月份彙整四月 2011

香港無咗《風波裡的茶杯》呢個節目後，一方面，香港無咗個大鬧鐘，另一方面，有一大問題係，好多睇嚟鎖碎，但係好膠嘅問題，日積月累，多如牛毛，根本無人理。但呢啲好膠嘅問題，好多背後都係大問題，係要開file長期跟進。 昨晚《講東講西》講嘅兩個問題，或者可以咁睇。 1. 有馬迷打上嚟投訴，近日香港賽馬賽事位置彩池，經常出現10.1派彩，所謂10.1派彩，就係熱到無倫嘅馬最低派彩。落10元注，收10.1。正常馬迷係唔會賭呢家嘢，因為賺得極少，但風險大過所得，所以熱過龍，但近日經常有大手投注落啲10.1馬度，咁大家諗吓有乜事發生咗。賭過馬嘅，都估到有人借馬會進行不正常行為。 2. 有做工程嘅投訴，新樓嘅分體式冷氣機冷凝器所擺位置，你根本更換唔到冷凝器，但如果遇上颱風，支撐冷凝器嘅支架出事，就可能成部飛落街。依家唔係問題，但若干年後就隨時釀成命案，但完全無人理。究竟香港發生咗乜事？ 黐線問題越嚟越多，對民生嘅干擾越嚟越嚴重，我覺得個社會唔出事就真係奇。

繆美詩：長俸高官 海事處前助理處長退休後去信德返工，政府唔批仲聲大夾惡呢件事，我都想出聲好耐。 英國人發明長俸制目的，除咗高薪養廉，仲有一樣，就係唔想你退休後再入職私人機構，特別華人高官。英國嚟嘅官一般退休返英國本土，佢地返到去除咗退休真係無嘢做（做上議院終身貴族另計）。但華人入一職商業機構，用埋自己啲關係玩嘢，delay interest就咁出現。 信德中旅船務係經營港澳噴射飛航，同呢條友過往喺海事處人事網絡無關？你呃鬼食豆腐？ 問題係，近年有啲退休公務員，學晒梁展文咁，無恥無極限。好似梁展文可以公然入番新世界做嘢，小弟覺得呢條友知唔知個醜字點寫架。由小弟喺商台做果陣，紅灣半島同佢開file到依家，佢條友一啲悔意都無，咁都得嘅？（2004年2月，小弟喺每日報告建議大班長期追殺紅灣半島事件，成件事就咁開始） 雖然警務處長在任期間被人媽叉多，但李明逵同鄧竟成無意入私人機構，退休就係退休，值得尊敬。王永平平叔在任期間都經常被人插，但退休後喺大學教公共行政，更點出唔少政府嘅錯誤，陳太位處政務司司長之尊，更加投身民主運動，我相信香港人要係呢種退休官員，而唔係梁展文同秦炳輝呢種人。

「 作者 : 自大 （IP： 222.166.181.131 ， cm222-166-181-131.hkcable.com.hk） 電郵地址: thesal@gmail.com URL : Whois : http://whois.arin.net/rest/ip/222.166.181.131」 自我國大婚後，呢條友就發咗膠post幾次，我諗佢都係想我公布佢IP，然後方便領番人工，咁可以成全佢。 只不過，one more thing Stop Forum spam IP check Date IP address Username Email Address 23-Apr-11 11:39 PM 222.166.181.131 QuickCowys needheal@gmail.com 3-Apr-11 12:53 AM 222.166.181.131 … Continue reading →

今日我國大婚，喺香港引出好多人都估唔到嘅親英浪潮，由facebook到討論區，本土出生嘅親英言論，到成堆五毛慘要浮上水。 小弟毫不諱言，小弟唔單只親英，仲支持英國君主立憲制度（我個人簡介畫公仔畫出腸），小弟贊成保留皇室。對親英嘅理由，對支持皇室嘅理由，小弟一一講述吓。 1. 先講君主立憲，好多人以為我國皇室係好浪費公帑。至少比起其他歐洲皇室，我國皇室睇嚟比較鋪張（緊隨其後係漢字系國家日本，但日本天皇制度廢咗仲大鑊，亦唔會有人贊成廢咗佢）。但講真，你就算廢咗皇室，白金漢宮嘅維護、保育，亦即係皇室開支嘅最大部分，你共和制都要俾，但俾咗保育開支，除咗白金漢宮可以好似奧地利維也納個舊皇宮 ，可以用嚟俾平民舉行婚禮，以及有歷史保育作用外，仲有乜作用。但你俾多少少娛樂等駛費（英女皇自己另有財產，同公家條數分開），就有埋憲制、外交、文化產業等功能。而且成筆費用，其他共同擁戴我國國君做君主嘅國家，一蚊都無俾。四千萬英鎊皇室駛費，平均每人一英鎊都唔夠。咁今次婚禮就算加埋警力等駛費，可能多咗一筆，但係喺我國經濟起嘅刺激作用，己經值回票價，你諗吓BBC收幾多轉播費？呢筆費用唔係皇室，係BBC Worldwide袋。 2. 喺君主立憲制國家嘅議會，首相係可以隨便鬧，日本枝野幸男以往搶預算委員會主席張紙嘅膠嘢，大家都有眼見。其中一個原因，因為首相係國王嘅僕人，咁你班平民點郁佢都唔會有辱國體。香港以往係總督等同女皇，所以大家唔適合喺議會郁總督，但如果行政長官繼承唔係總督權力，而係總督權力喺香港轉到政務司司長（布政司），然後大家喺議會郁佢就隨便好多。君主立憲，就好好咁解決國家主權象徵嘅尊嚴，同人民對政府不滿兩者平衡嘅問題。日本嘅首相，成日都「用完即棄」，就係天皇永遠都係佢，但征夷大將軍唔掂就可以炒。 3. 仲有，人類始終需要童話，我國本土對大婚都未必美國重視，好多追捧我國皇室熱潮，一方面同其他共同擁戴我國國王嘅國家，例如加拿大、澳洲有關，另一方面，君主立憲保留童話果種夢，呢個亦係唔少歐洲國家由共和走向君主立憲嘅原因。尼德蘭（荷蘭）係由民國變王國，同樣嘅，西班牙亦係共和體制走回君主體制，但得以實現民主。 4. 國王存在，亦令流血革命或政變難以發生，因為軍人效忠係國王，如果國王決意捍衛民主，政變就消弭於無形。西班牙就係，西班牙嘅民主英雄係國王卡洛斯，呢位王子由佛朗哥手上取回權力登位後，就實行君主立憲，左派得以透過選舉上台。之後長槍黨人一度兵變，但國王出來勸說後，長槍黨人根本無法叛君，民主得以不用流血保持。歐洲好多「社會主義」國家嘅理念，甚至同皇室息息相關，最典型係瑞典。瑞典式社會主義，同皇室係互為表裡，所以歐陸好少左派膠到公然反對君主立憲。呢樣嘢，好多時我國同澳洲共和派，甚至香港一啲社運分子都諗到唔湯唔水。 5. 小弟親英，當然同香港有關，但亦同家庭背景有關。小弟祖母一系屬海峽殖民地檳城人，檳城、馬六甲、新加坡華人不少被稱為皇家華人，因為他們一般效忠英國。而他們效忠英廷嘅原因，因為南洋華人，清政府視為叛逆，亦不予保護或承認。不少人因英國人提攜受良好教育，受到尊重，最典型例子，就係精通西學嘅一代怪人辜鴻銘，辜鴻銘以中華文化傳播者自居，但佢一直備受西方尊重，因為西方人當佢同路人看待，所以唔少南洋華人係親英。 6. 對華裔印尼人嚟講，當你嘅家鄉印尼當年排擠你，中國為咗政治理由，用完你，之後想鑿你嘅錢，然後又唔認你果陣，咁我國管治下嘅香港，收留咗我，仲俾我讀書，成長，咁你會親邊個國家。對於出賣過我嘅中國，我無效忠嘅理由。印尼撥亂反正都好，但我生喺英屬香港，所以我認印尼為鄉，但英國為自己國家。神舟五號事件裡面，《大公報》丙我相對輕力，除咗因為我係small potato，另一方面，佢地自己清楚，中共欠華裔印尼人果筆債，還足九世都還唔完。南洋華人身份問題被中共搞到一鑊粥咁，甚至不少人因你中共搞屎搞尿家破人亡，你老共有面目面對我地南洋華人咩？ 7. 對唔少因逃避共黨暴政而嚟到香港嘅華裔及後代，佢地忠於英國（我國）絕對有理由，邊個俾佢自由土地，可以發揮所長。如果唔係當年老共阻止，楊慕琦計劃搞唔成，香港己經同直布羅陀咁喇，有殖民地之名，但行自治領之實。仲會有乜嘢BNO、英籍平權等膠事乎？所以小弟對中國果種反感，係有歷史因由。 對於果啲五毛黨，我只會覺得為咗五毫子出賣靈魂，真係只能用個賤字嚟形容。

由於可能受住香港成堆親英人士壓力，香港四大電視台都會播放我國皇室大婚，但小弟根據不同口味，以及需要對我國文化認識解說，作出唔同建議。 A. 本身英語能力足夠，唔想有廣告中斷，或者一啲不必要廢話 BBC One（本土廣播）同步 英國標準時間0800（UTC/GMT 0700）開始 – VPN – 有線電視/PCCW NOW BBC Entertainment台 ITV 1 – VPN Youtube皇室大婚頻道（屆時將會英國皇室官方提供訊號） B. 需要略多解說，但大致上應無廢話 英國標準時間0800開始 BBC網站（轉播主要為BBC News本土訊號源，但多點解說資料配襯） C. 需要粵語解說 香港時間下午1700開始（英國標準時間1000） 有線電視（由陶傑解說，佢出手，我認為無問題） D. 香港免費電視台（可能有廣告中斷，英文台） 香港時間下午1400開始（英國標準時間0700） PCCW NOW直播台 香港時間下午1500開始（英國標準時間0800） 無線明珠台 香港時間下午1700開始（英國標準時間1000) 亞視國際台

「政府推七招限制內地孕婦 (16:38) 食物及衛生局長周一嶽表示，盡力優先照顧本地孕婦及嬰兒，杜絕非法中介人謀利和濫收非本地孕婦活動。 周一嶽下午和公私營醫院代表今日就產科服務舉行會議後對記者表示，雙方同意要盡力優先照顧本地孕婦和嬰兒；維持高質素專業水平，保障孕婦和嬰兒；使婦產科和兒科可持續發展；以及有效杜絕非法的中介人活動。 他表示，為了達到以上目的，將要推出七項措施： 第一，非本地孕婦要先適當檢查後才能到港分娩。 第二，給內地孕婦預約入院證明書日後由衛生署統一發放。 第三，邀請婦產科專家制訂指引，讓公營和私營醫院有統一檢查方式。 第四，要求婦產科服務檢討人手和服務量，以決定是否要調整。 第五，致力打擊非法的中介人活動，包括醫生收受非法利益，濫收病人等。 第六，基於以上共識，要成立工作小組，下月底前制訂配套方案。 第七：工作小組每年首季決定下一年的非本地孕婦接收數」 七招裡面，有一招真係work，就係衛生署長統一發放預約入院證明書，呢個做法，同小弟喺時事全方位講入境處長副署做法係異曲同工之妙，只不過為咗捍衛醫療界自主，副署果條友叫衛生署長。只要衛生署長唔發呢類證明書，就乜都無得玩。 喺香港就係咁荒謬，要人地教你點樣用行政手段，繼小弟喺立法會教邱騰華立停車熄匙法後，又一鋪教立法教到真係政府做嘢，呢啲政府除咗濫用警力，仲有乜識做？

由於近日關於BN(O) EU居留權嘅查詢大增，搞到小弟要翻查唔同歐洲國家嘅法律，甚至國籍法。 而歐洲國家，好多都有一啲如果你係佢地殖民地前子民，可以特快入籍嘅情況。例如父母係菲律賓華僑嘅BN(O)，小弟一般叫佢地去西班牙住，因為西班牙一般俾菲律賓籍人士特快歸化入籍。印尼華僑嘅，如果父母出生喺荷屬東印度，就去荷蘭，因為都有類似條款。 但西班牙有一樣，好多歐洲國家無嘅嘢，但印尼都做過類近嘅嘢，就係為咗過往嘅歷史錯誤，可以拎番西班牙國籍。例如如果有人祖父母係因西班牙內戰緣故流亡海外，因而令自已喪失西班牙國籍，西班牙會俾番國籍你。而有祖先曾經參與過西班牙內戰，呢啲曾經捍衛過西班牙民主政制嘅海外英雄後代，全部可以喺無需放棄原有國籍下，成為西班牙人。 西班牙嘅做法，就同追俾印尼土著身份俾印尼出生嘅華人及後代嘅立法一樣（所以小弟喺2006年後，法律上屬於印尼土著），或者未必實質上幫到乜嘢，但至少實際上還歷史一個公道。 有啲歷史嘅責任，係事隔咁多年都要追，咁樣至可以防止悲劇重演。西班牙修改國籍法同時，附帶係要全國拆晒啲佛朗哥像，費時法西斯主義捲土重來。而東歐好多國家，都有類似清算共黨時期暴政嘅法律。小弟相信台灣，以至香港，日後都需要類似法律。 後話：西班牙仲有一條辣到無倫嘅反人類法律，就係反人類罪嘅司法管轄權包含世界每一處，法輪功係咁樣成功入稟法院告中國領導人。呢條法律嘅來源，係好多西班牙血統嘅人，喺南美果啲獨裁國家受迫害但正義無法伸張，所以有呢類法律出現。西班牙人用血嘅教訓，去提醒自己捍衛人權上嘅責任。所以歐陸國家講人權，反歧視，背後有深刻嘅歷史因由。

威廉王子嘅婚禮，喺香港都有人談論，本來兩個香港電視台，小弟懷疑側側膊唔多覺唔想直播，但無線同亞視英文台，最後可能喺香港眾多人壓力下直播，無線應該直頭用BBC訊號，但中間斷咗新聞。（如果唔想斷新聞，就自已用UK VPN上BBC，但BBC iPlayer同VPN可能果日都會塞爆）。亞視就唔知，或者大家可以睇Youtube直播（小弟深信Youtube技術應付到）。 威廉王子呢次大婚之所以注目，一嚟佢係戴安娜王妃個仔，戴安娜係引領我國進入Passion年代嘅人，佢娶平民做王妃，大家都唔希望重演佢阿媽嘅悲劇故事（但應該唔會）。另一方面，佢好可能成為英國國王，呢樣都好重要。 唔理你認唔認同英國王室都好，一個無法否認事件係，英國國王係我國、紐西蘭、澳洲、加拿大等國嘅共同君主，佢呢次大婚同之後嘅表現，會影響呢堆國家對立憲制度嘅睇法。 還好威廉王子唔係天主教徒，或者好似貝理雅咁，卸下首相一職後即刻改信天主教。因為英國憲制上，有一個同BNA 1981一樣，隨時同ECHR撞鋪勁嘅計時炸彈，就係法律唔容許天主教徒做君主。依家一直無case出現，所以應該好多年後都唔會撞，但呢個世界嘅嘢好難講。偏偏依家我國嘅憲制基礎，仲有成堆呢挺活化石喺背後。 所以皇室大婚，唔會係八卦新聞咁簡單。尤其英國國王，孭起十幾個國家共同君主，加一個國家最高部族首領嘅責任。

「 社 民 連 成 員 涉 撞 傷 曾 蔭 權 被 落 案 起 訴 2011-04-27 HKT 20:46 上 月 涉 嫌 撞 傷 行 政 長 官 曾 蔭 權 而 被 捕 的 社 民 連 … Continue reading →

新加坡將喺5月7日上演離開馬來西亞以嚟最激烈嘅選戰，87個議席，除咗李光耀領軍嘅丹絨巴葛集選區五席，因為反對派有人膠咗就不戰而勝外，其餘都會有人爭。 但真正焦點嘅選區只得一個，就係工人黨劉程強自己放棄據守廿多年嘅後港單議席選區，交俾工人黨其他人守土，佢自己聯合林瑞蓮同陳碩茂，攻打行動黨楊榮文准將領軍嘅阿裕尼集選區，2006年大選，工人黨喺阿裕尼集選區得到百分之四十四，即係話，工人黨有機會攻破呢個集選區。 如果阿裕尼集選區工人黨取得勝利，就會打破集選區對反對派不利嘅神話，新加坡可以緩慢向兩黨政治進發。 當然，工人黨呢幾年發展，同行動黨有啲相似，最似果樣嘢，應該係佢地選舉口號「邁向第一世界國會」，呢個口號當然好有效咁KO行動黨，但亦反映咗佢地思維同行動黨有相當共通點。佢地對內部安全法嘅立場（工人黨支持廢除ISA，但保留可以隨時拘捕恐怖分子嘅反恐法律，呢樣嘢喺南洋係無辦法），或者搵精英出嚟打，都反映未來兩黨制嘅新加坡可能係同英國一樣，英國無錯係工黨大戰保守黨，不過班友都係牛劍出嚟嘅精英。新加坡日後可能係工人黨大戰行動黨，但兩個黨都好似樣。 呢次新加坡大選，值得觀察。