月份彙整十一月 2010

當新華社喺度玩「回帶」抹黑趙連海果陣，大家唔好再對所謂「阿爺」同中央有乜期望。 三聚氰胺件事道理好簡單，趙連海身為苦主，佢同時幫其他苦主抗議，仲要果啲受害者全部係細路，北京市政府老屈佢，呢啲己經係「生仔無屎忽」級嘅行為。而國家質檢總局班官，收咗黑錢可以任得啲有毒奶粉周圍走，呢啲根本係謀殺嚟，果班hihi到依家仲逍遙法外，中央依家唔係包庇緊罪犯，又係乜先？ 劉曉波你仲可以講係政治事件，雖然己經超級離譜，但趙連海簡直去到完全無法容忍嘅程度。中央決定包庇罪犯，咁唔好怪日後點解共產黨江山一夜玩完，禍來禍去皆自招。

大馬政評人李萬千，以前專欄個名叫「無關政治」，當然呢個係一個擺明玩膠嘅名，事實上，喺一個民生事務越荒謬嘅國家，民生問題越同政治有關，因為民生問題搞到一鑊泡，往往同政治息息相關。 好似膠州路火災，我諗係當中嘅例子。 高樓大廈大火本來就難救，所以小弟唔怪消防員，佢地確係盡力，呢啲係有啲科學常識都知嘅事。所以，現代都市防止慘劇發生，係用防火呢一環，但一講到防火呢⋯⋯呢個己經係執法問題。由床上用品、建築物料嘅防火標準，到建築物條例執行等等。 只不過，一講到執法呢個問題，中國既然出現過三聚氰胺奶粉，咁大家都估到中國喺呢方面有幾爛，仲未計政績工程等問題。最後講民生，就一定要講政治，至能夠根本解決問題。 所以，土共成日話要講多啲民生，講少啲政治，講少講政治呀？啲民生問題都係政治搞出嚟，唔通成功爭取綠燈多兩秒都叫民生？咪玩喇。

香港獨立媒體：林鄭受勳議會流　街坊白等氣難平 　遊行屢遭無理阻撓　基層表達原來咁難 你可以唔同意呢班舊樓居民嘅訴求，只不過，我想講作為一個Minister，或者一個Member of Parliament應有嘅態度。 1. 比較起英國House of Commons，Prime Minister每個禮拜都要回應議員應答問，特定的Minister或Secretary，一定出席Select Committee答辯，甚至直頭喺Main Chamber互片，特首唔成日出席答問大會都算，點解啲局長可以成日唔出現，搵啲AO上去受靶就算，林鄭月娥，呢啲係乜叉政治問責嚟㗎。如果喺英國，唔被人丙到收工就怪。 2. 跟住係議員，發展委員會今日有出席開會，多數係泛民主派嘅直選議員，班功能組別議員個個只係去睇受勳儀式。呢班友究竟知唔知議員做乜？功能組別呢班友點解要廢除，因為呢班友根本唔會有尊重議會嘅意識。 呢啲局長同議員，都係收檔吧。

聯合報：中國阻撓 和平獎可能不頒 「如果劉曉波的和平獎真的沒有頒發，那將是1936年以來的第一次。那一年的和平獎得主德國記者歐賽茲基 (Carl von Ossietzky)因重病而又未獲准離開當時的納粹德國而無法領獎。」 黃世澤：領導人一念之間 「而一九三一年，德國記者 Carl von Ossietzky因大爆納粹德國如何違反凡爾賽和約，被納粹德國政府控以叛國罪，但他維護正義的行為，在一九三五年讓他得到和平獎。納粹德國不讓他領獎，還明知他有肺結核都不讓他接受治療，最終在一九三八年死於獄中。當然，納粹德國日後遺臭萬年。」 照依家咁睇，中國唔改名做邪惡帝國都唔得，依家中國嘅作為，同納粹黨完全無分別，爭在唔知有無希特拉條友咁仆街（對住希特拉，最勁嘅粗口都形容唔到佢），連病咗都唔俾治療。 依家中國正向超越納粹德國嘅方向進發，照依家中國共產黨嘅硬膠度，中共發動第三次世界大戰都唔係乜嘢怪事，只不過，如果中國邪惡到挑戰鄰居，後果可能衰過八國聯軍之役。八國聯軍之役最多係庾子賠款，但日本、德國同奧地利都曾經被佔領。 對住呢啲咁膠嘅國家，大家應該諗吓未來嘅前途。

好多香港傳媒，將台灣跆拳道選手楊淑君被無厘頭被犯規嘅事，講成反韓浪潮，但認識台灣政治都知，呢次事件係一次兩岸關係重要分界線，台灣年青一輩，從此不會再視中國為自己國家。 本來台灣新生代獨派思潮就高漲，有啲國民黨人嘅思維己經去到淺綠級數，但無一件民間事件，會觸動人心去到認為，中國係台灣嘅共同敵人。但只不過呢次趙磊，為咗同吳靜鈺之間，無辦法合理解釋嘅關係，搞到不惜舉發台灣楊淑君有問題，甚至記者會上阻止台灣記者提問，如果你係台灣人，你會點諗？ 正如馬尼拉挾持事件，變咗香港人集體回憶，甚至變成菲律賓同香港之間關係惡化嘅分界線，而楊淑君事件情況類似。國民黨五都選舉選情，因為馬英九對中國態度軟弱而唔駛選，而由呢件事開始，台灣新生代會更加偏綠，國民黨繼續親中落去，2012年馬英九勉強連任都好，本身體質比較好嘅民進黨2016都會上台，屆時國民黨真係唔知點翻身。

黃華麒終於頂唔住，宣布明年二月唔再續約。 雖然香港電台無英國廣播公司咁嘅Royal Charter同埋Licensing Fee制度支持，但RTHK文化上，應該係加拿大、澳洲等英聯邦國家以外，另一個繼承BBC文化嘅英式公共廣播機構，如果政府硬係空降啲人落去，空降邊個玩謝邊個，無乜意思，內部晉升可能係比較好嘅做法。 當然，空降外人無話完全唔得，但呢個人要同香港電台有深厚淵源，至少做過香港電台一段時間，同埋思維方式上認同香港電台使命同傳統。只不過，香港呢類人好少，一位係己經復職嘅無線總經理陳志雲，因為陳志雲係少數又熟政府運作規矩，又熟傳媒，又做過晒電台部（用藝名做DJ）同電視部（做鏗鏘集旁白）前線工作，但陳志雲同港台關係密得滯，在過去現在將來都無乜可能；另一位己經係前署理廣播處長傅小慧（依家發展局規劃及地政副秘書長，但傅小慧過往嘅background，查實係同媒體關係密好多）。 但千祈唔好搵周融，搵周生做處長，香港人會衝上香港電台抗議，呢條友一早應該連千禧年代都無得做，早上唔聽烽煙，因為佢條友太廢，黃永就聽都費鬼時。 政府未必再搵AO空降，因為唔熟廣播事務嘅AO，入到去唔知做乜，搵著好似陳志雲、傅小慧呢啲本身對傳媒有興趣嘅友仔做，隨時自己都被港台同化埋。只不過外面搵做開私營傳媒人空降，你估有幾個舞得掂港台。 查實最好係將港台變成一個真正公共廣播機構，好似BBC咁，而經費由差餉維持，或者將出售廣播道港台三幢大樓得嚟嘅錢，成立香港電台基金，由果筆錢去維持。我期望有一日我開電視，可以揀RTHK Legco，RTHK One等嚟睇，而唔係見到TVB、ATV、中天呢堆垃圾全部眼都冤，然後我喺電腦面前繼續睇BBC本地服務。

UncleRay: 我對菜園村關注組貪婪鐵證的疑問 果篇抹黑菜園村村民文章誹謗程度，比《文匯報》李自明果篇更勝一籌，只不過發現有兩樣嘢。 1. 呢篇文章，我曾經成篇擺喺運輸及房屋局副局長邱誠武面前，佢都未證實裡面啲嘢係真，我亦睇政府根本唔會證實果啲料係堅，因為根本係流。如果政府有咁多「堅料」，仲駛你呢啲無名博主放風，搵星島、東周都得喇。邱誠武話11月19日唔郁菜園村，最後亦真係退咗兵，所以，呢啲料政府都唔敢認頭，走去叫人問政府佢就真係唔負責任到爆。 2. 土共寫誹謗文章，係有被人告上法院紀錄，2004年領匯上市之戰，《大公報》有篇抹黑文章話大班沽咗期指，筆法同果篇抹黑文章類似，結果大班一聲唔該告入法院，《大公報》最後要和解。跟住何秀武喺區議會選舉又係用咁嘅手法抹黑鄭家富，結果何秀武要賠成六十七萬。你認為土共咁鍾意上法庭。 所以，呢啲文章就唔放喺報紙，因為一放報紙，我諗依家嘅人唔會做善男信女，唔告佢入法院。所以，就用中國資金背景嘅新浪網，喺度匿名放料唔負責。 南洋誹謗法律搞到咁辣，好大程度因為中共指揮嘅馬共，當年五、六十年代，專門發表啲無事實根據煽動性文章，至今遺毒仍然由國陣旗下《馬來前鋒報》發揚光大。呢班友如果用埋啲中共文革手法亂嚟，我相信亦無乜人想對佢地客氣。係鐵證嘅，真係咁堅嘅，唔係叫人去問政府，而係自己拎實質證據出嚟。事實上，咁多年嚟，土共呢方面死性不改。只不過，何秀武嘅例子話俾大家聽，寫呢啲打手文章，或者轉發，如果真係要負上法律責任，係無人可憐，果啲友仔落筆前最好諗清楚。

「 天 文 台 錄 得 后 海 灣 強 烈 地 震 2010-11-19 HKT 15:18 天 文 台 於 下 午 2 時 42 分 錄 得 一 次 強 烈 地 震 。 經 初 步 分 析 … Continue reading →

一月十三日《信報》余錦賢提出咗一個，我相信反高鐵運動依家走緊嘅方向，就係反高鐵運動成田化。如果真係走向成田機場鬥爭式嘅運動，對政府，將會係惡夢。 成田機場興建相關抗爭，係亞洲地區有晒名。大家見到成田機場，無厘頭喺機場中間，有啲農田或者住屋，呢啲就係成棚抗爭行動中，最有膠力嘅部分，亦即所謂「一坪地主」運動。買一坪地返嚟阻止你班友起機場。如果我係成田機場當局，應該安排遊客參觀吓，因為真係奇景。 當然，唔只一坪地主運動咁簡單，日本有類似香港《收回官地條例》嘅法律，授權政府強制收回用嚟做公共建設嘅土地，但由於成田嘅農民抗爭運動相當多，一係血腥暴力到好似東峰十字路事件，或者成田機場控制塔佔領事件，而由1978年到2004年，大大小小有成五百幾宗玩膠遊擊事件，煩不勝煩，最後日本政府連用強制收地呢招都唔敢，呢個亦係促使日本用填海方式擴建羽田機場，羽田機場重新成為國際機場嘅原因。日日咁同農民以及新左翼分子玩膠，幾時至擴建到機場至得，不如填海算數。 依家政府對菜園村呢班，因為新界原居民阻住地球轉而買唔到嘅村民強硬，一啲好處都無，因為高鐵沿線好多人受影響，例如大角嘴居民，依家西九四小龍嘅住客，見到深旺道樁柱工程，同美荔道隧道開工，至少佢地都係中招人士。一旦抗爭擴大，經常有人玩膠就一啲都唔好玩。演變城市游擊戰可能性係存在，因為菜園村居民，大角嘴居民都一無所有，佢地抗爭嘅機會成本越嚟越低。