搵人訪問小心啲喇

今天有線訪問咗三十五歲馬小姐，聲稱家庭月入六萬，話反對加印花稅，話唔好懲罰啲四百萬樓換六百萬樓，六百萬樓換一千萬樓嘅人喎。

馬小姐嘅英文固然係笑點，但更大笑點係佢嘅換樓計劃，基本上，有線訪問咗一個幻想力高得嚇大家一跳嘅友仔。

家庭收入六萬，就算假設無咭數負擔，當銀行按揭利率年利息2.75%（P-2.25%，P為HSBC最佳貸款利率），廿年按揭，利用HSBC網站計算，最高貸款金額係5,533,358，換六百萬樓無問題，但一千萬樓就好有問題。

更何況一個大問題係，馬小姐依家三十五歲，幾時買到四百萬嘅樓，隨時係呢一兩年家庭入息去到六萬至批出嚟。你仲要有三個仔女，當你有仔女果陣，銀行更加唔會借足俾你嘅，仔女本身係當作一個風險因素（risk factor）計算，咁你話馬小姐幻想力係咪去到天神村級數？

有時候，check真少少就少咗笑話。

Short URL: http://wp.me/p7cGY-1PK