月份彙整六月 2010

今年民主黨班友因政改風頭火勢拒領勳章，他們應該額手稱慶他們無拎勳章，否則隨時喜事變膠事。 在英治年代，雖然都有啲膠人，因政治謀略緣故拎到勳章甚至爵位，但至少唔會硬膠到過晒火位，或者擺明向老友捱義氣大贈送。但去到董建華年代，為咗彌補土共咁多年嚟半個章都無，頒勳章頒到個章都臭埋，例如楊光、曾憲梓同馬力呢啲膠人都拎到，所以一提起大紫荊，我唔會諗起為香港民主有貢獻嘅陳方安生，而係曾憲梓同楊光，搞到變咗宇宙大王勳章同菠蘿勳章，而金紫荊勳章，你只會想叫佢做福佳勳章。本來英國人留低嘅榮譽制度（Honour System），己經無得七七八八。 今年授勳名單 呢啲授勳，簡單嚟講，我可以話曾爵士要害老友都唔係咁害架，你話曾俊華值唔值得拎大紫荊，如果大紫荊係等同英國嘅爵士級，咁搞法，曾俊華做財政司司長果日就應該係爵士，你話夏佳理、梁智鴻無貢獻，夏佳理原本大好前途，佢就係頂撞梁愛詩果個嚟嘅，而梁智鴻咁多年嚟對醫學界亦唔係無貢獻，你話大班，講真，佢為捍衛香港言論自由被人又斬又嚇，平安鐘又係佢搞，本來金紫荊都唔係過份。問題係，呢次太明顯係因為佢地有份起錨至得到勳章，依家唔係因為佢地對香港社會貢獻得到，係特首覺得，老友犧牲咁多，唔好意思，所以論功行賞，咁樣破壞不成文憲制傳統固然離譜，而大家更加唔會認為因佢地社會貢獻而得到，因為佢地同特首friend，乜曾爵士認為你嘅朋友咁得到勳章又真係好風光咩？ 而有啲得到勳章或者太平紳子嘅友仔，直頭大家會嚴重質疑，好似硬推強拍嘅林鄭月娥，呢條港賊乜值金紫荊勳章，她力主拆天星皇后同埋搞強拆，呢條友係連行政長官公共服務獎狀都唔應該有資格攞，金紫荊？乜特首好鍾意挑逗市民？劉夢熊，呢條友除咗亂嗡廿四，對社會有乜貢獻大到銅紫荊星卓？鄭琴淵、黃戊娣、周轉香呢幾件X建聯，又有乜貢獻咁，我完全睇唔到，唔好話海鮮團都係貢獻。葛珮帆都可以係太平紳士，我完全覺得有無搞錯添。 所以特膠嘅勳章，你要埋我果份。 Short URL: http://wp.me/p7cGY-2lQ

「Zandra Mok 決定為兒子選擇入Montessori幼兒院, 可以說是叫他做Guinea pig, 但我們情願讓孩子自由發展,忠於自己,走出一條自主又負責任的路,也不想將他”填鴨”。希望我們能堅持下去, 不被潮流、人言所動搖。」 Zandra Mok正即勞工及福利局政治助理莫宜端，小弟睇到有關facebook status，我感到係火滾。 你地班高官，因為薪酬比較好，可以揀自己心水嘅教育俾仔女，但平民百姓，特別基層百姓，就要做你地班硬膠官員搞教育改革嘅受害者，呢個世界咁都得？ 所以我一向贊成佛利民嘅學券制，如果你仔女夠料考到外國一級名校，我寧願果筆資助直接用嚟幫夠料嘅家庭讀外國名校，都好過養膠樽義呢啲搞官僚主義學店嘅白痴。 小弟成為市場經濟支持者其中一個原因，就係我睇得太多公立教育制度，貽害青年嘅膠事。 當然，莫小姐喺特區政府，有無做好身教，我就不予置評。家教我一向強調重要，但以香港中產以膠，我對香港人嘅家教一向無乜期望。 Short URL: http://wp.me/p7cGY-2lN

敬啟者： 今天（二零一零年六月三十日）是香港中文大學校長劉遵義教授校長任期最後一天。謹遵劉校長囑，將其新聯絡資料（七月一日起生效）奉告於後，敬請　留意。 此致 各收件人 香港中文大學校長辦公室主任　梁其汝 謹啓 二零一零年六月三十日 ——————————————— 二零一零年七月一日起，劉遵義教授之聯絡資料更改如下： 通訊地址 香港中環添美道一號中信大廈二十七樓二七一零室 中信資本控股有限公司副董事長 劉遵義教授 電話號碼：(852) 3710-6968 傳真號碼：(852) 2104-6938 電郵地址：lawrencelau@citiccapital.com ＝＝＝＝ 中信資本控股有限公司，絕對係一間中國國有資本嘅公司，依家劉遵義入中國國有資本公司做副董事長，而遠傳電訊又是台灣主要GSM/3G牌照以及固網持有公司，中台仍然處於敵對狀態，沒有理由讓一個投共學者擔任如此具戰略地位公司的獨立非執行董事。 小弟認為，台灣政府應該在這議題上有所回應，這實在太扯了。 Short URL: http://wp.me/p7cGY-2lK

「張 文 光 透 露 政 府 曾 接 觸 民 主 黨 查 詢 個 別 成 員 接 受 勳 章 意 向 2010-06-30 HKT 17:17 政 府 明 日 公 布 一 年 一 度 的 授 … Continue reading →

周澄喺今期《壹週刊》專訪中，自爆自己做過舞小姐，有人問我點睇。 我話，咁又點？ 喺歐洲，如果你見過呢啲新聞，咁你仲認為周澄入大學前做過舞小姐有幾大件事： – 冰島總理Jóhanna Sigurðardóttir同她嘅同性伴侶進行民事結合，成為第一個有同性伴侶嘅國家領導人。 – 法國世界報（Le Monde）賣咗俾三個左翼老闆，一個係聖羅蘭嘅同性伴侶貝爾熱（小弟喺AM730介紹過呢個人），一個Xavier Niel，呢條友係做鹹網發達（法蘭西係乜都得），同埋投資一個專門起薩爾科齊班老友底嚟恥笑佢嘅網站 – 依家英國倫敦市長Boris Johnson，未成為倫敦市長，仲係旁觀者雜誌（The Spectator）老總果陣，結咗婚同人偷食仲搞大人個肚，其中一個同佢鬼混嘅，仲要係旁觀者雜誌嘅下屬。 咁又點？只要不涉及貪污，政界人物私生活真係唔關我事。克林頓夠淫蕩，但佢真係衰果樣嘢叫講大話，依家周澄自爆喎，咁誠實嘅，鬧嚟做乜？ Short URL: http://wp.me/p7cGY-2lD

呢幾日個市跌到hihi，中國經濟數據出咗事，有機會放緩，加上歐洲銀行又有資本問題，結果大家雞飛狗走。 大家仲記得，早一兩個月，成班友賭中國、香港、韓國、澳洲、紐西蘭嘅CDS賭到飛沙走石，如果喺果個時候大家準備撤退，就可以避過一劫，大家無乜可能直接入CDS市場賭鑊甘，但可以由CDS市場度知道「大鱷」嘅部署方面，特別依家大鱷先收緊你政府借貸救市能力再去隊冧你嘅策略非常明顯。事實上，呢幾日韓國嘅CDS，以及ANZ同渣打嘅CDS依然保持升勢，大家就知道有事發生緊。 小弟相信，中國經濟有可能硬著陸收場，大家睇富士康都玩到盈警，當中國越嚟越唔似世界工廠果陣，大家認為中國會無事？中國隨時因經濟爆大鑊而出現大變化，呢樣嘢小弟要提醒大家。 當中國經濟硬著陸果陣，正代表香港同中國局勢隨時爆煲，大家係時候小心準備起錨。 Short URL: http://wp.me/p7cGY-2lA

李鵬飛：政改之後 下一步估領袖 有睇開呢度，唔會對飛哥嘅觀點感到陌生，好早小弟都己經講咗，五區公投實際所起嘅以戰迫和作用，同埋依家中國對香港政局嘅打牌思路。或者有人認為飛哥講阿媽係女人嘅嘢，但呢次有咁重量級嘅人佐證小弟喺博客寫嘅觀點，呢點始終係重要。 但飛哥篇文最後果幾段至係最值得大家注意，特別最後一段，飛哥明確警告大家，依家香港係中國共產黨各大派系開大片嘅戰場之一，而中國明顯胡溫同太子黨，以至江系都磨拳擦掌準備開大片，飛哥係提醒大家小心做人。 如果咁都唔明，我救唔到佢，估領袖只係小菜一碟。 Short URL: http://wp.me/p7cGY-2lx

近日可能因學校放假，定世界盃緣故，巴膠又好鬼猖狂，小弟深宵就聽到兩個巴士公司職員講，藍田港鐵站交通交匯處，有巴膠擅自開車，搞到撞車而要派人視察嘅硬膠意外。 鍾意巴士方法有好多，呢啲巴膠嘅行為，除咗硬膠真係無嘢好講，而且鋪鋪呢類案件都係搞屎條友逃去無蹤，令人無奈。 不過，巴士公司有時縮皮行為，亦係為深宵嘅道路使用者帶嚟危險。因為依家巴士公司唔派看更看守有泊車嘅巴士總站，而係搵間護衛公司一條友揸車巡十幾個總站，只要班巴膠夠得閒，知道果啲保安嘅出沒時間，咁佢地就有機可乘搞破壞，小則亂換車頭嘅牌，大則搞到撞車。 但最大鑊係唔知幾時有巴膠真係揸架巴士出總站，然後亂揸一通，搞到嚴重事故就認真唔講得笑。可能撞到行人，但更怕係喺觀塘道或者長沙灣道亂咁舞，到時小弟真唔敢想像有乜事發生。 巴士迷絕對要嚴厲批評呢啲唔顧公德，頭大生草嘅硬膠，但巴士公司亦無乜理由，縮皮縮到唔顧安全。每架巴士成百幾萬，都係公司財產嚟架。 Short URL: http://wp.me/p7cGY-2ls

當你睇到最新一期《Face》嘅封面，竟然有周澄同林輝嘅陳年戀聞做古仔果陣，我諗類似英國《Private Eye》咁嘅玩膠、爆料同八卦共冶一爐嘅雜誌，喺香港出現係遲早問題。 先講《Private Eye》係乜，大家見到咁嘅改相封面，都估到呢本雜誌嘅風格係玩膠，呢本雜誌亦係英國保守黨政客最憎一本雜誌，除咗經常拎保守黨人嚟恥笑外， 呢本雜誌亦爆過唔少保守黨政客偷食內幕，例如倫敦市長Boris Johnson幾鋪偷食事件，都同呢本雜誌有關。 當然，好似《東方新地》咁，偷拍陳巧文係唔啱，查小欣條八婆半年前為《東方新地》辯護，亦變相做咗今日薜凱琪被偷拍嘅幫兇。但係政界人物，被人當係娛樂界人物咁討論，亦反映咗公眾唔再恐懼政治，視為生活嘅一部分，對於成日令人民遠離政治，恐懼政治嘅當權者，呢種當政治係生活一部分嘅思維，係一種威脅，因為呢種思想一普及，公眾遲早要求更大程度嘅民主化。正如呢度用潮語，甚至高登語嚟討論政治，一嚟自己覺得好笑，二嚟呢個亦係將政治討論變成日常生活一部分嘅方法。 如果香港嘅Private Eye出現果陣，香港仲未全面普選嘅話，呢個政府聽被人玩膠玩到執笠吧。 Short URL: http://wp.me/p7cGY-2lp 後話：另一方面，周澄嘅緋聞有娛樂新聞嘅價值，亦反映咗依家呢個娛樂圈果啲所謂新星太膠，又唔靚女，又無性格，點搞。大家唔見，近排娛樂版會討論嘅人物，唔少根本唔係娛樂圈。今年香港小姐選舉？邊個得閒理？如果再學去年玩林潔榆咁玩，就真係邊個玩邊個膠。