小弟對香港好多行業入CEPA都唔多緊張，但速運業係例外，小弟不只喺報紙寫過，更加寫信去立法會，點解，今日一次嘔血經驗話俾大家聽乜事。
小弟一般喺果啲由收件人負責運費嘅件，要求付運方交俾港資速運公司，或者一間喺香港有大型分公司嘅中國速運公司，因為最重要理由係一票到底，我一個tracking number就可以知道件貨嘅去向。
今日中國果面有位老哥，無聽指令，搵間聲稱自己喺香港做得好掂嘅速運公司，查實佢喺香港嘅件係交晒俾一間福建人開嘅速運公司做，結果係點，就係件事喺我間公司無人可以話事俾錢嘅情況下送上嚟，之後未有人可以俾錢，又無留低tracking number同聯絡方法就揚長而去。
由於中國嘅tracking number喺香港個系統搵唔番，結果用咗成個鐘至再安排派遞，仲要係我就佢去佢指定地點拎貨，你話點可以接受？
大家諗吓，如果港資派遞公司無法養起自己喺中國嘅派遞員，乜貨都交俾中國嘅公司去派，會有幾多激到心臟病發嘅事件。所以，為人為己，香港速運業最好可以得到CEPA待遇，唔駛喺新嘅硬膠《郵政法》下退出市場，否則好似小弟遇到類似嘅怪事，只會無日無之，命都短幾年。
Short URL: http://wp.me/p7cGY-1UW
