泛民成日怨自己，資源唔夠，傳媒封殺搞唔到群眾工作。查實，群眾工作最重要係乜。
以前做業主立案法團委員果陣，成日有啲土共支持者講，話大廈出咗乜乜事果陣，民主黨班友唔理架，民建聯對我地幾好之類，然後幾個師奶就同民賤聯講好說話。
呢幾位土共支持者講嘅話，我一直銘記於心，事實上，只要群眾需要你時，願意挺身而出，就大家知道邊個係真係做嘢，邊個吹水唔抹嘴。
一直以來，我都認為長毛係得，因為睇過吓書都知長毛理論根柢，喺立法會差不多無乜敵手，只不過傳媒抹黑佢。好多事，佢都願意挺身而出，至少他知道群眾的事無小事。
這次儘管TVB和ATV無恥封殺，但長毛仍然得到網民一致認同，可以睇到，群眾路線嘅重要。
至於果啲雙重標準黨，例如成日話政黨政客騎劫嘅福佳，咁民眾有事，政客唔出嚟，你又話佢地唔做嘢，你講晒喇。一如有件民生事件，民賤聯出手就叫服務人民，民主黨出手就叫騎劫，呢啲乜膠邏輯嚟嘅。
不要再怨要幾多蛇宴齋宴，講嚟講去，都係一個用心問題。
鄧竟成呢鋪將花生黨當賊辦，結果引起全城公憤。你話我自己有無犯過咁嘅錯誤，查實我好肯定咁講，有。
喺2004年果陣，王岸然果班友不斷攻擊A45台果陣，我為咗反擊，花生黨同真正有心玩嘢果班友不分，結果膠到打算向花生黨發律師信，甚至成為「每月之星」，當然膠成咁，好多人聽到黃世澤呢三個字，成個彈起又好正常。
作為一個公眾人物，好應該就當年亂打花生黨道歉。過往係我自膠，對唔住，我唔會再犯果班「偽人」同「特警成」一樣咁膠嘅錯誤。
今朝早，長毛、陶君行、林藹雲、article23.net網主、同我等人，都去了警察總部抗議，雖然人數唔多，但我個人覺得，在只有廿四小時不夠的動員時間下，加上天寒地凍，算是成績不錯，沒有來的不用太自責，昨晚你們在討論區都幫了很大忙。
而且這只是第一波，警告鄧竟成不要亂來，亂拉廿四是要承受政治代價，結果警察未來數天依然故我，年初二是需要有所行動。
當然，香港長遠而言，是需要一個類似Electronic Frontier Foundation的組織，長期監察政府的網絡政策同施政，這也是我周五晚《講東講西》的一分鐘環節，故意挑EFF來介紹的原因。網民經常被屠宰，實在宰得太多次了，要有一個民權組織替他們出頭，包括有必要時提供法律援助，以及上立法會反對那些硬膠政策。
再後話：一如所料，在這類資訊自由議題，成日扮資訊科技界代表的譚偉豪，同埋黃錦輝例必隱形，如果他們繼續隱形，呢度的資訊科技界功能組別選民要識做，唔好投呢類IT界有事時潛咗去大西洋嘅「代表」嘅票。呢次現任議員單仲偕，至少有出嚟講嘢。
