月份彙整五月 2011

剛過去周日嘅城市論壇，由於話題同嘉賓都惹火非常，加上謝志峰請了病假，由李小薇當主持，結果節目花生位不斷，而發言混亂是可以預料。 在一個正常有議會民主嘅國家，呢種火花四濺嘅會議，正係訓練政治人物能力嘅場所。 喺英國，House of Commons議員挪揄首相，發言鬥快起身，喺日本，枝男幸男未入內閣前，專門係喺議會搗亂秩序，之所以出現咁嘅現象，因為首相同議長唔係代表主權，佢地都係議員，簡單嚟講，大家都係咁高咁大。所以，除非極之離譜，否則首長同議長都無權威去趕議員出議事堂。要令到議事有效，唯有道理上KO對方，或者等公眾認為搗亂果條友係硬膠，否則乜都做唔到。 而英國嘅議員，查實係由武士演變出嚟，英國本來喺國王要徵稅，叫各郡選四個武士做代表傾掂數，咁嘅傳統得出嚟，大家都諗到點解個議會似中大學生會。所以主持會議嘅手腕，好睇到果個人嘅政治修為。做Speaker of Parliament，絕對需要政治道行高嘅人嚟做。 城市論壇經過咁多年發展，依家出席嘅人，全部都「武夫化」，個個都係為咗上嚟為自己政見鋤人而嚟，所以主持要控制現場秩序，要係議長咁嘅政治功夫，李小薇喺城市論壇嘅表現，可以睇到唔係佢做主持唔掂，佢做薇薇語主持好得，而係《城市論壇》主持，需要係政治修為，多過一般主持人應有嘅修為。好彩昨天只係「半星賽」，唔係「全星賽」，如果「全星賽」嘅話，真係除非謝志峰出嚟主持大局，否則唔會掂。 所以唐英年動輒投訴議員行為不檢，只係證明佢係政治白痴，連基本ABC都唔識就學人做政務司司長。個個都怕乜嘢擲蕉之類嘅沉悶動作，只代表香港人普遍政治水平有待提升。

黃世澤：馬拆圓環、郝拆女巫店 當驚傳郝龍斌要拆掉女巫店時，特別不少香港人都感到擔憂時，筆者二話不說就在自由時報出筆，參與捍衛女巫店。 馬英九搞得圓環夜市人不人，鬼不鬼，是小弟不得不出手的原因，國民黨沒東西多，中國膠最多，自己不懂管，就一味禁絕，小弟素來好美食，圓環夜市己經給你藍營搞砸了，現在因為胡志強管台中管得低能，就要台灣獨立音樂的搖籃女巫店陪葬？那還成世界的嗎？ 更何況趕絕台灣的獨立音樂，很可能是讓中國藝人大軍湧至的陰謀，畢竟藍營那些人己經不可能捍衛台灣了，所以小弟不得不出手。現在不阻止，很可能日後大家只能去南台灣，才能找到大家一向認識的台灣。

一九八九年北京大屠殺紀念日臨近，果啲話你GMail戶口lock咗然後呃人密碼嘅hihi又出嚟搵食，由於小弟識睇HTML同email原始檔，所以睇到有以下句子，己經知道係中國國安嘅膠嘢。 「form action=3D”http://mail-by-google.dyndns.org/manage/index=.php” method=3D”get”」 小弟由Robtex.com，查翻呢個停咗機嘅domain，指向係210.245.228.43，一個新世界電話嘅IP Address，而一開網頁就係21英語網，一個中國學英文公司嘅網站內容，好明顯係借21英語網嘅舊版內容掩人耳目。亦即可以咁講，210.245.228.43嘅用途，就係用嚟偷人password。 而香港有唔少Data Center，喺香港做埋呢啲不誠實使用電腦嘅事，我想問曾偉雄，幾時打算認真對待吓呢啲真正嘅犯罪行為，定係擺明係國安人員搞鬼，曾一哥唔打算執法，縱容犯罪？

「兩 男 女 涉 嫌 假 扮 記 協 晚 宴 賓 客 偷 竊 被 捕 2011-05-21 HKT 03:51 兩 名 男 女 涉 嫌 假 扮 賓 客 ， 在 金 鐘 一 間 酒 店 免 費 … Continue reading →

喺香港政局越嚟越膠果陣，係時間有時睇番歷史，同其他國家嘅文化，免得自己血壓上升，但對事情一啲益處都無。 喺去年休博日後，香港局勢惡化到變一舊膠咁，基本上講乜嘢修修補補方法都係多餘，比較實際嘅，可能係諗吓嚟個大破之後再嚟個大立。 而明治維新，係小弟一直留意嘅重點，特別坂本龍馬。 喺論述上，坂本龍馬有兩個重要貢獻，一個係提出船中八策，今日日本嘅憲政架構，都離唔開船中八策嘅大框架。一個就係提出日本國嘅理念，令大政奉還明治天皇講得過去。 日本國呢個理念，係源自大明帝國亡咗之後，大明帝國唔少學者流亡日本，最出名係朱舜水，佢幫德川光國編修用中文寫成《大日本史》（睇過《大日本史》原文就知，成本用中文文言文寫，本書唔係用日文寫），當時嘅理念係中華文化代表大明帝國己亡，中華文化正統由日本人繼承。但當時日本國論述未通行全國，至少對武士嚟講，佢地效忠佢地個藩，比成個日本國本身重要。 係坂本龍馬作為一個武士，提出一個「日本國」論述，咁樣日本嘅藩與藩之間嘅鬥爭，至變成一個全國性救國自強運動。坂本龍馬建構咗日本嘅全國定位，令明治維新有明確方向，同大清帝國由一個外族政權執掌，而中國人又無歐洲果種異國異族國王都接受嘅慣性，領導改革變咗方向不清截然不同。 香港人，係時候諗清楚自己定位，當然，大中國定位肯定係唔掂，明天再談。小弟高度建議各位，煲有線娛樂台播緊的大河劇《龍馬傳》，果段時間嘅日本史，對我們係極有參照價值。

今日中國最花生嘅新聞，當推武漢大學有人向北京郵電大學校長，防火牆之父方濱興擲鞋同雞蛋，但無人被捕。 方濱興被人怒擲雞蛋和臭鞋，因為中國正常網民嘅生活被呢隻中共走狗玩殘，連facebook都上唔到，中國人對呢條友擲鞋擲得遲，好彩武漢都無負辛亥革命發源地之名。 由於在網上好多贊助第二次向方生擲鞋嘅行動，睇嚟條友都唔駛出街，好多人準備搵佢做沙包。 後話：今次方生被擲，最驚係特首，連中國都玩到出臭鞋同雞蛋，如果之後特首被擲，叫佢搵方生算賬。

張炳良：新加坡選舉的啟示 小弟睇完之後，眉頭全皺，因為條友唔熟南洋民情就亂寫一通。 新加坡贏得一個選區，唔只贏得國會議席咁簡單，而係個選區嘅市鎮理事會（Town Council）都係佢地控制，無執政能力嘅政黨根本可以即時收檔。而集選區管廿幾萬人嘅日常生活，五條友分工係咁，己經反映果個政黨嘅質素，呢個亦係一直以嚟，反對黨攻唔入集選區嘅原因。 今次工人黨贏兩區都係以Comfortable Margin嚟贏，因為工人黨唔只年輕化咁簡單，而係後港市鎮理事會有實績可以跟，喺新加坡選舉其中一點一定打，就係你管唔管得掂Town Council，喺私樓地區，即係無咁依賴Town Council未必咁睇（所以實龍崗地區行動黨輸得最慘），但組屋為主地區，你無管Town Council能力就返屋企瞓覺喇。以往工人黨都未必贏到中間票，只能贏原本靜山、友諾士集選區殘餘部分嘅工人黨鐵票，但劉程強用佢喺後港市鎮理事會嘅實績，就可以連中間票都拎走。 所以兩黨制論述，唔係外國人講，係新加坡人，同埋小弟呢種長期分析新加坡政治嘅人自己講。小弟明白，新加坡步向兩黨政治，PAP嘅所謂培養政治精英方式破功，對曾蔭權影響好大，但現實擺在眼前，工人黨有執政經驗後，會一個個集選區攻落嚟，好可能會出現，日後新加坡政治由幾個容易轉變陣營嘅集選區或單選區決定嘅局面，呢個係西敏寺政治典型遊戲規則。行動黨要攻番阿裕尼落嚟唔係咁容易，特別知道阿裕尼集選區同靜山集選區、友諾士集選區嘅淵源果陣，就明白呢次點解係決定性戰役。

呢班新界佬可能平日都大口氣慣，睇嚟鄉議局開會應該膠bite輩出，膠到核爆。點知呢班大口友，唔記得今日佢地啲偉論係會上電視，TVB新聞部班友似乎真係打算送佢地一程。 我睇法好簡單，呢班友係搞革命至好，咪牙斬斬，講咗無件事發生，否則真係變晒高登啲走數人士。佢地好有潛質，呢個月當選每月之星，因為佢地當眾淆底嘅機會太高呀。 今日啲新聞，全部膠力十足，我都買唔到花生。

「政 府 擬 新 安 排 防 議 員 辭 職 後 再 參 加 補 選 2011-05-17 HKT 16:28 政 府 建 議 ， 日 後 地 區 直 選 以 及 新 增 區 議 會 功 能 … Continue reading →

以上圖片由高登人截取嘅 一朝早起身用個iPad當示威牌，當然唔係貪好玩，港鐵加價相關討論，成日聽啲土共要加優惠聽到耳仔生青苔，所以直頭喺立法會叫鄭汝樺返去早抖。 用iPad當示威牌，當然唔係貪佢潮，而係僭建聯班友依家要求立法會開Panel Meeting，唔准帶示威牌、標語等道具，仲要經過X光機同金屬探測器，慌死自己會被拉登搵上門咁。咁唯一可以避過有關規定，就係用電腦同iPad當示威牌。後嚟至知，鄭家富係准人帶示威牌。證明係僭建聯班友特別怕死，可能驚大家都幫屋宇署追佢拆僭建物啩。 我口才唔好，只不過我講都好簡單，港鐵喺地產都賺大把錢喇，仲加價，仲要鄭汝樺之前唔准專線小巴加座位唔加價，目的原來係為港鐵加價鋪路。港鐵賺咁多做乜，唔知鄭汝樺答唔答到我，但我睇，鄭汝樺收納稅人咁多錢都唔知用嚟做乜，不如早抖吧。 後話：標語牌上面嘅係「小丑神」，唔係「膠神」，唔好搞錯。