Daily Archives: 十二月 31, 2010

好坦白，小弟唔係iTV Coronation Street嘅擁躉，我想借套片嘅intro嚟講，一啲香港消失咗嘅嘢。 小弟以往讀書嘅地方又好，住嘅地方又好，同貓都係好有緣，小弟住喺北角舊樓嘅日子，層層都有一隻或兩隻無家可歸嘅貓周圍走，呢啲貓某程度係舊樓衛生系統嘅一部分，因為佢地好鍾意捉老鼠。無人管呢啲貓，只不過有兩三戶人會俾啲新鮮魚佢地食，日頭就懶洋洋訓佢嘅覺，夜晚老鼠就唔敢放肆。只不過，呢種天生天養嘅「獅子山下精神」就消失咗。 中大係一間傳統上唔係咁英國嘅大學，只不過，有樣嘢絕對係中大傳統，叫做中大貓，因為中大佔據成個馬料水山頭，實有一啲貓走咗入中大範圍。中大貓同啲舊樓貓又唔同，中大貓我可以叫做「公共寵物」，因為呢啲貓唔怕人，又成日走喺中大宿舍或者學生會辦公室附近，久而久之有愛心嘅學生、教職員餵養，呢啲喺中大自出自入嘅「中大貓」久而久之變成咗大家生活嘅一部分。而膠樽義仲係中大校長果陣，話太多流浪貓喺中大繁殖，要搵漁護署咁制，後嚟中大有校友同學生，入去幫啲貓絕育，雖然查實係有問題做法。中大咁多年嚟，都係咁樣人貓共處，你膠樽義管咁多把叉？ 英國iTV Coronation Street將流浪貓四圍走放入opening theme（到依家2010年版都係），因為呢啲依賴社區，但又唔係固定一戶養嘅貓，係城市人情味嘅一部分。所謂獅子山下精神又好，歲月神偷果種韻味都好，呢啲舊區人情味係不可或缺。但依家林鄭月娥嘅強拍，搞到田生地產大肆入侵。呢啲城市貓如果只係西方電視劇至睇到嘅回憶，我諗都係幾荒謬。

壓倒「繁榮」 市民最盼香港「公平」 對當政者嚟講，呢個係一個重要訊號，市民對大財閥主導一切嘅情況唔係太容忍到，己經變成咗明顯不過嘅現實。 依家己經唔係乜嘢八十後七十後定世代之爭咁簡單，而係呢個情況變咗「階級鬥爭」果陣，步向法國大革命果挺情況，好可能就係香港將要面對嘅情況。 唔知香港當政者，聞到棺材香未？