Daily Archives: 七月 31, 2009

林忌：救救朱凱迪．香港一人一蚊掟響律政署大行動 津巴布韋個硬膠總統保鑣，在香港亂咁打人就唔告，朱凱迪為咗捍衛香港嘅文化價值，律政司就追佢廿七萬，我地納稅人養律政司班廢人，原來係用嚟做埋晒啲膠事，正經事唔駛做架？ 律政司亂嚟都好多鑊，又BT案，又古惑天皇案，市民決定幫朱凱迪找數，不過我地係用大量硬幣找數俾你班膠人，我地一人一蚊掟晒去律政司度，咁鍾意玩膠呀，我地就玩飽佢，廿七萬個一蚊佢慢慢數啦。 大家應該多多去認捐一蚊大餅俾朱凱迪，真係去找數果陣，大家帶住大量一蚊餅，叫律政司慢慢數飽佢喇。 根據《硬幣條例》，我地每年拎住等值一百元的硬幣，幫朱凱迪找數係合法： 「(1) 行政長官會同行政會議可藉命令授權發行硬幣， 其設計、 面額、 成分、 準重量及可容許的 公差， 須於命令內指明， 而只要該等硬幣沒有經過任何受 法律禁止的 形式處理， 即屬作為支付下列款額用途的 法定貨幣─ (由1999年第68號第3條修訂) (a) 以面額不少於$1的 硬幣而言， 所支付的 款額不超逾$100； (b) 以面額少於$1的 硬幣而言， 所支付的 款額不超逾$2。」 一人拎住一百蚊硬幣幫朱凱迪找數，吹呀。

天主教香港教區主教湯漢，已經表明反對校本驗毒，要用愛心向學生教導正確人生觀，又要求政府減少教師工作量，而天主教學校考慮退出校本驗毒計劃。 校本驗毒計劃，根本只是假設青少年是賊，小弟絕不贊成。至少有兩件事，已經顯出毒品問題，根本政府有責，校本驗毒是推卸責任： 1. 將軍澳又無K房，公園晚上十一點便關門大吉，又無機鋪，呢啲係乜規劃嚟，年青人根本無地方消閒。 2. 正生書院至今仍然要面對梅窩那些鄉紳的反對，政府去咗邊？走數呀？ 總之，政府呢類卸責政策，小弟絕不支持。

亞視新聞報導，房協打算搞中產公屋，小弟認為呢個計劃真係膠到無朋友。 小弟明白，好多第四代香港人連樓都無，買樓因為俾班中國貪官炒起樓房遙遙無期，但政府可以引進租金津貼（小弟傾向以租金津貼取代公屋），可以恢復出售居屋，亦可以恢復首次置業貸款計劃。不過中產公屋是最爛的方案，不單未有鼓勵年青人向上，而且會令房協的官僚架構臃腫起來，還未計房協如果提供商場之類的設施，最後如何收科。 第四代香港人的買樓問題，確是一個政治問題，必須解決，但中產公屋肯定是最爛的膠方案。暫時而言，租金津貼是最合理的方案，次之是恢復居屋出售，但限制出售對象。中產公屋，no way。

中國accumulater苦主維權網：打折股票網 如果大家認為雷曼苦主令人頭痕，咁佢地一定未知中國有班友仲勁抽，並且已經殺到嚟香港，佢地accumulator苦主。 呢班accumulator苦主，當然唔係等閒之輩，大家諗吓炒燶accumulator果啲係乜嘢人，分分鐘都係係大官、大官嘅二奶，同有錢嘅企業主人，呢班友分分鐘難纏過雷曼苦主十倍，甚至搞到銀行喺中國業務膠晒都得。雷曼苦主未解決，又要處理埋呢班友，香港銀行都算有今日嘞。 後話：小弟明白中國的民眾只係識得X建聯嘅人，但陳鑑林條友絕對唔可靠，呢條友四年前支持領匯上市，聯同工聯會瘋狂抹黑大班，小弟當年喺鄭經翰度做政策顧問，亦係受害者，依家呢班友食碗面反碗底，又不斷抹黑領匯，呢班友仲好意思出嚟反領匯？呢啲友仔嘅信用，同投資銀行一樣。睇番林忌寫嘅《支持領匯上市－歷史不會忘記》。 林忌：支持領匯上市－歷史不會忘記