無硬碟可用嘅年代

喺依家成街嘅人，都周圍搜購Hitachi嘅硬碟，因為大家都對Western Digital欠缺信心。而Seagate今日又宣佈食咗Samsung嘅硬碟部門，全世界剩番兩間半硬碟公司（東芝只做2.5吋），個搶購形勢會加劇。

由依家到SSD普及前，相信都有一段大家要煩無可靠硬碟可用年代，因為Seagate同Western Digital嘅可靠性都被人媽到飛起，而且硬碟價值喺市場剩番兩雄爭霸之下，應該會貴番啲。

只不過Seagate嘅併購申請嚟得太快，而Western Digital同Seagate各自嘅合併申請都係未過反壟斷法審查，隨時結果係是但一單收購案被否決。而Western Digital同日立嘅併購案被否決機會大過Seagate，因為三星喺硬碟市場上係最勢弱果個，監管當局否決理由唔強，但Western Digital同日立係旗鼓相當，監管部門否決嘅誘因大好多。

但可以肯定係，復活節砌機黃金檔期，未必咁易買到價格合理嘅日立硬碟。