Daily Archives: 十二月 3, 2008

香港幾時會膠爆

我真係好認真咁討論,香港會喺幾時,膠到有成班友佔領機場、畢打街等等,然後解放軍定差佬,諗住點解決香港成棚憤怒到爆嘅民眾。

點解我要咁認真咁討論,好明顯12月3日在跑馬地同北大嶼山高速公路爆發的士罷駛事件,只不過係核爆連鎖反應的第一步。泰國撤僑撤出膠事件,令成個特膠政府的公信力,以至管治能力一夜崩潰,全香港都睇到香港進入無人駕駛狀態,加上政府的士政策,同交通政策,已經膠到無朋友。林忌一次,兩次,三次都警告會硬膠,政府都唔聽,結果咪搞到依家咁。

如果政府唔實行補鑊政策,班的士佬係唔會罷休,換言之,警察拉的士佬,拖走的士,只係止咳,唔係解決問題。

可以肯定,2009年一定係膠到無朋友的一年。

5 則迴響

Filed under 香港政治

范記必去

林忌剛由中大返嚟,大家都知林忌都膠的感應力係強到爆燈。佢對范克廉樓讚不絕口,他認為12月4日畢業禮,以及12月7日中大Home Coming Day,范克廉樓都去必去景點。

范克廉樓有乜好去。先有膠力十足的膠樽義收行動,果日為咗環保,記得飲完水,將膠樽交去膠樽義回收運動,會有人識用好有趣嘅方法,將啲膠樽用在環保,同埋玩謝膠樽義嘅行動上。

仲有范記樓上陳克勤校董有關嘅banner,亦係必影嘅勝地。

我可以講,呢班中大學生,十年後係社運主將,果時的社運唔會得個鬧字,反而會將班膠人膠官恥笑到底,香港政治會係另一番新景象。

3 則迴響

Filed under 香港政治, 惡搞, 中文大學

一鑊泡過後(中場休息篇)

各路高官救泰國撤僑撤出膠搞出來的政治火災,搞到成街都係化學泡沫,以及議員們口水做成的口水泡,名副其實一鑊泡。依家場火好似熄咗,雖然明知遲吓成棚議員,一定當雷曼迷債件事咁處理,追斬李少光、唐早逝等十萬九千條街,但好似講波咁,都係要做吓中場檢討。

1. 泰國出咁大鑊的事,任何政治問責官員最基本要做,未必要撤僑,但一定要取消休假,指揮大局。成件事最令不可以原諒係,李少光竟然咁都唔取消休假,唔取消外訪,加上張琼瑤呢條友,硬膠紀錄厚過電話簿,七一後政府總部出入管到實就係她搞出嚟,你諗吓一個靠擦上位的AO,會做出乜決定出嚟?

2. 喺資訊發放果度,政府又係亂過亂世佳人。點解政府會膠到只係依靠1868,如果政府有個email或SkyPE熱線,係專門收集港人在泰國嘅聯絡方法,特別手機號碼,係唔係成個資訊發放同溝通會簡單n倍?

3. 查實成棚人湧晒入芭堤雅又係問題,因為唔少人係經泰北清邁走,唔係布吉或芭堤雅,查實清邁情況係點,政府究竟有無做過可行分流撤僑方案嘅研究。

總之,成堆問題,我估立法會實要用特權法開Select Com,到時買定花生。

之前Rachel評論泰國撤僑件事的文,我已經推介過。以下係林忌同李兆富的文,都好值得參考:
林忌:慢黑鈍的管治藝術
李兆富:曼谷馬後炮

最後,要讚一讚泰國通胡慧冲,佢搞的泰友營不單在協調資訊上比政府仲勁,而且網友的討論為日後調查呢次泰國撤僑撤出膠事件留下寶貴的原始資料,多謝。
泰友營:滯泰港人支援中心

4 則迴響

Filed under 香港政治

在中國人社會,做評論何其難

米芝蓮飲食指南出了針對香港和澳門食肆的版本後,一堆香港所謂飲食界人士,指責結果不符合中國人口味,要多些華人做評審,物物乜乜,令人搖頭。

首先,米芝蓮飲食指南並不是米芝蓮的本業,而是米芝蓮公司為了促進駕駛人士多出去走走搞出來的東西,所以米芝蓮公司不用賣飲食界的膠人帳,米芝蓮指南只是向其讀者,亦即法國及歐陸地區的讀者負責,用法國人眼光來評論香港食物是正常過正常。特別法國人飲食講究氣氛,飲食的環境優劣與食物本身同等重要,如果加了一堆華人來評,不倒米才怪。特別中式酒家的嘈吵問題,也不是第一天才知。大家認為在中式食肆談情,是一件浪漫的事嗎?

米芝蓮飲食指南之所以有公信力,因為米芝蓮公司本身推出指南時,採用的匿名評審制度,避免公關公司和鱔稿的問題,以至星級制度等等,如果中國人真的不滿意米芝蓮指南,那有沒有飲食界以外人士可以推出一個制度上有見得到公信力的飲食指南?

當然,飲食的品味,以至評論的取向是可以批評,Pixar的電影《五星級大鼠》事實上是幽了評論人,甚至米芝蓮指南一默,不過呢,亦請中國人以Pixar方式去回應米芝蓮指南,而不是大搞文化固步自封主義。

後話:我一直認為,Pixar的《五星級大鼠》是評論人以至藝術工作者本身應看的一套片,這套動畫點出了作為評論人以至藝術工作者應有的態度,以及英雄莫問出處的平等精神。Pixar的動畫,幾乎部部都睇,包括發現我本身同主角都好似的Wall-E。

====
參考閱讀:
米芝蓮公司的匿名評審方式介紹

9 則迴響

Filed under 英國與歐洲, 文化批判