將立憲派也趕到同盟會那邊去

在評蔡子強今天在《明報》篇文前，小弟先講一講古，又講番辛亥革命。
在1901年，八國聯軍之役清政府輸到裙拉褲甩後，慈禧太后同佢班守舊派大臣，諗住延長大清帝國壽命，於是亦抄1898年光緒皇的改革方案搞政治改革，雖然談不上誠心誠意，但當時仍然有一班立憲派人士支持改革，並且擋住咗同盟會果邊嘅壓力。
但局勢由1909年開始惡化，好多立憲派中人促請清政府快啲手成立議會，但清政府採取一個睬你都傻嘅態度，大家好唔耐煩，有啲立憲派中人仲被皇室拉咗去新疆（東土）充軍，果陣時己經有立憲派中人覺得時態勁唔妥，改為同革命派合作，推翻清政府算數，但呢班人仍然係少數，未到成個政府搞到倒台嘅程度。
1911年，搞咗內閣，不過大部分人都係皇室貴族，被當時寸為皇族內閣，果陣好多立憲派覺得清政府搞A貨改革，根本係昆佢地，結果呢班立憲派中人喺四川保路風潮果陣打響第一槍，佢地做埋同盟會果份，甚至激過同盟會，所以10月10日嘅無預警革命得到迅速成功，連湖北調去四川鎮壓保路風潮嘅新軍亦變埋革命軍嘅一員。
呢個故事教訓乜嘢，當連溫和派改革派都覺得好唔耐煩果陣，如果當權嘅唔切實改革結果就係死路一條。蔡子強今日篇文最令我失望係，佢睇唔到依家第四代果種心情，己經係當年晚清立憲派果種心情，連醫生、律師呢啲人都出聲果陣，就係全面革命嘅形勢，只係差條友做導火線引發事變。蔡子強連咁牙煙形勢都唔知，咁唔怪得曾爵士完全不知自已身陷險境。
如果曾爵士又推出A貨政改，就係香港政權走向終結嘅開始。
延伸閱讀：
林忌：四代香港人的回答

沒有普選就沒有強勢政府

繆美詩：只見浮雲，不見烏雲
曾爵士EQ低，早唔係乜新聞，以我記憶所及，曾爵士EQ最好果陣，應該係佢做清潔大隊長果陣，佢最多日日聽鄭大班呢個香港鬧鐘媽爆政府過過癮，否則佢做唔到特首，呢幾年佢EQ都無高過，甚至越來越差。
EQ低都還好，曾爵士唔記得係，呢度唔係新加坡，你想媽番傳媒轉頭，無全民普選就只可以講，你做人肉沙包係天公地道。
新加坡李光耀可以對傳媒咁惡，查實有個理論基礎，就係佢係直選出嚟，李光耀由頭到尾都係堅持權力必須來自人民直接授權（各位記住一點，李光耀除咗係資政，仲係丹絨巴葛集選區的國會議員），一個「國會至上論」的信徒，所以佢對傳媒監督政府厭惡，除咗因為當時新加坡傳媒好多被馬共滲透外，佢仲認為呢個係僭越民選政府權力行為，邊個人授權你傳媒統治國家。你可以唔認同佢的手段，但曾爵士鬧傳媒就連ground都無，因為佢認受性仲衰過傳媒，傳媒仲係民眾有俾過錢，佢只係八百條友閂門選出嚟。
所以同樣政界人士媽爆傳媒，梁國雄鬧《文匯報》記者係狗，就無乜人怪佢，《文匯報》係乜傳媒大家心照，梁國雄係直選議員，《文匯報》記者唔係，選民授權梁國雄媽爆《文匯報》記者都與人無尤，而小弟認為梁國雄唔應該鬧《文匯報》記者係狗，因為狗係好可愛的動物，我相信大把人想用更毒辣的詞語，來回敬《文匯報》呢份濫用傳媒公器的報紙。
簡單嚟講，無普選，政府就係天生一個大沙包，想無普選而去搞強勢政府，呢個只係白日夢。
註：新加坡係有官委議員，但官委議員同非選區議員（反對黨贏唔夠三席，就會官委得票最高的填補，贏超過三席就唔會委反對黨入做非選區議員）在國會的權力受盡限制，點會好似香港區議會咁，委任議員同直選議員權力一樣，都唔知乜道理嚟。