大家唔知有無發現，近日鑊鑊遊行都會有示威者留喺政總或督憲府門口，而且鋪鋪都搞到差佬清場收場，而參與人數，同支持者越嚟越多。除咗一個好中國歷史嘅觀點，用清末皇族內閣經驗去解釋，一年前小弟分析文章，至今仍然有效，小弟再摘錄當中四點：
1. 特權階級不受節制。
2. 香港的政治免費午餐演變成法國大革命前的三級會議，各級代表受付託代表所代表階層利益，無法退讓妥協。
3. 社會實際運作，與大家信仰的核心價值越來越遠。
4. 政治、人文、經濟各種利益糾纏不清，單靠建制難以改造。
高鐵撥款可以睇到頭兩點，政改報告又係頭兩點嘅反映，功能組別設計最爛嘅一點，正係第二點，利益無退讓妥協餘地，一旦搞分組點票結果就得個膠字，亦令到建制難以改造。
而改造建制不外乎幾個手段，公投、軍事政變、革命、暴亂，後三種風險都大到離晒譜，五區公投幾乎係最溫和嘅方案，呢個亦係我呢個鴿派支持五區公投嘅原因，因為呢個己經係最保守嘅選擇，再保守嘅選擇，基本上就係不具操作性，唔work嘅。
如果五區公投破局，或者五區公投都迫唔到香港有實質政改，你估下年七一有幾多人賴死喺政府總部同督憲府門口唔走？依家時間無多，如果再有膠嘢發生就連小弟都要考慮拿拿聲定居英國算數。
