Daily Archives: 13 二月, 2009

應拗唔拗

近日小弟博客推出纏擾政策,要訂這樣的政策,當然要研究香港以及各國法律對纏擾係點規管。老實講,睇完香港的情況後,我真係想鬧爆果些浪費時間在《家庭暴力條例》定叫《家居暴力條例》班膠人。

政府新聞公報:法改會發表《纏擾行為研究報告書》

依家香港法改會有兩份重大法律改革建議,至今政府仍然拒絕落實,一個係收數公司規管,一個就係2000年10月發表的《纏擾行為研究報告書》。

雖然纏擾規管有可能會過強,影響狗仔隊的採訪自由,但被纏擾的人那種日日食驚風散食到飽,警察完全幫唔到佢的情況,根本係另一種暴力。如果蘇穎智那棚人,認為保護弱勢咁重要,點解唔要求政府儘速將部分法改會建議落實,而係浪費大量人力物力在家庭暴力條例個名上面?

事實上,部分土共可以如此明目張膽,對泛民支持者或泛民成員作出滋擾行動,都係因為政府遲遲唔就纏擾行為立法,唔好話俾我聽政府為咗某些人的hidden agenda,置普通市民的安危於不顧。

所以禮拜日早上我實去遊行,情況實在太黐線。

3 則迴響

Filed under 香港政治

政治酬庸的壞習慣

通常政治酬庸出現的頻密度,與一個地方政治腐敗度成正比。

像馬來西亞,為何有一堆華人明知國陣是膠都要黐,因為這些膠人支持國陣,國陣就會給他們一堆好處,例如工程合約、國營企業董座等等,所以馬華公會、民政等,出賣華裔出賣得相當心安理得。而台灣,就國民黨和民進黨都拿國有企業的位子,用來酬庸自己的黨員。不過民進黨好一點,至少陳水扁時代也派了幾個有能力的人整頓國有企業,台鹽、台糖等今天都可以自立。

而劉皇發這傢伙,一如小弟之前所講,港英年代不會考慮的人,何以進了行政會議?更要明知劉皇發要避席又避席,不可能參與新界基建有關決策,都要讓他做?這不是政治酬庸,沒人信。

政治酬庸爛風一開,香港政局就不注定不爛不成,因為這種貪污,事實上難以法辦,人人都明知有人在賣官鬻爵,但是就是沒人敢講半句真話,這又是香港第三世界化又一明證,鳴呼。

延伸閱讀:
繆美詩:新界王與大話王

4 則迴響

Filed under 香港政治

南洋政治特色(一)

我之前都講過,鄭赤琰在中大政政系教南洋政治,大家以為佢講笑,以為佢無厘正經,查實係錯,因為南洋政壇確實同高登差不多。近日霹靂事變有些事,如果我在大學講書,怕且會忍不住全程用高登文來講,因為班友的做法,真係膠味濃郁。

1. 講潮語有乜所謂

大家好奇怪,點解小弟報紙寫文章好溫文,但博客上潮語滿天飛,查實南洋人講政治起來,乜潮語都講得出。霹靂州務大臣尼查(民聯),可以在公眾演講度,用廣東話(記住,馬來西亞係廣東話通行地區)號召選民「隊冧」國陣,香港怕且無人講到咁激(社民連三子除外,我相信佢地的能力)。馬拉人都可以同你講潮語,所以在南洋政治演講,話踢走垃圾,送人落巴生河呢類嘢, 真係好閒。

當今大馬中文版:尼查要霹雳州人民“干掉”国阵

不過開出呢些硬膠先河又係國陣,候任首相C4納吉成日話要用華人的血來浸馬來劍,咁結果本來好吃得辣的馬來西亞人,下下講政治都去到盡。

2. 投訴X、報警X特多

在高登,好多投訴X、報警X,投訴X好多人都會做,而且好多時係曲線,欣宜領教過,但報警呢家嘢呢,南洋係朝野雙方都好鍾意真係去報警。

好似最近霹靂事變,巫統報警屈民聯叛君,民聯以牙還牙一樣去報警,如果大家唔明點解有人會去投訴《崖上的波兒》,大家睇南洋的報警X政治,就明點解。

獨立新聞在線:倪可汉促警逮巫青团
當今大馬中文版:民联举报赞比里犯下三宗罪

所以,小弟奉勸土共,唔好成日玩膠,南洋就係日日有人硬膠,結果大家都侷住玩到個政府膠到無朋友為止。馬來西亞有ISA(內安法令,可以拘留異見人士幾年而唔駛審),成班友都撲出嚟玩到你謝,更何況香港?

1 則迴響

Filed under 南洋政治