硬膠敗家司機危害行人

「一名新牌司機凌晨在堅尼地道駕車失控，撞毀十米長鐵欄後，再衝落十米下山坡，險些撞進香港公園的觀鳥園。

該名廿多歲的新牌司機掛著P牌，駕駛父親的平治S320房車，凌晨近一時離開寓所沿堅尼地道落斜，懷疑轉彎時失控，先撞毀路邊十米鐵欄後，再反彈到另一條車線，再衝上行人路的路邊的鐵絲網，由於衝力太大，房車連同大幅鐵絲網一同衝落約十米深的山坡下，「倒豎葱」般直衝到香港公園的範圍，險些撞到觀鳥園的鐵籠。

汽車的車頭嚴重損毀，司機僅受輕傷，自行離開並報警，汽車其後由吊車吊回地面，警方正調查事故原因。」

通常有時深夜出去羅便臣道嘅便利店食宵夜，過馬路絕對要打醒十二分精神，因為半山夜晚無嘢多，就係硬膠敗家司機零舍多。

好似堅尼地道車禍呢挺硬膠司機己經唔係最差嘅個案，因為至少佢有掛P牌，你見到呢啲司機仲可以小心提防一下，而且香港考得車牌嘅友仔，駕駛技術膠都好，都仲有少少譜，亦唔敢醉酒、索K後揸車，或者公然喺羅便臣道、堅尼地道呢啲窄嘅路開快車。

最差嘅個案有三種：

1. 果啲有掛埋中國車牌果啲敗家車，十之八九揸到亂晒籠，衰過P牌。
2. 有啲自以為駕駛技術好得嘅友，揸住架波子之類喺半山果啲窄路，深夜高速飛馳，呢啲友仔我睇幾時炒鑊勁，因為深夜時間半山啲路係有重型貨車出出入入，試過有鋪爭啲見到意外。
3. 有啲司機，你喺紅燈果陣見佢個款，懷疑神智不清，特別係亞畢諾道或者花園道上嚟果啲車，唔少你懷疑係蘭桂坊飲大咗，甚至索完K嘅友仔，但我好少見到差佬喺半山一帶設路障，截查嚟自蘭桂坊嘅蒲友。依家無事，唔代表以後唔會有事。

隨住越嚟越多無皇管嘅敗家仔住喺香港，以前話住半山夜晚過馬路算安全，依家無呢枝歌仔唱。

後話：我住果頭附近，四叔收購業權收得七七八八，睇嚟羅便臣道一帶好快沙塵滾滾，但本來羅便臣道發展密度己經係太高，如果恆基仲要重新發展，睇嚟好多半山人都可以準備搬屋。好多人憎地產商，因為依家地產商實在bad taste。我並不想搬離港島，搞到真係要揸車，但依家地產商嘅魔爪己經伸到嚟嘅話，搬到新界東我諗係遲早問題，如果我仲頂得住珠三角嘅空氣嘅話。

講真，我驚遲早地產商嘅魔爪伸到嚟新界東西貢一帶，依家連古洞都食指大動，要毀村滅鄉，港島繼園又被新世界搞到亂七八糟，遲早香港周圍都唔駛住。