停建核四

喺福島事件後，連小弟認識一啲好憎陳水扁嘅人，都認為當年陳水扁有一項決策，相當有遠見，連偏藍嘅人都欠其一個公道，就係停建核四。

當年蔣介石引進核能，既有發展核武嘅軍事考量，又有防止台灣因中國封鎖水域而達到能源自給自足嘅戰略思考，我唔可以話老蔣全錯，老蔣喺佢嘅年代嘅時空，佢引進核一、核二、核三係有道理。但到咗陳水扁年代，太陽能同風能都可以充分發展下，仲堅持建核四就黐線，特別台灣核電佔全國發電比率得兩成果陣，你仲建核四個腦唔知用乜嚟做。特別核四喺測試果陣，後備電力試過唔work廿八個鐘，大佬，咁樣足以重演福島核災難呀大佬，咁嘅核電站你點用得落呀。

另一方面，核一廠用嘅GE Mark I反應堆設計，同福島第一原子力發電所第一機組一樣，呢個GE Mark I機組設計係有問題，所以核一廠絕對唔可以延役，夠鐘就停用，因為己經唔係安全設計。就算用GE Mark III嘅核二廠，同埋用Westinghouse設計嘅核三廠，都要做Stress Test，決定可以用到幾時。

依家台灣要做，係充分運用台灣陽光充沛，同埋風力充足嘅優勢，發展可再生能源發電。由於核電只係佔百分之二十，呢個空位係有能力填補得到。講真，有部分國民黨人嘅腦殘思維，我己經完全唔識評論。