民主黨與香港統監府會談

對小弟嚟講，香港一早己經由統監府統治（否則我唔會用咁嘅名稱呼中聯辦），所以民主黨同香港統監府談判政改，唔係乜嘢剝奪一國兩制舉動，因為無咗一國兩制好耐。

圖片由香港統監府向香港電台提供

不過香港統監府由上述照片睇到，中央明顯俾咗好大壓力，要佢地同民主黨平等講數。以往中聯辦班友見人，都應該唔會用呢種平等嘅坐法，大家記住，中共一向對港政策，係迴避中港英三角情況，儘量係中英自己搞掂，咁樣直面香港政黨，應是首次。況且三個人中，有兩件係支聯會常委，何俊仁仲係一直有幫法輪功同埋維權律師，師濤案都係佢出手，講同中央對抗，怕且何俊仁同公社聯盟半斤八兩，所以我唔多信何俊仁會賣屎忽，亦無必要依家就鬧民主黨背叛。

由交戰原則嚟則，民主黨同統監府傾，小弟唔會鬧佢地，因為如果交戰雙方完全無談判嘅話，呢啲仗唔擦槍走火就怪。老實講，如果2005年有咁嘅談判，當年就好辦好多。

當然，李剛同何俊仁傾，雙方係唔會有乜退讓，真係有實權退讓係中央派出嘅官，唔係李剛呢挺芝麻官，我都係引長毛果句爛gag，見李剛，不如見吳剛，今日嘅會面只係表明雙方談判正式開始，小弟亦估唔到張檯係擺成平等陣勢，我諗國共兩黨打大交以嚟，中國未有兩個對立政黨安排咁嘅對等談判。依家睇中央官員嚟果陣，擺係乜陣式。

小弟睇法好簡單，中央唔讓，民主黨無必要讓，大家睇實馮檢基、梁耀忠、張國柱同李國麟四條友，當中三條友賣咗屎忽就頭都痕。其中，李國麟投誠機會最大，馮檢基大家唔好俾佢條友走。

Short URL: http://wp.me/p7cGY-2cs