MO’s notebook 3 to 4

當李小平膠雞撐飯蓋到當全世界人係盲的程度時，亦代表左澳門一國兩制已經玩完，擁有澳葡護照的人，應該好好享用作為歐盟公民的福利。

李小平呢位橫睇掂睇都唔似差佬的警界一哥，講野口氣完全係示威者錯，自己無錯，但事實上，如果在鏡湖醫院的朋友有乜三長兩短，開槍果位差人在香港實被判誤殺，甚至謀殺。因為三百米範圍天降子彈，睇黎都係果位差人的子彈，以Colt左輪手槍三百米射程計，加埋拋物線作用，三百米中槍一些都唔奇。

最令人心寒係李小平果副大陸黨官嘴臉，如果一國兩制係代表侵犯人權唔駛負責，不如澳門立即撤銷一國兩制。李小平親身宣布，一國兩制係A貨，你地最好唔好信。

而我相信果位開槍的差佬，查實係陳水扁派來，佢仲唔證明左台灣點解唔接受一國兩制？

乜野叫膠到無朋友，澳門差佬今日示範一次俾大家睇。

澳門警察當左自己響伊拉克執勤，試圖用自己枝點三八向天開槍示警，點解示威者固然唔理佢，差佬仲死撐話，只不過係防止有人踩人至開槍。

話口未完，路透社發出的新聞相，即時篤爆官方講大話，當時示威者唔似有人跌倒，話當時附近有個阿婆跌倒，但即時有其他差人扶住，但個差佬開槍果陣，表情異常亢奮，唔知對方係甲狀腺失調，荷爾蒙失調、思覺失調，定係食左忽得，藥力勁得滯忽左。

在任何西方國家，就算對付球迷暴動，如果咁都開槍，唔傷人就寫花file，傷到人就實洗定八月十五坐監都得。好多時，最好連槍都唔亮相，因為警察果些係細槍，如果在場示威者玩到搶槍，你睇下有乜事發生喇。

中東果些向天開槍，一方面好多示威者都有槍，二來又無行人天橋呢樣野，三來果枝係AK-47，俾你有膽都唔敢搶枝AK-47。開槍都唔緊要，睜大眼意圖用膠到無朋友的借口，意圖過骨，咁我唔俾番膠佢地，都對唔住自己喇。

一直以來，土共一直很羡慕澳門被中共牢牢控制，傳媒不願表達民怨。要看澳門人發牢騷，最忠實的應是澳門電訊CyberCTM極動感論壇。

但防民之口防成咁，官商勾結嚴重就會出事，繼去年五一勞動節遊行衝突後，今年仲勁，玩到警察驚慌過甚，向天開槍，當然，向天開槍，你估中東佬開AK-47，基本上係無阻嚇作用。遊行人士，最後照樣攻破警方防線。至於點收科，問上帝。

香港土共雖然時常被我們這批民主派支持者嘲笑，恥笑。 但他們事實上做好了一項很重要的政治任務，就是擔當香港市民的出氣袋。因為香港有五花八門的傳媒去紓緩民怨，董建華這樣低能的白爛做特首也好，才沒有暴亂。

建立和諧社會，官員必須要成為被公開指罵的對象。防民之口，不能建立和諧社會。