月份彙整十一月 2009

當facebook出現一個集體自殺群組果陣，香港傳媒膠到只係問警方有無可能查到個group嘅搞手，或者青協點樣搵意圖自殺嘅年青人，但係呢個group背後嘅社會問題，完全無人敢掂。 查實facebook自殺群組，正係四代香港人問題嘅衍生品。 年青時候年華正茂，如果有一兩個諗唔開想自殺，就話果啲人諗嘢鑽牛角尖，有問題，但如果成一百八十幾人都鑽牛角尖鑽成咁，咁唔只年青人有問題，更好可能係個社會有問題，睇呢度得耐都知，世代戰爭己經演變到一個將臨爆發嘅臨界點，而集體自殺係一個臨界點信號。 消極嘅人就集體跳樓燒炭，咁如果覺無希望，又唔甘心燒炭自殺果啲，咁佢地會點做，做咗徐步高，定直頭去搞革命？反正都爛命一條，大家有無意識到一陣𤓓味己經傳緊過嚟咁。而傳媒河蟹到，連社會警號都唔敢正視，我諗真係爆出大鑊嘢果陣至如夢初醒己經太遲。 由果位鏟咗個group再開返果條友嘅行徑，呢條友好有決心做「極端分子」，睇嚟呢類人唔少，而且個社會似乎爆緊大鑊，我諗我唔係睇緊《二十世紀少年》或者《死亡筆記》嘛。

南方日報：番禺或对垃圾焚烧项目去留进行全区公投 「 对于市民群众的投诉,番禺区委、区政府、区人大和区政协已分别召开会议进行了研究,提出了以下几条处理措施:一、问计于民。通过开展全民大讨论,广泛听取民意,发动大家建言献策。二、聘请专家作全区的区域规划,垃圾焚烧发电厂选址拟进行重新审视和论证。三、加强环境评价工作。四、建立科学、民主的政府决策机制,不排除进行全区群众投票。五、建立科学的垃圾处理机制。包括推进垃圾的分类处理,实行垃圾的减量措施与焚烧发电综合处理相结合。」 當連番禺班官都意識到，全區群眾投票係科學同民主嘅決策機制，連焚化場建唔建都要全區公投果陣，點解香港班土共，特別《明報》班膠人要反對公投？曾經有一位中國黨官同我講過，香港嘅土共應該係全中國最垃圾嘅共產黨，依家小弟咪明點解囉，連老共都要用公投嚟解決垃圾焚化爐問題，費時番禺班友出衝出街反對政府果陣，點解香港班土共就聽到公投就腳都軟埋，究竟呢班友係唔係呃飯食？

又到每年一度公布審計署報告嘅時間，每半年都有一堆機構被審計署點名批評。不過，小弟對生產力促進局被點名最為心涼。 生產力促進局近幾年己經醜聞百出，而且成為IT界嘅眼中釘，因為經常做埋啲與民爭利嘅事，2008年選舉仲誇張，譚偉豪濫用生產力促進局個名，但都係無人理，成件事不知所謂。呢個機構本身都污煙瘴氣，不知所謂，只不過長期IT界嘅聲音被忽視，等到審計署出手至爆大鑊。 點解生產力促進局呢類硬膠組織可以長期無人理？因為功能組別，如果唔係有咁多功能組別議員，靠乜叉工業組織等呃飯食，生產力促進局呢類組織有乜合理理由保留至得，呢啲政府部門又唔係，民間組織又唔係，企業又唔係嘅組織最濫用公帑，亦係最麻煩。雖然小弟都係功能組別選民，但小弟好憎功能組別嘅原因係，好多時好多所謂爭取業界權益嘅建議，只不過係慷納稅人之慨，為咗佢地班小圈子，最後又係我地出錢，條氣唔順。香港嘅功能組別唔係為業界從業員服務，但為少數老板搵著數服務。你睇譚偉豪個衰款，開IT Panel都開到成舊屎咁，上NOW TV有人誤會我至係議員，大家都知發生乜事。 小弟等住睇，政府帳目委員會，之後點樣審生產力促進局。

2012年會唔會世界末日，搞到大家要坐方舟，小弟唔知，但如果你以為金融海嘯將盡，明年你會死得好慘。 英國金融時報：Could sovereign debt be the new subprime? 呢篇文非常具前瞻性，依家喺各大ibank嘅trade room，依家剩番最穩陣嘅投資產品就係Government Bond，Bond檯有「殯儀館檯」之名唔係吹出嚟，問題係英國、美國等工業國，係又借唔係又借，加上Citi果堆大行資本充足率依然低到離晒譜，但美國經濟又無乜改善，如果政府走數，或者政府債券市場搞到一鑊泡，咁引發嘅金融震盪就肯定唔係講玩。 仲有一樣嘢得人驚係中國啲樓價，中國依家個樓價係泡沫嚟嘅，係上半年瘋狂借錢借出嚟，但信貸一收緊就A股跌到阿媽都唔認得，依家香港銀行系統異常大量嘅游資（三千幾億呀大佬，有大無細），小弟有理由相信係中國走佬出嚟嘅錢，過完冷河就會四處亂走，到時中國同香港經濟會變成點，大家估呢？2012會唔會世界末日，我唔識推，但2010大事勿用，結婚等通通唔好郁係我最忠實嘅建議。 你問小弟要投資邊度，小弟都好鬼頭痛，但如果按小賭怡情嘅角度，用少量嘅錢投資擁有大量貴金屬嘅國家，或者跟白銀戰隊隊長孫柏文玩兩手都唔錯，因為金價依家偏高，白銀無咗工業需求都好，但如果白金同黃金都明顯太貴嘅，咁白銀就有佢嘅投資價值，特別喺政府走數風險有可能上升果陣，但小賭怡情好，睇定做人無壞。 但有樣嘢係可以肯定，英鎊、美金、港紙、人仔呢四種貨幣，你諗住長揸就諗清楚，而你依家買樓，準備變高息大閘蟹都得，食大閘蟹幾好，做大閘蟹就認真唔老黎呀。

近日泛民內部討論公投，討論得相當熱烈。有部分泛民的避戰態度，固然相當難看，但有些泛民的質詢，也不是純粹怕死，是有道理的，儘管公投會戰是必須要打的一仗，戰略上也是必勝無疑，但良好的戰術執行仍然相當重要。 而有幾點，小弟希望公投派要注意： 1. 不必急啟戰端：現時在討論較混亂時輕啟戰端，由於準備不足，肯定不是最聰明打法，因此，不必在下月就露出這一手，先閃電把政府的政改方案否決掉才談，充分運用否決權的剩餘威力。 2. 議題必須清晰：公投戰爭的奧義在於議題清晰明確，因此，林忌的改名公投固然是必要的一手，而議題是什麼才是重點， 將功能組別送進歷史垃圾崗，當推是最清晰，最適合的決戰議題。 各位要留意一下，今天《星島日報》史泰祖醫生的文章，小弟對史醫生沒啥好印象，但今天史醫生對公投的分析和立場，卻有可能反映匯賢智庫的真正取態。如果民主黨或泛民有人硬膠，咁嘅方案都收貨，泛民應該尋求民建聯以外，任何反對政改方案的票，保證政府方案會被否決掉。 公投會戰是赤壁之戰，避戰那人是白痴來的，但必須等待東風來臨才來個火燒連環船。公投會戰怎樣打，將會影響2010年香港政局的版圖，這屬無庸置疑。 現時三軍未動，糧草定必先行，除了各位應該要檢查一下自己的選民資格，不要搞得公投一仗打起來時連票也不能投，由於社民連和公民黨樁腳有限，在戰術上最差假設下，先報定做義工，以及捐款給這兩個政黨也屬有利無害之舉。可以用認捐模式，在公投戰開打時才正式付鈔，或現在便當成黨日常經費捐出，仗未打仍要做準備。正如諸葛孔明，也得要草船借箭一樣，更何況不一定能成功借箭。

當中聯辦副主任李剛，話五席公投問題要海納百川，有容乃大，睇完真係笑咗。 小弟想問： 1. 土共亂咁抹黑泛民同埋支持自由民主嘅人，係唔係海納百川，有容乃大？ 2. 如果海納百川，有容乃大，點解鋪鋪有人示威，中聯辦都唔接信。 3. 如果海納百川，有容乃大，點解泛民咁多人連回鄉證都無，真係做咗中國國民（海外）？ 呢句嘢，留番俾你李剛喇，泛民點傾公投唔關你李剛事。

在上周一香港電台《講東講西》，小弟故意提到楊慕琦計劃，呢個計劃不單係功能組別嘅發明基礎，而且仲係暴露咗中共拒絕給予香港民主嘅真正原因。 要篤爆老共，永遠都要研究中國共產黨黨史。而《文匯報》轉載中國共產黨新聞網一篇報導，就成為中共不給予香港民主嘅證據。 新中國成立後中共「暫時不動香港」戰略出台始末 唔知《文匯報》係唔係有老一輩高手喺度倒緊屎，但呢篇正係老共走數嘅確鑒證據，請睇以下摘錄： 「在這個過程中，英國為了避免「剌激中國」，還主動擱置了已經設計完成的讓香港逐步走向「地方自治」的所謂「楊慕琦計劃」。「如果香港走向獨立式的自治，反而會刺激中國，提早收回。」「英國人搞外交富有現實主義精神，也頗為老練圓滑。……如果英國欲得到中國許諾，香港地位暫時不變，楊慕琦計劃反而變成絆腳石，英國的策略是通過外交渠道行事，而不是兵戎相見。」 點解英國要避免「刺激中國」被迫放棄楊慕琦計劃，若非中共向英國講明，英國怎會不得不放棄楊慕琦計劃，很明顯不是如土共教科書所講，當時中國政局混亂，不知有多少移民南來才放棄楊慕琦計劃（小弟也遭誤導），而是老共不想香港民主自治，才會令楊慕琦計劃難產。 因此，中共欠香港人民主自治的數，欠了六十年，不知老共什麼時候才會還？不想給香港民主不是英國，而是中華人民共和國！香港人，醒吧！

「民 間 電 台 藐 視 法 庭 案 曾 健 成 堅 持 不 支 付 訟 費 2009-11-24 HKT 11:17 高 等 法 院 繼 續 審 理 民 間 電 台 藐 視 法 庭 的 案 … Continue reading →

番禺居民對垃圾焚化爐嘅抗議，今日演變成全面抗爭。先有請願群眾演變成在市政府門前示威，根據twitter上的最新報導，雖然有相當部分群眾和平散去，但亦有群眾轉移陣地繼續抗議，有可能成為前日昆明市中心大規模反拆遷事件後，另一宗急劇惡化的群眾事件。 而這次事件，可以說是中國政治另一個里程碑： 1. 這次是有效使用Twitter傳播的中國大規模民眾事件，基本上，你鎖定#pylj就己經肯定知道最新動態，我睇中國政府必定絞盡腦汁封鎖twitter，但中國民眾會發現微博客嘅強大威力。 2. 由於這件事喺twitter傳播得太快，去到連官方傳媒也開始突破當局限制報導事件，以下係《南方日報》即時報導，如果香港傳媒仲係自我河蟹嘅話，真係連南方報業集團都不如。可以肯定係，南方報業集團喺編採自主問題上立場越嚟越強硬，有可能成為中國真正嘅新聞領導者（鳳凰衛視去死吧）。 3. 廣州市民承傳廣州佬一貫作風，就係己經費鬼時理政府嘅謊言，又懶得理公安會唔會拉人，總之出咗嚟先講，之後小弟見到唔少訪民亦加入埋抗議隊伍，喺人多勢眾下睇嚟唔係咁快可以收科。五年前番禺太石村事件，揭開中國維權抗爭嘅序幕，五年後又喺番禺，垃圾焚化場抗爭再度為中國民眾運動嘅模式升級。呢次事件嘅發展，將會決定2010年嘅中國局勢會係點。 所以，香港人咁怕死做乜，公投就公投，幾大就幾大。

中國人民解放軍駐港部隊，今年首屆參加毅行者，查實本來係好事，因為呢個代表佢地願意同香港社區共同合作，不過，佢地贏咗毅行者冠亞軍後，果啲核突表現就搞到解放軍出醜，睇嚟遲早會修例修到唔駛解放軍出嚟玩。 毅行者嘅路線，查實係駐港英軍，特別啹喀兵嘅訓練路線，真正嘅軍事訓練精神係，以盡量少的支援，以最快速度完成整個路段，軍人打仗係預咗隨時無補給或缺乏補給都要打落去，呢個係軍事常識，訓練果陣預備大量補給支援果啲係白痴訓練。所以啹喀兵一向都係以基本的支援隊伍嚟行畢全程，兩三條友做支援，然後自己孭相當重裝備，軍事訓練就係咁樣。 而毅行者亦唔係鬥快做目標，睇過蔡東豪寫毅行者本書，都大概知道毅行者係挑戰自己同養成團隊精神更重要，名次真係比較次要。由於大家都唔係當毅行者係乜體育比賽，所以樂施會亦無明文限定，每隊支援隊伍可以有幾多人，可唔可以中途換跑鞋，支援隊伍可唔可以阻人前進之類嘅問題。 但係解放軍呢鋪真係勁難睇，史上最豪華嘅支援隊伍唔駛講，仲要支援隊伍阻人前進，中途換嘅跑鞋通山掉，搞到成個路段不知所謂。咁唔怪得人地投訴爆你，由體育精神嚟講，俾你拎到第一又點，一睇就知解放軍唔知毅行者玩乜。而軍人最講武德，呢個仲睇到解放軍武德，連國際標準都未達到，威武文明之師就只係中國方面自吹自擂，呢類無武德軍人，就連二次大戰德國國防軍都不如（黨衛軍SS係勁，不過濫殺猶太人嘅人渣垃圾）。 由軍事角度嚟睇，解放軍有無作戰能力仲係疑問，成棚友有大量支援下輕裝上陣，時間仍然比啹喀嘅紀錄慢廿五分鐘，呢幾年參加毅行者嘅啹喀，查實都唔係現役軍人，G4S果班係退役軍人，如果退役軍人無屈機仍然快過你嘅話，咁你呢班現役軍人喺作戰體能上，根本係遠不及啹喀，以往駐港英軍，甚至隨時只係皇家香港軍團（義勇軍）嘅級數，駐港解放軍己經係精英軍團，咁大家諗吓中國最頂級嘅陸軍，打唔打得過英軍先？連英軍都打唔過，咁美軍一打到嚟，你敢肯定解放軍有近年四圍打仗嘅美軍咁fit？ 呢啲死面子嘅行徑係自暴其短，如果我係北約成員國駐港武官，或者日本自衛省嘅武官，睇完今年毅行者只會笑咗，中國係軍事強國，連軍人基本質素都未搞掂，俄國賣幾多過期軍備都係得啖笑。