也談銀英傳

近日香港政壇，再有人引用銀英傳比喻今天香港政壇嘅情況，作為銀英傳嘅超級粉絲，不妨又插個嘴。

先講楊威利，大部分銀英傳擁躉都同意。楊威利除咗係勁人，仲係一個懶人，佢唔好話無政治野心，如果無必要佢都唔會惹上政治，否則佢唔會成日將幾時拎退休金掛喺嘴邊。楊威利之所以變成元帥，除咗生活嘅壓力，仲有係佢對呢個可以俾佢做番平凡人嘅環境，亦即民主主義政治嘅愛護。當大家見楊威利求婚求得幾膠果陣，都應該估到楊威利對做政客一啲興趣都無，相反幾次佢想退休都迫佢出山一戰。

同楊威利相反係特留楚西尼，呢條友為求權力，講到自已幾偉大，唔聽佢嘅個個都係賣國賊，發動埋啲不負責任戰爭，人人心雄走去打，結果個個係咁先。而銀河帝國征服自由行星同盟後，條友仲好意思留喺海尼森乞求權力，同楊威利組織楊艦隊好唔同。

談判唔係罪過，但一味扮激，不自量力搞到自己人力量大損就係罪過，用銀英傳嚟批評民主黨果啲人，應該睇清楚邊個至係特留楚西尼。