等住膠喇

Jump to Comments

「醫生律師供不起樓
特首：量力而為冇問題
2009年10月15日 (09:35 am)
(2人)瀏覽人次：3,717轉寄朋友
行政長官曾蔭權今早出席電台聯播節目，不少致電聽眾均對樓價「脫節式」飆升感到無奈，期望政府推出穩定樓價措施。

任職醫生的市民嚴小姐說，她與任職律師的男友均為專業人士，但想置業結婚，亦因樓價太高而負擔不起。另一位男聽眾更直言，目前樓價已跟社會脫節。

曾蔭權回應稱，雖然近期樓價上升，但價格與 97及 98年高峯時仍有距離，相信市民有能力負擔，不存在買不起樓問題。」

今朝早電台烽煙節目，有聲稱係醫生，並且有男朋友係律師嘅聽眾話，佢地夾埋都買唔到樓。乜醫生同律師唔係高薪職業咩，點解買唔起樓。

我諗，大家對四代香港人依家困境了解仲未夠。

律師分兩種，一種係律師，一種係大律師，大律師有經驗，做到資深果隻級數確係發過豬頭，但如果你初出道無乜客，因為大律師係個人執業，自已做老闆，食西北風都好容易。而律師近排有IPO多好少少，但基本上，唔夠五年經驗的律師，有30K人工算你執到，好多有20K人工己經偷笑，仲要專門做埋啲豬頭骨級嘅嘢，最好賺最易做俾啲Partner袋鬼晒。

醫生仲大劑，你做到醫管局顧問醫生咪發囉，一般新入職醫生做到死果款，更加唔駛講做醫療集團果啲受薪醫生，你有30K-40K都可能好唔錯。兩個人夾埋70K，根據依家香港銀行嘅審批制度，你嘅供樓能力係月薪的60%，70K x 0.6即係42K，通常你供1000000嘅樓，你預10K，42K叻仔極咪四百幾萬嘅樓，港島基本上唔駛諗，除非你買北角果啲二三百呎小單位，以前我老哥一個人住，供樓當交租咪無問題，結婚？發夢喇。港女肯制，果啲賣女嘅港媽都唔會制。小弟當年買樓，係被認為係奇人所為，就係咁解，因為同我同代，時至今日可以勇到買樓果啲，都係唔多。當然，小弟依家唔會買樓，摸頂果個最蠢。

有人話，咁買舊樓就得，年青人最缺係首期，所以佢地要做好高按揭成數，七成到九成不等，但銀行政策係，舊樓超過某個樓齡，按揭成數就最高做六成，甚至一半（以半山果堆舊樓計），依家半山廿幾年樓齡嘅樓，都有啲可以三百萬買到，但準備成一百五十萬首期喎，請問邊個俾呢？你要儲幾耐錢，都儲到筆首期，我估無五年到十年都唔駛諗，仲要途中無失業。仲要當年小弟住果啲豆腐單位，依家都要成百七萬，咁半山果啲三百幾萬嘅盤剩番幾多，小弟都幾懷疑。

當呢隻級數嘅四代香港人都面臨咁困境時，唔通得二世祖至可以同中國班洗黑錢茂利揮，所以我話呢個問題唔能夠軟著陸嘅話，小則暴亂，大則誘發香港獨立運動。記住黃仁宇的《關係》論，人搞出革命好多人同經濟、愛情以及自身生存三種關係有關，即係好勇、好貨、好色三大關係。依家好貨同好色都搞唔掂，而香港樓價又牽動中國銀行系統穩定性，成個革命溫床擺咗響你面前。

21個回應

Filed under 香港政治