LMF、香港、法國

我知對好多，連搬鐵馬都當係暴民嘅香港傳媒人，LMF絕對係暴民樂隊，而小弟居然經常在這裡推介LMF，我相信在傳媒人，像小弟如此熱愛LMF（仲要一直以來，我唔係太講粗口，我近年因為政事太膠，有時私下談論政事忍唔住爆粗）是異數。

但如果對歐陸文化有理解，LMF玩粗口並不是為粗口而粗口，對傳媒亂象有最嚴厲批判當推LMF，而LMF嘅歌係有相當學理修養，仲要係法國。MC仁係法國留學，仲係讀藝術果一面，由於LMF係搬緊法國果套嚟香港，喺高登文化未大舉進攻前，香港好多偽君子係頂唔順法國人呢一面（香港人只知法國有LV，吐血）。而揸緊中指，簡直將法國大革命奠立自由平等博愛原則唱咗一次出嚟。

「不自由　毋寧死
妥協最後　失敗者只會係你 」

上述句子就是法國國家格言自由那部分，Vivre libre ou mourir，好多唔讀書就以為MC仁亂咁填，有讀法國革命史一聽就知呢部分嘅出處。

「為　平等　一個Freedom
為自由追尋　同權力繼續繼續抗衡
不聽天由人　自由不分富貧
平等自由應該屬於　每一個人」

呢個正係唱緊對平等呢部分嘅解釋，呢個仲呼應有法治一日依然不怕，因為自由平等博愛係包含法律保護每一個人，平等正係法律面前，人人平等。

仲有一樣嘢：

「強勢未倒下　頭臚未被斬下
有法治一日　我哋依然不怕」

有乜國家嘅革命，搞到要將強勢嘅頭切落嚟，果個正係法國，喺法國波旁王朝結束後，喺協和廣場切咗六萬幾條嘅人頭落嚟，全部用斷頭台呢樣嘢嚟切頭。所以呢首嘅煽動力，唔只因為時勢，或者弦樂部分，而係成首歌根本有好濃厚嘅法國文化放咗入去，大家係唔覺。

點解呢首歌喺香港係最具煽動性，因為現時嘅局勢己經進入法國大革命前夕嘅局面，簡單嚟講，1月16日嘅決議講俾大家聽，依家功能組別班友，同法國大革命果陣三級議會果班教士同貴族係一模一樣，唔單只唔顧人民，而且胃口大到同黑洞一樣。而果陣法國亦無公投呢樣嘢，如果國王路易十六唔肯解決呢班硬膠嘅話，唯一可以做就係推倒重來，重新玩過。而出現法國大革命式社會嘅特徵係，大家唔在乎用暴力之後大家嘅觀感，亦開始各式各樣膠事嘅清算，而近日傳媒人相互開片，只係成件事嘅序幕。

如果依家上面班友唔清楚依家搞邊科嘅話，我最怕係香港掀動之後，喺中國爆發有史以來最難控制嘅連鎖反應，《阿凡達》禁映，以及香港人話俾中國人聽，呢個世界除咗自焚，仲有好多方法後，世事會起變化。

因為好多人仲唔知時局危險，我己經放棄對他們嘅勸導，如果出事，他們自行負責，唔關我事。1月16日係和平示威，但如果傳媒、政府以為抹黑示威者可以解決問題，佢地正係推向大革命嘅罪魁禍首，禍來禍去皆自招，係呢個意思。我呢排重溫法國大革命嘅歷史，因為我算到，時辰己經差唔多到。

Short URL: http://wp.me/p7cGY-1Hs