月份彙整九月 2010

在十月一日，亦即中國共產黨呢個連註冊都未註冊嘅組織，竊取中國本土大部分地區六十一年嘅日子，提出呢個理論，可能嚇到大家O嘴。 但大政奉還中華民國，可能係解決當年中國本土、台灣、香港、澳門、西藏等硬膠多合一問題嘅出路。 首先，中華民國喺台灣地區實施過兩次政黨輪替後，不論中華民國喺台灣嘅主權或治權係唔係有問題，但至少一樣嘢，中華民國已經唔係中國國民黨嘅私產，佢係一個可以代表中國人民整體嘅民選政府，只不過流亡緊。咁嘅時候，中國共產黨好清楚係竊國，將大政還歸人民共有嘅中華民國，合情合理。 另一方面，有啲嘢喺將政權奉還中華民國後，可以順利好多解決，其中包括以下三個問題： 1. 中國共產黨合法性問題：如果直頭武力推翻共產黨，咁共產黨一定死硬嘅話，咁共產黨都唔會同你傾咁多，但如果大政奉還中華民國，中華民國新政府以承認自中共一大以嚟，中國共產黨嘅中華民國嘅社團登記註冊，咁中共呢舊乜都唔係嘅怪物法理問題可以解決，比較有希望和平轉移政權。 2. 西藏問題：由於依家嘅達賴喇嘛，仲係中華民國蒙藏委員會按例委任，西藏流亡政府喺西藏回歸民主統治就可以即時解決，中華民國蒙藏委員會追認西藏流亡政府權力，並且締立若干相應法律就係。 3. 台灣、香港主權問題：由於依家嘅中華民國有公投法，咁依家喺中國領土，因大清帝國戰敗割讓領土嘅民眾可以抉擇自己去向，包括台灣（以《馬關條約》割讓地區為準，不計金門、馬祖，呢樣嘢比照自由法國大本營阿爾及爾），以及界限街以南嘅香港，而界限街以上，深圳河以南嘅「新界」，都可以公投決去留。而果啲中共單方面割出去嘅領土，例如俄國搏懵侵佔江東六十四屯，緬甸江心坡果啲地方，亦有法源去爭返嚟。 而且回歸舊制，所謂「王政復古」呢個係中國文化可以接受嘅嘢，中華民國亦代表由孫中山以來創立嘅現代中國，咁樣睇落比較啱數。當然，大政奉還中華民國，只係我發夢諗出嚟，但中華人民共和國呢個所謂共和國，真係太令人反胃。連俄羅斯脫離蘇聯，恢復自己嘅獨立身份後，都復用舊體制好多嘢，包括國旗、國徽、國會名稱等，大家就知發生乜事。 Short URL: http://wp.me/p7cGY-2Fz

明報：疑拍地下電台 無線記者被炒 袁志偉下令「炒魷」 電視台：表現未符要求 呢度唔係第一日鬧爆袁志偉，不過當袁志偉無恥到咁果陣，不單解釋到，點解無線嘅公共事務節目越嚟越河蟹，另一方面，公眾對袁志偉要有啲實質嘅壓力，唔可以對依家因生活關係，侷住留喺CCTVB嘅友仔，一啲支持都無。 我唔知袁志偉係唔係記協會員，但如果係嘅話，小弟認為，記協應該驅逐呢個人出會，袁志偉無資格話自己係專業新聞工作者，呢啲友仔，只不過係香港版袁木（都係姓袁）。 仲有，喺街上遇到袁生，應該當眾鬧爆佢，我睇佢仲有無面喺出街。 Short URL: http://wp.me/p7cGY-2G2

香港政府禁毒處：禁 毒 常 務 委 員 會 三 十 五 周 年 紀 念 　 為履行公民責任，小弟決定義助香港政府保安局禁毒處，鼓勵大家睇禁毒常務委員會三十五周年紀念特刊，並特別留意以下呢段： 「於一九七四年,一 個操控販毒集團多年的大毒梟吳錫豪(綽號「跛 豪」)終於被警方毒品調查科拘捕,控以偷運毒 品(主要來自泰國)來港。吳錫豪在一九七五年 被法庭定罪及被判入獄30年。這是在當時的香港 司法史上最長的判刑。吳的兩名副手則各被判入 獄25年。於一九七七年,當局也下令通緝馬惜如 和馬惜珍兩兄弟(他們是吳錫豪以前的同黨), 打算控以在一九六八至七四年期間偷運700噸鴉片 入口。馬惜如在警方執行逮捕令前潛逃至台灣 (當時台灣與香港並無引渡安排),其弟馬惜珍 則在一九七七年八月被檢控,但在保釋期間同樣逃往台灣。馬惜如於一九九八年在台灣逝世,但 其弟至今仍在警方通緝名單上。」 如果有人要就禁毒處內容提起法律訴訟，請與當時嘅保安局局長，現任立法會議員葉劉淑儀議員聯絡，小弟只係作為香港市民，借出博客一角散發政府禁毒宣傳材料。 Short URL: http://wp.me/p7cGY-2FZ

明報：「國際匯率戰已爆發」 巴西財長直指各國鬥貶值谷出口 鬥貶值谷出口，我諗大家喺洗手皂液賣幾錢睇得好清楚。 近排惠康有個怪現象，就係加信氏英格蘭製嘅洗手液，300ml居然可以長期有特惠價14.9，比中國製或大馬製產品仲平，結果唔駛點宣傳，英製加信氏洗手液都會定期無貨，因為大家知道抵買。而可以咁抵，皆因英鎊係咁貶值，所以近排百佳都出現大量英國本土製造產品喺度傾銷。 由於英國同美國都有成打銀行係default緊或者好有潛力default，仲未計歐洲歐豬四國，結果係又跌唔係又跌嘅結果係，除非中國自揭底牌，否則人民幣無乜可能抵抗升值，而中國貨嘅質素又無歐洲、美國做得咁好，咁樣中國最後唔被人夾扁就怪。 所以大家都食住花生，睇緊人仔幾時侷住「自然升值」，日本、美國、歐洲個個都貶值，中國又死要面怕揭二仔底，咁咪睇幾時爆大煲死鬼咗。 Short URL: http://wp.me/p7cGY-2FW

喺共產黨賊慶之前，成日有啲土共團體搞埋啲擦鞋擦上腦，又影響公共交通嘅亂嚟做法，我今年決定去食環署告發阻街。不過，食環署對付支聯會就爽手，土共呢 「黃世澤： 謝謝你於2010年9月27日給食物環境衛生署的電郵。有關食物環境衛生署的查詢及投訴已經交由「1823電話中心」代為處理。 我們已將你的個案轉交食物環境衛生署跟進，並會盡快將跟進結果回覆你。 如有任何查詢，歡迎致電2868-0000 或 1823 與我們的職員聯絡。 1823電話中心 客戶服務主任 李玉玲 謹覆 2010年9月29日 (檔案編號：1-257400616)」 我諗食環署執法果陣，都應該「慶」完，但市民對呢啲執法雙重標準嘅政府部門，唔慌唔「慶」。 Short URL: http://wp.me/p7cGY-2FS

BBC: EU mulls suing France over Roma expulsions 呢鋪法國真係玩出膠嚟，如果歐盟真係揸住歐洲基本權利憲章嚟告法國，呢鋪薩爾科齊就真係食得屎。 大家都知歐盟基本權利憲章強力到乜程度，如果法國真係被人告得成，立咗案例，基本上日後法國嘅態度就好簡單，除咗少數玩膠人士，可能就係見歐盟國家護照唔係咁多，就俾你住算數，因為歐盟果啲巨額罰款絕對唔係人咁品。 呢個都係點解英國千方百計，任何涉及平等嘅法律，都要將國籍同入境豁免出去嘅原因（Equity Act 2010咪係咁），只不過，一旦EU Accession of ECHR搞得成，哈哈哈哈。 Short URL: http://wp.me/p7cGY-2FP

經濟日報：聖經修訂版 耶穌不再「遊行」 當香港聖經公會總幹事係梁林天慧呢啲，同明光社關係密切嘅人做總幹事，中文版和合本聖經點可能唔變河蟹聖經。 所以，依家一係揸住舊嘅和合本聖經，至少果啲古舊嘅中文，都仲係有傳統味道嘅中文，一係考慮天主教徒一般用嘅思高聖經學會版本，至少天主教香港教區依家仲會守得住先。一係直頭真係聖經學英文，讀英文聖經算，免得被己經被老共污染嘅所謂中文污染。 日後大家查經讀經，我認為改用英文可能係最好嘅方法，因為香港實在太多老共控制嘅假先知。 呢度有思高聖經學會版嘅中文網上《聖經》，大家可多加利用： 思高聖經學會版聖經 Short URL: http://wp.me/p7cGY-2FL

BBC: How Indonesia overtook Nigeria 香港人成日有啲硬膠論調，話唔好抗爭，要和諧就搵到錢。但小弟一直都唔信呢套，而小弟唔信呢套嘅理由，查實同印尼文化好有關係，特別我果個家鄉。 小弟家鄉係亞齊省，果度打咗三十年內戰，一鋪南亞大海嘯，真係嚟個天譴大家至收手，民風有幾勇悍大家諗吓。但印尼全國由戰後到華裔瓦希德教授做總統為止，除咗華裔好少參與抗爭，周圍都係大大小小抗爭，東帝汶又爭取獨立，亞齊夠同印尼同文同種同宗教，結果一樣開片開到七彩。亞洲金融風暴搞唔掂經濟，就全民反檯，搞到蘇哈圖落台，哈比比都坐唔住。 當然印尼戰後連串抗爭，人命代價係好大，幾多妻離子散家破人亡大家知嘅，但印尼最終都清理好多荷蘭殖民遺留嘅膠嘢，你睇印傭願意學廣東話就知，有啲唔做女傭去經商都有，十年廿年後，印尼仲出唔出口印傭嚟香港都好難講，因為印尼本身有實力搞製造業，而出口外傭唔係佔印尼經濟咁大份額，唔似菲律賓。 所以呢個世界好簡單，有啲膠嘢你唔處理，就一路衰落去。當然印尼走錯過路，但你唔抗爭，就等做尼日利亞沉淪，呢篇文值得思考。 Short URL: http://wp.me/p7cGY-2FI

「諾貝爾獎下月初頒發，挪威方面披露，曾遭中國施壓，警告如異見人士劉曉波獲獎，中挪關係將受影響。 捷克前總統哈維爾上周在《國際先驅論壇報》撰文，公開呼籲，將今年諾貝爾和平獎，頒給正在坐牢的中國異見人士劉曉波。 挪威諾貝爾研究院院長龍德斯塔德（Geir Lundestad）周一回應哈維爾的呼籲時指，今年夏天，中國副外交部長傅瑩在訪問奧斯陸時，曾特別約見他，雙方在奧斯陸的中國大使館見面，當時傅瑩說，如果頒獎給劉曉波，會破壞中挪之間的友好關係。 中國和挪威正在磋商一項雙邊貿易協定，有指這將成為未來中國與歐盟合作的藍圖。 今年的諾貝爾和平獎，將在10月8號揭盅。 挪威諾貝爾研究院負責協助挪威諾貝爾委員會，進行和平獎獲得者的評定工作。」 今年真係劉曉波唔拎和平獎都唔得，咁強勁嘅曲線，中國外交部係咪有人係劉曉波支持者，點解可以曲成咁？ Short URL: http://wp.me/p7cGY-2FE

「詹其雄指公安不准他接受訪問 28.09.2010 12:48 獲日本當局釋放的中國漁船船長詹其雄，返抵福建晉江家中休息一日後，今早並無外出，繼續留在屋企，陪伴家人。有村民引述詹其雄說，政府不准他接受採訪，他留在家中與探望他的人見面。 詹其雄的母親說，家中的公安人員要他們不要接受訪問。有記者嘗試透過窗戶與詹媽媽傾談，公安人員隨即關上窗戶。而詹其雄太太今早外出買菜，使用後門出入，刻意避開記者。」 詹生扮完「英雄」，隨即變咗「異見人士」，公安唔俾佢接受記者訪問，仲有公安進駐，得罪日本仔果然好大鑊，汪精衛政權做唔到，唔敢做嘅嘢，俾中國政府做埋，真係犀飛利。 Short URL: http://wp.me/p7cGY-2FB