當 的 制 度 去 作 決 定 , 不 會 公 布 決 定 。

依家至嚟討論?搞到大批散戶中招,兼且成班友憤怒到要出菜刀、西瓜刀、牛肉刀嚟斬人至去討論,仲唔係即刻取消添,如果唔加多兩錢肉緊,政府分分鐘仲會拖,所以,在勁假時段問題上,大家唔好放鬆。

仲有,證監班茂利到依家都未浮過上水,解釋點解批准勁假時段出現,如果大家以為取消勁假時段可以收貨,日後一樣會有膠事,依家政府、證監同港交所,已經組成硬膠三合一,唔將呢個硬膠組合打破,睇嚟大家都唔駛投資香港股票。

1 則迴響

Filed under 財經